Глаголет блаженный: чадо, юность аще имать смирение, довлеет ей. Ничесоже бо ищет от юнаго Бог, точию чистоты и смирения. Ты убо, чадо, буди кроток и смирен, сострадателен и милостив, и имей себе под всеми человеки, и будеши по истине с Богом водворяяся. Подвизайся же и о еже не мечтати умом, яко в меры онсицы святаго достигох, но глаголи себе выну тако: душе, веси ли, яко грехами превзыдохом и бесов, дело же благо николиже сотворихом Бога ради, и горе нам, о унизившаяся! Что сотворим в день судный? Буди же молитва твоя, чадо, во все время живота твоего, якоже грешника, глаголя на всяко время: «Господи Иисусе Христе, Сыне Божий, помилуй мя». И оно: «Боже, очисти мя грешнаго». Глаголи и сей глагол всегда: «от тайных моих очисти мя, и от чуждих пощади раба твоего» (Пс. 18, 13, 14). Виждь же и сие, да не довлеешися благими своими делами, ниже дерзай на ня, не веси бо, аще угодна суть пред Богом, или не угодна. Сего ради дерзай паче на Бога, и на силу Его: яко прах не полезен себе вменяя. И отсюду исправление.
Глаголет паки брат: отче, како может человек побеждати всяко искушение, находящо нань от супостата?
Отвеща старец: чадо, яково-нибудь искушение, аще найдет на тя, молчание есть победа ему, и смирение, и еже глаголати: благослови, отче. Вся же дела смиренномудраго разумна суть Богови и похвална пред святыми Ангелы Его: грозна же и страшна бесовом. Ты убо, чадо, буди смирен сердцем и сокрушен зело, яко да возжелает Дух Святый вселитися в тя и даст ти силу, еже отразите всякое житейское попечение.
Вопроси паки: еда ли, якоже ныне умножишася святии во всем мире, (тако) и на кончине века сего?
Глаголет ему блаженный: чадо, даже до скончания века не оскудеет пророк Господу Богу, такожде ниже сатане служитель. Обаче в последних днех, елицы воистину поработают Богови, скрыют себе благополучно от человек, и не будут в них знамения и чудеса совершати, яко же в нынешних днех, но делательным путем и растворенным со смирением, пойдут и большими знаменоносных отец обрящутся во Царствии Божии. Занеже тогда никтоже будет во очесех человеческих творити знамения, да от таковыя вины возгараеми человецы, зело со усердием на подвиги потекут. Будут бо украшающии священства престолы во всем мире неискусни отнюд, не ведущии художества добродетели. Такожде же и предстоятели монашествующих будут. Низложени бо будут от чревонеистовства пси, и от тщия славы, и будут соблазн человеком паче, а не образ. Сего ради паче вознерадена будет добродетель, сребролюбие бо тогда имать царствовати, и горе монахом, богатеющим златом: поношение бо будут таковии Господу Богу и не узрят лица Бога жива. Монах, или мирянин, даяй в лихву злато свое, аще не отступят от таковаго лихоимания, в глубоком тартаре потоплени будут: не произволяют бо плодопринести тая Богови благотворением нищим. Сего ради, чадо, якоже предрех, от невежествия держими множайшии, в пропасть падут, в широте заблуждающе широкаго и пространнаго пути.
Вопроси паки брат: рцы ми, отче, како нецыи изнуряют телеса своя воздержанием, а страсти царствуют над ними: гнев, вражда, памятозлобие, зависть, и горшее всех немилосердие, и скупость: нецыи же от добродетельных, и ядят, и вино пиют, и ниединаго же греха обретается в них? Что убо есть сие?
Преподобный же рече: якоже мню, чадо, яко много постящиися и не исправляющиися, от уст своих страждут. Хранения бо не имый устом своим выну, аще и все лето постится, ничтоже пользуется. Зане диавол ли раздражает тя на гнев? Ты да не возглаголеши, и пообладал еси над страстию. Паки на зависть ли тя приводит враг? Ты да не оклеветаеши, и победил еси лукаваго: плод бо зависти оклеветание. Аще разжжет тя наветник на блуд, да не отверзеши уст твоих в беседу жены, ниже в пищу и питие множайшее да внидеши, и укрепился еси нань: взем же малое древце, побий себе, и болезнь отгонит брань. Полезно бо ти есть, да един от удес твоих погубиши, а не все тело твое ввержено будет в геенну огненную. Аще подвижет желание твое вепрь оный дивий в многоценная ястия: шед в нужник, разумей зловоние их. Аще тя укорит кто, или осудит, или буим назовет, и ты смири помысл твой, и осуждай себе, яко грешна. И помяни, яко Христос, Сын Божий, оплеван бысть: поруган бысть от человек грешник, и тростию по главе биен бысть, и тогда помышляй себе недостойна и еже жити. О добродетельных же ядущих и пиющих веждь, чадо, яко они воини доблии суть, поправше страсти греха, ныне же суть господие и властелини, приемше дарование безстрастия от Бога. Первее бо воздержанию давшеся, и подвизавшеся получиша намерение, егоже желают. Обаче творящии сие, многажды пред человеки сие творят: едини же паки безмолвствующе, яже воздержания деют, наполняюще в келлии не ядением та, яже не доставаху им пред человеки.
Конец, и Богу слава. Аминь.
