Видевши людие Тобольстии честную икону Божия Матере, явившую чудесное исцеление усердствовавшему написати ю, яко божественное сокровище прияша ю и яко многосветлый светильник поставиша в новом храме, ими созданном, радующеся и вопиюще к Богородице: Радуйся, светозарное Светило, страну нашу озаряющее; Радуйся, спасение душам нашим устрояющая. Радуйся, небесным светом сердца наша просвещающая; Радуйся, мир, тишину и благоденствие нам являющая. Радуйся, болящим духовно и телесно здравие подавающая; Радуйся, обидимых Своею честною ризою покрывающая. Радуйся, безнадежных известное надеяние; Радуйся, младенцев разум просвещающая. Радуйся, вдовиц и сирот Кормительнице; Радуйся, нагих одеяние и пленных избавление. Радуйся, просящим помощи скорая Помощница; Радуйся, Святая, святых большая. Радуйся, Мати Дево, всепетая христиан похвало.
Проповедницы нелестнии великого милосердия Твоего, Владычице, к людем быша вси приявшии чудесныя исцеления от святыя иконы Твоея; вси же слышавшии и видевшии благодатныя токи, изливающиеся обильно от Тебе на страждующих и бедствующих, вкупе с ними радостно воспеваху Богу: Аллилуиа!
Возсия благодать от образа Твоего, Дево Чистая, яко солнце пресветлое в пределех наших, лучами чудес, истекающих от него, град наш и вся грады и страны не точию земли сибирския, но и российския озаряющая, сего ради недоумевающе изрещи величие чудес, от иконы Твоея бывших, Богородице, во умилении сердца, верою и любовию вопием Ти: Радуйся, черною немощию одержимых исцеляющая; Радуйся, болящих очами уздравляющая. Радуйся, падучих болезней избавляющая; Радуйся, слепым зрение отверзающая. Радуйся, злыя демоны от людей отгоняющая; Радуйся, беснующимся здравие подавающая. Радуйся, разслабленных от одра воздвизающая; Радуйся, немым язык и глаголание возвращающая. Радуйся, от всех лютых недугов врачующая; Радуйся, в сониих и видениих страждущим Себя являющая. Радуйся, от всяких напастей чудесно свобождающая; Радуйся, Святая, святых большая. Радуйся, Мати Дево, всепетая христиан похвало.
Хотяй прославити святую икону Твою, Богородице Дево, Сын Твой и Бог наш Господь Иисус Христос, воочию всех излия от нея неисчерпаемое чудес море, в немже вси погружающиеся с верою и упованием приемлют благодать исцелений и, благодарящи Господа, со страхом и любовию умиленно вопиют Ему: Аллилуиа.
Новыя и преславныя чудеса благодати Твоея, Богородице, яви нам Господь, егда святая икона Твоя носима бе по градом и весям страны нашея; мнози бо верующие внезапу исцеляхуся от разнообразных неисцельных недугов, и неверные к вере обращахуся, с удивлением, умилением и любовию воспевая Тебе: Радуйся, всякие болезни исцеляющая; Радуйся, вся недуги отгоняющая. Радуйся, любовию серафимскою присногорящая; Радуйся, души и сердца наша любовию божественною воспламеняющая. Радуйся, огонь Божества в Себе вместившая; Радуйся, пламене страстей наших изменяющая. Радуйся, от огня греховнаго верующих в Тя соблюдающая: Радуйся, от огня геенскаго любящих Тя избавляющая. Радуйся, от запаления огненнаго жилища наша сохраняющая; Радуйся, света Твоего зарями мрак неведения нашего разгоняющая. Радуйся, теплая наша Заступница и усердная к Богу о нас Молитвенница; Радуйся, Святая, святых большая. Радуйся, Мати Дево, всепетая христиан похвало.
Странное видение честныя иконы Богоматери, свыше явленное с предстоящими святителем Николаем и Мариею Египетскою, разумевше, устранимся, мужие и жены, мира суетнаго, ум к небесным возводящи; сего бо ради и дадеся нам чудная икона Богородицы, да взирающе на ню, горняя мудрствуем, а не земная, вопия к Богу: Аллилуиа!
Вся еси в вышних, но и нижних не оставляешь, Богородице Дево, чудесы бо Твоими, от святыя иконы Твоея, яко от живаго и независтнаго источника, изливающимися, присно нас просвещаеши, верою к Тебе притекающих и зовущих таковая: Радуйся, нищих духом неистощимое богатство и милостей бездно; Радуйся, Мати чадолюбивая, печальных незримое утешение. Радуйся, Голубице кроткая, тихая и незлобивая; Радуйся, Горлице благогласная, ненавидимых тайное успокоение. Радуйся, грешников спасение и к Богу присвоение; Радуйся, правоверных всех твердое ограждение. Радуйся, невидимое надеющимся на Тя поможение и заступление; Радуйся, ангельский уме, присно зрящий Бога. Радуйся, светозарная звездо умнаго солнца; Радуйся, Херувимов и Серафимов славнейшая. Радуйся, Архангелов и Ангелов честнейшая; Радуйся, Святая, святых большая. Радуйся, Мати Дево, всепетая христиан похвало.
Вся страна наша богохранимая, милостями Твоими, Богомати, облагодатствованная, имея икону Твою чудотворную в щит и ограждение от врагов видимых и невидимых, незримою Твоею помощию побеждает вся супостаты своя, Богу же в радости сердца благоговейно вопиет: Аллилуиа.
