Пра́вды Строи́тель / тя, я́ко де́ву чи́сту / и я́ко сла́вну му́ченицу, / сугу́быми венцы́ благоле́пно украси́, / красе́н черто́г тебе́ дарова́в, / светоявле́ньми просвеще́нный, / иде́же все́льшися, / ве́чнующим, неве́сто Христо́ва, / ны́не блаже́нством я́ве обогати́лася еси́.
Слава и ныне,
Се вре́мя прибли́жися спасе́ния на́шего, / гото́вися, верте́пе, Де́ва приближа́ется роди́ти; / Вифлее́ме, земле́ Иу́дова, красу́йся и весели́ся, / я́ко из тебе́ возсия́ Госпо́дь наш. / Услы́шите, го́ры и хо́лми, и окре́стныя страны́ Иуде́йския, / я́ко гряде́т Христо́с, / да спасе́т, его́же созда́, челове́ка, / я́ко Человеколю́бец.
Да́ры Тебе́ принося́ще, Сы́не, / ца́рие приидо́ша восто́чнии, / царя́ Тя уве́девше роди́тися, / лива́н, и сми́рну, и зла́то, / и се́ стоя́т пред две́рьми. / Сим повели́ ви́дети Тя, Младе́нца, / на руку́ Мое́ю держи́ма, / дре́вняго Ада́ма старе́йша.
Прииди́те, вни́дите со тща́нием, / Де́ва рече́ дре́вле волхво́м, / и ви́дите Неви́димаго, / ви́дима я́вльшася и Младе́нца бы́вша. / Они́ же со усе́рдием внидо́ша, и поклони́шася, / и да́ры принесо́ша, / проро́чество Боже́ственное испо́лнивше.
Ношу́ Тя я́ко Младе́нца рука́ми, / вся́ческая нося́щаго, / и удивля́юся, глаго́лаше Неискусобра́чная: / ка́ко Тя млеко́м воспита́ю, / пита́ющаго вся, Сы́не Мой и Тво́рче Мой? / Сла́влю Твое́ безме́рное к челове́ком снизше́ствие, / и́мже спаса́еши мiр погиба́ющий.
Слава, и ныне,
Сио́не, торжеству́й, / Иерусали́ме, весели́ся, / гра́де Христа́ Бо́га, / подыми́ Зижди́теля, в верте́пе и я́слех вмеща́емаго, / отве́рзите мне врата́ / и, вшед в ня, узрю́ я́ко Младе́нца, пелена́ми, повива́емаго, / дла́нию же содержа́щаго тварь, / Его́ же пою́т А́нгели непреста́нным гла́сом, / Жизнода́вца Го́спода, / спаса́ющаго род наш.
Написова́шеся иногда́ со ста́рцем Ио́сифом, / я́ко от се́мене Дави́дова, в Вифлее́ме Мариа́м, / чревонося́щи безсе́менное Рожде́ние. / Наста́ же вре́мя рождества́, / и ме́сто ни еди́ноже бе обита́лищу, / но, я́коже кра́сная пала́та, / верте́п Цари́це показа́шеся. / Христо́с ражда́ется пре́жде па́дший воскреси́ти о́браз.
А́гница Твоя́, Иису́се, Евге́ния / зове́т ве́лиим гла́сом: / Тебе́, Женише́ мой, люблю́, / и, Тебе́ и́щущи, страда́льчествую, / и сраспина́юся, и спогреба́юся креще́нию Твоему́, / и стражду́ Тебе́ ра́ди, / я́ко да ца́рствую в Тебе́, / и умира́ю за Тя, да и живу́ с Тобо́ю, / но, я́ко же́ртву непоро́чную, приими́ мя с любо́вию поже́ршуюся Тебе́. / Тоя́ моли́твами, я́ко ми́лостив, спаси́ ду́ши на́ша.
Го́споди Бо́же мой, / рожде́ственное пе́ние и предпра́зднственную песнь Тебе́ воспою́, / рожде́нием Твои́м Боже́ственным, возрожде́ние даю́щему мне / и к пе́рвому мя благоро́дию возводя́щу.
Горе́ Тя на Престо́ле и до́ле в я́слех премíрная и земна́я разуме́вше, Спа́се мой, / дивля́хуся держа́ве Твое́й, / яви́лся еси́ бо па́че ума́, сугу́б естество́м, Богочелове́к.
Да Твоея́ сла́вы вся́ческая испо́лниши, приклони́в Небеса́, на зе́млю прише́л еси́: / я́ко бо на руно́, низше́л еси́ дождь во чре́во де́вственное, / из Нея́же ны́не роди́тися сугу́б гряде́ши, / Бог же и Челове́к.
Слава, и ныне:
О́бразы неизрече́ннаго Твоего́ воплоще́ния проявля́я, Ще́дре, / умно́жил еси́ виде́ния и проро́чествия вдохну́л еси́, / я́же, ны́не прише́д, испо́лнил еси́, / пло́тию ражда́яся из Чи́стыя Отрокови́цы во гра́де Дави́дове.
Простре́ земля́ плещи́ своя́ / и прие́млет прие́млющаго Зижди́теля сла́ву от А́нгел, / от Небе́с же звезду́, от па́стырей хвале́ние, от волхво́в же да́ры / и от всего́ мíра позна́ние.
