В лето 6478. Святославъ посади Ярополка в Киеве, а Ольга в деревехъ. В се же время придоша людье ноугородьстии, просяще князя собе: «Аще не пойдете к намъ, то налеземъ князя собе». И рече к нимъ Святославъ: «А бы пошелъ кто к вамъ». И отпреся Ярополкъ и Олегь. И рече Добрыня: «Просите Володимера». Володимеръ бо бе отъ Малуши, ключнице Ользины; сестра же бе Добрынъ, отець же бе има Малъкъ Любечанинъ, и бе Добрына уй Володимеру. И реша ноугородьци Святославу: «Въдай ны Володимера». Онъ же рече имъ: «Вото вы есть». И пояша ноугородьци Володимера к собе, и иде Володимеръ съ Добрынею, уемъ своимь, Ноугороду, а Святославъ Переяславьцю.
971
