Ответ. Добро есть поминати в молитве о мире святых церквей, и инех последующих; но яко не достоин, и не имый силы на сие. Апостольское бо есть завещание. И о просящем добро есть помолитися. Есть бо евангельское и апостольское слово: «всякому просящему у тебе дай» (Лк. 6, 30). И еже: «молитеся друг за друга, яко да исцелеете» (Иак. 5, 16), и паки: «якоже хощете да творят вам человецы, и вы творите им такожде» (Лк. 6, 31). И о апостолех моляхуся нецыи. Нерадяй убо о заповеди себе осуждает. Темже убо, могий немогий, понуждаю себе за заповедь.
Ответ 129, тогожде великаго старца к томужде, и к сопребывающей с ним братии: просившей бываемыя от молитвы помощи на враги, и яко да речет им житие иного старца — аввы Иоанна.
Радуйтеся о Господе, чада вожделеннейшая и прелюбезнейшая. Господь да исполнит прошения ваша во многих благих, и да изнеможет в вас лук сильных, и вы да препояшетеся с высоты силою. Удивляюся, аще хощете вы пользы душ ваших, якоже аз хощу, и молю Бога нощию и днию о вашем спасении! Не рех, яко не хощете; но, яко не весте. Отсюду бо известни суть чинове и степени, и меры, и где будет наследие. И якоже человек славен в мире, и искушен в куплях жития сего, и разумеваяй величество, и преимущество, и чести воинския, подвизается увоинити в величии чада своя; они же аки неискусни, небрегут; негли же, не разумевающе честей великих воинов, лучше желают быти художницы рукоделий: тако есмь аз к вам. Но простите мя, якоже бо человек, не в мудрости глаголах. Пришед бо в себе, помянух, яко земля есмь и пепел, всех зол хранилище, прослезихся, о нихже возглаголах, «и рех, вскую похвалися земля и пепел» (Быт. 18, 27). Но обаче зане предварих рещи, яко желаю спасения вашего, и всякаго блага ходатай ваш хощу быти, аще сие возмогу, сотворю по силе моей. О житии же единодушнаго чада, благословеннаго и смиреннаго послушника, по всему отвергшаго даже до смерти хотения своя вся, что имам рещи? Рече Господь: «видевый Мене, виде Отца» (Ин. 14, 9) и о ученице рече: яко может, яко учитель его. Имеяй уши слышати, да слышит. Простите мя и помолитеся о мне.
130. Тогожде к томужде великому старцу прошение о здравии аввы, закосневшаго в болезни, и о душевных страстех; и подобает ли близ живущаго старца посещати; и откуду тело зле сорастворилося есть?
Радуйся, брате, о Господе. О здравии сына моего могли бы нецыи от сущих зде святых помолитися Богу (якоже и ему известих), да сотворит и не болезновати ни единаго дне, и было бы тако: но обаче не могл бы имети плодов терпения. Не весть ли он, что претерпех аз? Недуги, огневицы, скорби, дондеже приидох во пристанище сие благоотишное. Много пользова его болезнь оная к терпению и благодарению. О страстех же: должен есть поработити всяк тело свое скудостию и скорбию по возможности. Еже посетити брата, добро есть; а еже празднословити, зло есть. Во искус же приводит тя самая вещь: посети ближняго, и сохрани еже не празднословити, но по собеседованию святых отец, яко то: како имаши авво — и прочее: рцы нам слово живота вечнаго, како обрящем путь Божий? Помолися о мне, яко многа имам согрешения; и подобная сим, и молитву, и отыди от него с миром. Тяжесть тела твоего зле сорастворяется от разслабления (уныния) твоего и тяжести бесов. Да укрепит тя Бог на них, еже законно подвизатися и победити, и венчанну быти о Христе Иисусе Господе нашем. Емуже слава и держава вовеки. Аминь. Помолися о мне, брате.
Ответ 131, тогожде великаго старца к томужде.
Брате, ты рекл еси, яко немоществую душею и телом. И чесо ради не исповедал еси, яко здравствуеши волею своею. О душе и теле не веси, что ти полезно есть; о воли же, ниже неисчетно многи хитрецы ведают тако, якоже ты. Не веси ли, яко присно угрызаю тя раз по разу? Аще можеши терпети, терпи. Аз бо яко безумен глаголю, зане убо безумен есмь: и ты сам тожде глаголеши. Еже бо рещи: не вем, что полезно ми есть, се есть, Господь да даст нам разум во всех. Прости мя и помолися о мне.
132. Тогожде к великому старцу, вопрос и прошение о молитве.
Молю тя, честный отче, скажи мне о воле добрей и злей, что есть, да не просто мимо иду святая твоя словеса. И прости мя и помолися о мне, да избавлюся от диавола и его смущения.
