Ра́дуйся, свяще́нная главо́, / чи́стый доброде́телей до́ме, / Боже́ственнейшаго свяще́нства пра́вило, / па́стырю вели́кий, / свети́льниче светле́йший, / и́же побе́ды нося́ и́мя, / и моля́щимся ми́лостивен преклони́тель, / проница́яй к немощны́х проше́ниям, / изба́вителю гото́вейший, / храни́телю спаси́тельный / всем, ве́рою чту́щим всесла́вную па́мять твою́, / Христа́ моли́, преблаже́нне, / низпосла́ти мíру ве́лию ми́лость.
Ра́дуйся, свяще́ннейший у́ме, / Тро́ицы чи́стое обита́лище, / сто́лпе церко́вный, / ве́рных утвержде́ние, / побежда́емым по́мощь, / звездо́, я́же сия́ньми благоприя́тных твои́х моли́тв / разоря́я напа́стей же и скорбе́й тьму всегда́, / святи́телю Нико́лае, / приста́нище ти́хое, в не́же притека́юще / треволне́ньми жития́ одержи́мии спаса́ются, / Христа́ моли́ / душа́м на́шим да́ти ве́лию ми́лость.
Ра́дуйся, ре́вности Боже́ственныя испо́лнивыйся / и наведе́ния зла изба́вль непра́ведно хотя́щих умре́ти / предста́нием стра́шным и сна запреще́ньми, / исто́чниче, источа́яй в Мν́рех Нико́лае, мν́ра бога́тно / и ду́ши напоя́ющее, / смра́ды же страсте́й отгоня́ющее, / меч, пле́велы пре́лести посека́ющий, / лопа́та, развева́ющая А́риева пле́вельная уче́ния. / Христа́ моли́ / низпосла́ти душа́м на́шим ве́лию ми́лость.
Слава,
Челове́че Бо́жий и ве́рный ра́бе, / слуго́ Госпо́день, / му́жу жела́ний, / сосу́де избра́нный, / сто́лпе и утвержде́ние Це́ркве, / Ца́рствия насле́дниче, / не премолчи́, вопия́ за ны ко Го́споду.
И ныне,
Безневе́стная Де́во, / отку́ду пришла́ еси́? / Кто роди́вый Тя? / Кто и ма́ти Твоя́? / Ка́ко Зижди́теля но́сиши на руку́? / Ка́ко не растли́лася еси́ утро́бою? / О, вели́ких, пресла́вных на Тебе́ стра́шных та́инств, / на земли́ соверша́емых, зрим, Всесвята́я! / И предуготовля́ем досто́йный Тебе́ долг, / на земли́ верте́п, / и от Небе́с про́сим пода́ти звезду́, / и волсви́ же прихо́дят от восто́ков земли́ к за́падом / ви́дети челове́ческое Спасе́ние, / во я́слех пелена́ми повива́емое.
Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.
Богоро́дице Де́во:
Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.
Слава, и ныне,
В Мν́рех живы́й чу́вственне, иера́рше, / мν́ром разу́мно духо́вным яви́лся еси́ пома́зан, о́тче Нико́лае. / Те́мже мν́ры чуде́с твои́х мiр облагово́нил еси́, / мν́ро приснотеку́щее пролива́я, / мν́рными твои́ми благово́нными словесы́ и па́мятию твое́ю.
Слава: Облистава́еши на земли́ чуде́с луча́ми, Нико́лае му́дре, / и дви́жеши всяк язы́к на сла́ву же и хвалу́ на земли́ тя Просла́вльшаго, / Его́же моли́ вся́кия ну́жды изба́витися / па́мять твою́ ве́рою и любо́вию почита́ющим, отце́м избра́ние.
И ныне,
Ве́рным предста́тельствуеши, покрыва́я, соблюда́я ты́я, блаже́нне, / вся́кия ско́рби избавля́я я́ве, / иера́рхов красне́йшая сла́во и хвало́, Нико́лае преподо́бне.
