Древние Литургии полностью

Предстоятель: Мир всем.

Народ: И духови твоему.

Диакон: Паки и паки, непрестанно миром Господу помолимся.

— О принесенных и освященых, честных, пренебесных, неизреченных, пречистых, славных, страшных, ужасных божественных Дарех Господу Богу нашему помолимся.

Народ: Господи, помилуй. (на каждое прошение).

— Яко да человеколюбец Бог наш, приемь я во святый и пренебесный и мысленный Свой Жертвенник, возниспослет нам Божественную благодать и Дар всесвятого Духа, помолимся.

— Соединения веры и причастие всесвятого и поклоняемого Его Духа испросивше, сами себе, и друг друга, и весь живот наш Христу Богу нашему предадим.

Народ: Тебе, Господи.

Предстоятель: Боже и Отче Господа и Бога и Спаса нашего Иисуса Христа, великоимените Господи, блаженное Естество, независтная Благостыне, всяческих Боже и Владыко, Сый благословенный во веки веков, седяй на Херувемех и прославляемый от Серафим, Емуже предстоят тысящи тысящь и тьмы тем ангел и архангел воинства, принесенные убо Тебе дары, даяния, приношения в воню благоухания приими, ихже освятити и совершити сподобил еси, Блаже, благодатию Христа Твоего и наитием Всесвятаго Твоего Духа. Освяти, Владыко, и наши души и телеса и дуси, и прикоснися помышлений, и испытай совести, и отвержи от нас всякое помышление лукавое, всякий помысл срамный, всякую страсть и похоть постыдную, всякое слово неподобное, всякую зависть, и суемудрие, и лицемерие, и всякую лжу, всякое лукавство, всякую леность, всякое искушение житейское, всякое любостяжание, всякое зло, всяку ярость, всякий гнев, всякое злопомнение, всякое оклеветание, всякое сребролюбие и нерадение, всякое движение злое плоти же и духа, чуждое святыни Твоея.

И сподоби нас, Владыко человеколюбче Господи, со дерзновением неосужденно чистым сердцем, душею просвещенною, непостыдным лицем, освященными усты смети призывати Тебе, Иже на Небесех святаго Бога Отца, и глаголати:

Народ: Отче наш, Иже еси на Небесех, да святится Имя Твое, да приидет Царствие Твое, да будет воля Твоя, яко на Небеси и на земли. Хлеб наш насущный даждь нам днесь: и остави нам долги наша, якоже и мы оставляем должником нашым: и не введи нас во искушение, но избави нас от лукаваго.

Предстоятель: И не введи нас во искушение, Владыко Господи, но избави нас от лукаваго и от дел его и от всякаго оскорбления и козни того, ради имени Твоего святаго, нареченного на нашем смирении. Яко Твое есть Царство и сила и слава, Отца и Сына и Святаго Духа, ныне и присно и во веки веков.

Народ: Аминь.

Предстоятель: Мир всем.

Народ: И духови твоему.

Диакон: Главы наша Господеви преклоним.

Народ: Тебе, Господи.

Предстоятель: Тебе приклонихом рабы Твои, Господи, своя выи пред святым Твоим жертвенником, чающие от Тебя богатыя милости: богатую и ныне благодать Твою и благословение Твое ниспосли нам, Владыко, и освяти наши души и телеса и дуси, яко да достойны будем причастницы и участницы святых Твоих Таин во оставление грехов и жизнь вечную.(благословляя дискос и чашу X)Ты бо еси поклоняемый и препрославленный Бог наш, Ты и Единородный Твой Сын, и Дух Твой Всесвятый, ныне и присно и во веки веков.

Народ: Аминь.

Предстоятель:(на солее, воздев руки): И да будет благодать и милость святыя и единосущныя и несозданныя и нераздельныя и поклоняемыя Троицы со всеми вами.

Народ: И со духом твоим.

Диакон:(обращаясь к народу, подняв правую руку) Со страхом Божиим вонмем.

Предстоятель(возносит святой Хлеб крайними перстами правой своей руки, держит его немного приподняв и негромко произносит молитву, в храме наступает молчание, и народ преклоняет главы):

Святе и во святых почиваяй, Господи, освяти нас словом Твоея благодати и наитием всесвятаго Твоего Духа. Ты бо рекий, Владыко: святи будете якоже Аз Свят Есмь; Господи Боже наш, непостижиме Боже, Слове, Отцу и Духу единосущне, совечне, нераздельне, приими чистую песнь во святых Твоих безкровных жертвах с херувимы и серафимы и от меня грешнаго, вопиюща и глаголюща:

(Возгласно): Святая святым.

Народ: Един Свят, Един Господь, во славу Бога Отца со Святым Духом, Емуже слава во веки веков. Аминь.

Диакон: О спасении и заступлении Святейшего Отца и Патриарха нашего АЛЕКСИЯ и Отца нашего архиепископа ВИКЕНТИЯ, и всякой души скорбящей и озлобленной, милости и помощи Божия требующей, и о обращении заблудших, исцелении болящих, освобождении плененных, упокоении преждепочивших отец же и братий, вси усердно рцем: Господи, помилуй.

Народ: Господи, помилуй (12 раз).