Минея праздничная полностью

Сла́ва, и ны́не,Богоро́дичен: Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша,/ оскверне́на плотски́ми прегреше́ньми, очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Полиелей и величание:

Велича́ем тя, / Апо́столе Христо́в Андре́е, / и чтим боле́зни и труды́ твоя́, / и́миже труди́лся еси́ / во благове́стии Христо́ве.

Псалом избранный.

¹ Небеса́ пове́дают сла́ву Бо́жию, творе́ние же руку́ Его́ возвеща́ет твердь.

² Испове́дят Небеса́ чудеса́ Твоя́, Го́споди.

¹ Вме́сто оте́ц Твои́х бы́ша сы́нове Твои́.

² Поста́виши я́ кня́зи по всей земли́.

¹ Бог бого́в Госпо́дь глаго́ла и призва́ зе́млю.

² От восто́к со́лнца до за́пад хва́льно И́мя Госпо́дне.

¹ Освети́ша мо́лния Его́ вселе́нную,

² возвести́ша Небеса́ пра́вду Его́,

¹ и ви́деша вси лю́дие сла́ву Его́.

² Кня́зи Иу́довы влады́ки их.

¹ Воцари́ся Бог над язы́ки.

² Бог прославля́емь в сове́те святы́х.

¹ Ве́лий и стра́шен есть над все́ми окре́стными Его́.

² Рцы́те во язы́цех, я́ко Госпо́дь воцари́ся.

¹ Возвести́те во язы́цех сла́ву Его́, во всех лю́дех чудеса́ Его́.

² Во всю зе́млю изы́де веща́ние их,

¹ и в концы́ вселе́нныя глаго́лы их.

² Покори́ лю́ди нам и язы́ки под но́ги на́ша.

¹ Ве́лий Госпо́дь наш и ве́лия кре́пость Его́.

² Той даст си́лу и держа́ву лю́дем Свои́м: благослове́н Бог.

Сла́ва, и ны́не: Аллилу́иа, трижды.

По полиеле́и седа́лен, глас 5. Подо́бен: Собезнача́льное Сло́во:

Апо́стола вси восхва́лим я́ко самови́дца Сло́ва,/ и Боже́ственнаго пропове́дника,/ и язы́ков духо́внаго ловца́ я́ко вои́стинну,/ и́бо приведе́ ны в позна́ние Христо́во Андре́й Богоглаго́ливый,/ ве́лий и́стинно наш предста́тель,/ и ны́не мо́лится непреста́нно во е́же спасти́ ду́ши на́ша.

Сла́ва, и ны́не,Богоро́дичен: И́же на Тя наде́жды, Де́во Пречи́стая, несомне́нно иму́щих, покро́в су́щи,/ от разли́чных напа́стей, и обстоя́ний, и бед лю́тых свободи́ нас,/ моля́щи Сы́на Твоего́ со апо́столы Его́,/ и спаси́ вся, воспева́ющия Тя.

Степе́нна, 1-й антифо́н 4-го гла́са:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Проки́мен, глас 4: Во всю зе́млю изы́де веща́ние их / и в концы́ вселе́нныя глаго́лы их.

Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Други́й проки́мен: Вся́кое дыха́ние / да хва́лит Го́спода.

Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Ева́нгелие от Матфе́я, зача́ло 9 (Мф 4:18–23).

Во вре́мя о́но, ходя́ Иису́с при мо́ри Галиле́йстем, ви́де два бра́та, Си́мона глаго́лемаго Петра́, и Андре́а бра́та его́, вмета́юща мре́жи в мо́ре, бе́ста бо ры́баря. И глаго́ла и́ма: гряди́та по Мне, и сотворю́ вы ловца́ челове́ком. Она́ же а́бие оста́вльша мре́жи, по Нем идо́ста. И преше́д отту́ду, ви́де и́на два бра́та, Иа́кова Зеведе́ева, и Иоа́нна бра́та его́, в корабли́ с Зеведе́ом отце́м ею́, завязу́юща мре́жи своя́, и воззва́ я́. О́на же а́бие оста́вльша кора́бль и отца́ своего́, по Нем идо́ста. И прохожда́ше всю Галиле́ю Иису́с, учя́ на со́нмищих их и пропове́дая Ева́нгелие Ца́рствия, изцеля́я всяк неду́г и вся́ку я́зю в лю́дех.

По 50-м псалме.

Слава: Моли́твами Апо́стола Андрея, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 8: Пропове́дника ве́ры и слугу́ Сло́ва,/ Андре́я восхва́лим,/ той бо из глубины́ челове́ки уловля́ет,/ вме́сто тро́сти Крест в рука́х держа́,/ и, я́ко у́же низпуща́я си́лу,/ возво́дит ду́ши от ле́сти вра́жия/ и прино́сит Бо́гу дар благоприя́тен при́сно./ Того́, ве́рнии, в ли́це учени́к Христо́вых восхва́лим,/ да мо́лится с ни́ми,/ я́ко да ми́лостив бу́дет нам в день су́дный.

Кано́н Богоро́дицы со ирмосо́м на 6. Глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля, я́ко просла́вися.

Припе́в: Пресвята́я Богоро́дице, спаси́ нас.

Я́ко еди́на безле́тнаго Сы́на,/ в ле́те поро́ждши воплоще́нна, Всесвята́я Пречи́стая,/ вся ле́тныя стра́сти всестра́стныя моея́ души́ уврачи́.

Я́звы души́ моея́ и се́рдца ожесточе́ние,/ по́мысла омраче́ние и ума́ побежде́ние потреби́, Пречи́стая,/ я́ко сострада́тельна, Твои́ми моли́твами.