Слезы Манассиины, Ниневйтян покаяние, Давидово исповедание приим, вскоре спасл еси, и наши молитвы ныне приими, даждь здравие болящему, о немже Тя молим.
Подаждь нам Твою милость, Госпоже, всегда на Тя надеющимся, испроси здравие болящему, врачебнии Твои руце с Предтечею, Богородице, ко Господу Богу простирающи.
Дщерь Иайрову уже умершу, яко Бог оживил еси, и ныне возведи, Христе Боже, от врат смертных болящаго, Ты бо еси Путь и Живот всем.
Сына вдовйча оживив Спасе, и тоя слезы преложив на радость, спаси от недуга тлеющаго раба Твоего, да и наша скорбь и болезнь на радость прийдет.
Огненну болезнь тещи Петрове прикосновением Твоим исцелив, и ныне возстави болящаго раба Твоего, да востав яко Иона, послужит Ти.
Скорбнии, смиреннии, грешнии, не имущий дерзновения к Тебе, Пречистая Богомати, вопием, умоли Сына Твоего Христа дати болящему здравие телесй.
Бездну милосердия и милости имея, Христе Боже, услыши моления раб Твоих. Ты бо еси Петром Тавифу воскресил, Ты и ныне в болезни лежащаго воздвигни, послушав церковных молитвенник.
Врачу душам и телесем нашим, понесый недуги всего мира, Христе, и Енея Павлом исцеливый, Ты и ныне болящаго исцели святых апостол молитвами.
Преложи, Христе, на радость рыдание о недужнем скорбящем, да Твою получивше милость, внидут в дом Твой со обетными дарами, славяще Тя в Троице Единаго Бога.
Приидйте, о друзи, поклонимся молящеся о болящем Божией Матери. Та бо имеет власть недужныя исцеляти, со безмездникома вкупе, духовным невидимо помазующе маслом.
Душу мою, Господи, во гресех всяческих, безместными деяньми разслаблену воздвигни божественным Твоим человеколюбием, яко же и разслабленнаго воздвигл еси древле, да зову Ти спасаем: щедре Христе, даждь ми изцеление.
Иже руки Своей горстию содержай концы, Иисусе Боже, Иже Отцу собезначальный и Духу Святому совладычествуя, яко плотию явился еси недуги исцеляя и страсти очистил еси, слепыя просветил еси, и разслабленнаго словом Божественным совоставил еси, сего право ходяща сотворив и одр повелел еси на раму взята. Темже вси с ним воспеваем и поем: щедре Христе, даждь ми изцеление.
О, Кресте Пресвятый Христов, честное Древо Животное. Тобою смерть погибе и мертвии воскресоша, и ныне болящаго изцели и оживи, якоже при Елене умершую девицу.
Долгую и лютую болезнь Иовлю на гноищи и в червех, того молящася, словом исцелил еси, Господи. И ныне же в церкви о болящем молим Тя: яко благ, исцели невидимо молитвами святых Твоих.
Вси вемы, яко умрети нам есть, Тебе Богу тако изволившу, но на мало время, Милостиве, здравия просим болящему, пременй от смерти на живот, даждь скорбящим утеху.
Пособствуй и помогай нашему сиротству, Богородице, Ты бо веси время и час, когда умолити Сына Твоего и Бога нашего, дати болящему здравие и прощение от всех грех.