Му́дрости вмести́лище па́че ума́ мирски́х мудреце́в яви́лася еси́, отрокови́це непоро́чная, измла́да уклони́вшися от любве́ к ми́ру и отве́ргшися всего́, я́же в ми́ре, все́ю полното́ю любве́ твоея́ возлюби́ла еси́ Небе́снаго Жениха́ Христа́, Царя́ Сла́вы, Ему́же, я́ко ве́рная раба́, в житии́ твое́м апо́стольски послужи́ла еси́, жи́вши свя́то среди́ неве́рных и безбоя́зненно пропове́давши им Христа́ Бо́га. Таково́му твоему́ ра́зуму дивя́щеся, сия́ похвалы́ тебе́ воспису́ем:
Ра́дуйся, прему́драя Ева́нгельская де́во, во све́те ве́ры и дел благи́х ходи́вшая; ра́дуйся, Христа́ Го́спода, Бо́жию си́лу и Бо́жию прему́дрость па́че всего́ возлюби́вшая.
Ра́дуйся, па́че мудреце́в ми́ра сего́ мудре́йшая; ра́дуйся, па́че ста́рец идолослужи́тельных разу́мнейшая.
Ра́дуйся, неве́рных све́том ве́ры просвеща́ющая; ра́дуйся, чад Це́ркве Христо́вы в ве́ре утвержда́ющая.
Ра́дуйся, любо́вию твое́ю ко Христу́ а́нгельская ликостоя́ния возвеселя́ющая; ра́дуйся, де́монския лука́вствия ору́жием Креста́ Госпо́дня отгоня́ющая.
Ра́дуйся, в пропове́дании ве́ры богоглаго́ливая уста́ апо́стольская; ра́дуйся, дев христиа́нских украше́ние.
Ра́дуйся, ве́рная ко Христу́ Бо́гу моли́твеннице о на́шем спасе́нии; ра́дуйся, всех скорбя́щих кре́пкое заступле́ние и огражде́ние.
Ра́дуйся, Параске́во, неве́сто Христо́ва всехва́льная.
Си́лою Христо́вою соблюда́ема, всесла́вная му́ченице Параске́во, о боле́знех теле́сных небрегла́ еси́, по́двигом до́брым подвиза́тися хотя́щи. Му́жеским смы́слом вооружи́вшися, сла́бость же́нскую отве́ргла еси́, упова́нием же укрепи́вшися, ра́достно предста́ла еси́ на суди́ще, иде́же я́сно ве́ру в Тро́ицу Боже́ственную пропове́дала еси́, Бо́гу вопию́щи: Аллилу́иа.
Слы́шав от тебе́, му́драя дщерь, непра́ведный судия́ неслы́ханная словеса́ о твое́м рожде́нии, я́ко благочести́вии роди́тели твои́, стра́сти Христо́вы почита́юще, знамени́таго дне тезоимени́ту тя нареко́ша, Параске́вою, в предзнаменова́ние, я́ко Христо́вых страсте́й и́маши бы́ти прича́стницею. Не ра́зуме же сего́ нечести́вый иге́мон, но веща́ше ти безсту́дная словеса́ и повеле́ би́ти тя суро́выми жи́лами и полуме́ртву тя су́щу вве́ргнути в темни́цу. Ты же, до́блественне претерпе́вши жесточа́йшия му́ки, в темни́це, а́ки в черто́зе све́тле лику́ющи, вопия́ла еси́: «Никогда́же отлучу́ся Тебе́, Го́споди, но посли́ ми по́мощь Твою́ и спаси́ мя вели́кия ра́ди Твоея́ ми́лости». Те́мже, ублажа́юще тя, вопие́м ти такова́я:
Ра́дуйся, незло́бивая голуби́це, от искуше́ний лука́ваго врага́ свободи́вшаяся; ра́дуйся, слове́сная а́гнице, от зла́го во́лка мучи́теля к до́брому Па́стырю Христу́ Бо́гу прибе́гшая.
Ра́дуйся, во двор слове́сных ове́ц, одесну́ю Его́ стоя́щих, вше́дшая; ра́дуйся, на брак А́гнчий ра́достно теку́щая.
Ра́дуйся, я́ко тебе́ угото́вано есть благ ве́чных сокро́вище; ра́дуйся, я́ко тебе́ обетова́но есть блаже́нство Ца́рства Небе́снаго.
Ра́дуйся, прему́драя Ева́нгельская де́во, све́тло горя́щий свети́льник иму́щая; ра́дуйся, дерзнове́ние ве́лие ко Христу́ Бо́гу стяжа́вшая.
Ра́дуйся, во́лею свое́ю благо́е и́го Христо́во на ся подъя́вшая; ра́дуйся, се́рдце свое́ от вся́кия ле́сти душевре́дныя чи́сто сохра́ншая.
Ра́дуйся, и́стинная Христо́вых страсте́й прича́стнице; ра́дуйся, во страда́ниях твои́х благода́тную по́мощь от Христа́ Го́спода получи́вшая.
Ра́дуйся, Параске́во, неве́сто Христо́ва всехва́льная.
Бу́рю тя́жких искуше́ний воздвиго́ша врази́ проти́ву тебе́, многострада́льная Параске́во; ты же от твои́х крове́й трудолю́бно ча́шу страда́ний испила́ еси́, жела́ющи по Христе́, Женисе́ твое́м, во след потещи́, прехва́льная му́ченице, и я́ко ла́стовица доброгла́сная, песнь воспева́ла еси́ Христу́ Бо́гу: Аллилу́иа.
Име́я всегда́ пред оча́ми свои́ми Го́спода, за испове́дание ве́ры па́лицами неми́лостивно от мучи́телей бие́ма, ра́довалася еси́, приснопа́мятная му́ченице Параске́во, вопию́щи: «Ничто́же мя разлучи́т от любве́ Твоея́, Христе́», и та́ко подвиза́яся во Сла́ву Бо́жию, угоди́ла еси́ Го́споду. Те́мже, помина́юще честна́я твоя́ страда́ния, с умиле́нием зове́м ти:
Ра́дуйся, а́гнице вседо́бляя, Пастыренача́льнику Христу́ прине́сшаяся, я́ко же́ртва благоуха́нная; ра́дуйся, безсме́ртному Жениху́ Христу́ непоро́чное муче́ние твое́, я́ко ве́но пречестно́е, предста́вившая.
Ра́дуйся, отрокови́це чи́стая, и́стинное испове́дание ве́ры Правосла́вныя пред неве́рными яви́вшая; ра́дуйся, пра́ведная обличи́тельнице, непра́вду нечести́ваго судии́ я́ве откры́вшая.
Ра́дуйся, я́ко тобо́ю посрами́ся лука́вый враг, ви́дящь себе́ от ю́ной де́вы побежде́нна; ра́дуйся, я́ко ра́дуются о тебе́ и си́лы небе́сныя, ви́дяще тя не́мощну и мла́ду су́щу, побежда́ющую лю́тых мучи́телей.
Ра́дуйся, голуби́це чи́стая и непоро́чная се́рдцем; ра́дуйся, смире́нная а́гнице, благоуспе́шно честне́й и блаже́нней стра́сти Госпо́дней уподо́бльшаяся.
Ра́дуйся, я́ко принесла́ся еси́ Зижди́телю твоему́, я́ко кади́ло благово́нное; ра́дуйся, я́ко зрит на тя пресве́тлое Со́лнце пра́вды, тридне́вно возсия́вшее от гро́ба и укрепи́вшее тя к по́двигу страда́льческому.
