Имущи сомнение в сердцы своем болярин Иоанн о юношах, принесших образ Пречистыя Богородицы, вскоре возвратися в дом свой, хотящи паки видети их, не улучив же видети их, притек во обитель твою, вопияше тебе: Радуйся, отче, образа Богоматере хранителю; Радуйся, Пресвятыя Троицы служителю. Радуйся, недоведомыя тайны зрителю; Радуйся, чудесем, от образа бываемым, блюстителю. Радуйся, преподобных всех известная похвало; Радуйся, постников многословущая славо. Радуйся, монахов божественное правило; Радуйся, всей Галичской стране великое светило. Радуйся, ангелов собеседниче; Радуйся, святым всем сопричастниче. Радуйся, Троицы Святыя чистый служителю; Радуйся, Паисие преподобне.
Бурю внутрь имеяй многих смущений, аз многогрешный недоумеваюся, како возмогу достойно воспети твоя подвиги, преподобне, ни ктоже бо от человек нынешняго рода может я исчести, аще бы и риторски кто глаголати восхотел. Сего ради Богу, тя прославляющему, дерзающе воспеваем: Аллилуиа.
Слышавша града Галича и окрестных градов народи о принесении ангелы Пречистыя Богородицы образа во обитель твою, преподобне, стекахуся отвсюду, носяще недужныя своя, желающе получити исцеление, еже молитвами и прикосновением же пречуднаго образа получивше, отхождаху в домы своя, радующеся. Мы же, дивящеся, похвальная вопием: Радуйся, о христианстем роде теплый к Богу ходатаю; Радуйся, недужным и скорбным здравия подателю. Радуйся, яко твоими молитвами обитель твоя, яко солнце, просветися; Радуйся, яко о ней народ не точию видевый, но и слышавый возвеселися. Радуйся, яко ученицы твои душами просвещахуся; Радуйся, яко твоими чудесы телесне веселяхуся. Радуйся, яко твоими молитвами от сетей вражиих свобождаемся; Радуйся, яко от раки твоея святыя благоухания насыщаемся. Радуйся, яко прикосновением тоя же раки от болезней исцелевахуся; Радуйся, яко таковый дар от Бога приял еси. Радуйся, яко приходящим к тебе с верою неоскудно исцеление подаваеши; Радуйся, Паисие преподобне.
Боготечная звезда явился еси, преподобне, Церковь Святую, аки небо, украсил еси, образ, посланный со двема ангелома, в ней поставив, и от всех стран вернии ради моления во обитель твою стекахуся; ты же данною от Христа Бога тебе благодатию тех озарял еси, яко же чудесы, тако и учением наставляя их на путь спасения и повелевая вопити к Богу: Аллилуиа.
Видев ученик твой преподобный Иаков во обители святей созданную тобою и болярином Иоанном церковь возгоревшуся, в ней же принесенный ангелы Пречистыя Богородицы образ стояще, ревностию разжегся, и всю надежду на Самую Богоматерь и на твои молитвы возложив, разбив двери бревном и сквозе пламень в церковь вниде, и образ Богородицын изнесе, пламени же отвсюду окружающу его, образ ни чтоже пострада. Сего ради похвальная приносим ти, вопиюще: Радуйся, твердое веры основание; Радуйся, в таковых крепкое имый упование. Радуйся, такова ученика стяжавый; Радуйся, на твердем краеугольном камени того наздавый. Радуйся, яко учением своим, а не млеком сего воспита; Радуйся, яко в несомненную веру сего наказа. Радуйся, яко оба Господу угодиста; Радуйтеся, яко многи ученики своим учением воздоиста. Радуйтеся, яко многим ко спасению явистася предводители; Радуйтеся, яко и нам от волков адских бысте хранители. Радуйтеся, яко купно предстоите Святей Троице; Радуйтеся, яко Царю небесе и земли о нас молитеся. Радуйся, Паисие преподобне.
Проповеданную ангелы принесением честнаго образа Пречистыя Богородицы милость, хотящую быти роду христианскому, возобновиша вернии, и на созидание новыю церкве от имений своих подаяху кийждо по силе своей. Ты же, преподобне, оным подаянием новую церковь вскоре воздвигл еси и к содействующему сия Богу возопил еси: Аллилуиа.
Возсия во обители новосозданная церковь, аки второе солнце на небеснем крузе, народи же, видевше сие, радовахуся и, любовию притекающе, от неистощимаго источника целеб образа Пресвятые Богородицы дары приемлюще и восхваляюще тя, сице вопияху: Радуйся, добрый винограда Христова строителю; Радуйся, стада Его хранителю. Радуйся, всем верным во спасение учителю; Радуйся, тем же до Царствия Небеснаго предводителю. Радуйся, незлобивых стада Христова овец во едино совокупителю; Радуйся, злосмрадных козлищ от стада Христова прогонителю. Радуйся, молитвенниче о нас к Богу теплый; Радуйся, ходатаю к Богородице о нас скорый. Радуйся, яко тобою дерзновение в молитве к Богородице имеем; Радуйся, яко тобою вся полезная от Бога приемлем. Радуйся, скорый наш помощниче; Радуйся, готовый наш заступниче. Радуйся, Паисие преподобне.
Хотящу великому князю Московскому Василию пленити удел князя Георгиа, пришед в страны Галичския настольный дяди своего град Галич, тогда же взя и чудотворный образ, его же принесоша ангели, и отнесе его в свой настольный град Москву, и аки пленницу заключи, преслушав моление твое, преподобне; ты же, надеявся несомненно, яко паки образ к вам во обитель возвратится, пел еси Богу песнь ангельскую: Аллилуиа.
