Радуйся, Сыну Божию плоть заимодавшая.
Радуйся, Бога с человеки соединившая.
Радуйся, паче всех святых миру благодеющая.
Радуйся, благодатию Божиею и нас освящающая.
Радуйся, земли Российския Заступнице, вразумляющая нас и на путь спасения наставляющая.
Силу и величие Твое, Богомати, мир весь проповедует, славит Тя наипаче страна Российская немолчно, ликуют обители и храмы святии, святителей лик воспевает Тя присно, монаси и мирстии к иконе Твоей припадают и хор земнородных согласно взывает: не забуди всех нас, Всепетая Дево, мир мирови даруй и в скорби обрадуй, всем радость пошли и воплю нашему вонми, да с небожительми купно воззовем вси Небесному Богу: Аллилуиа.
Имея промышление о людех земли Российския, благоволила еси, Владычице, устроити в веси Балыкинской храм яко тихое пристанище страждущим в мире сем и посвятити оный имени вернаго служителя Святыя Троицы, теплаго молитвенника Христова святителя Николая, и даровала ему яко щит и ограждение святую икону Свою, да вси утружденнии скорбию и бурями житейскими прибегают к цельбоносному образу сему, яко к Самей Тебе сущей, вознося благохваления сицевая:
Радуйся, купино, законоположником предзримая.
Радуйся, столпе огненный, наставляяй сущия во тьме.
Радуйся, лествице, досязающая до небес, еюже сниде Бог.
Радуйся, мосте, преводяй сущих от земли к небеси.
Радуйся, отчаянных из глубины зол исхищающая.
Радуйся, молние, души просвещающая.
Радуйся, верных смыслы озаряющая.
Радуйся, звездо, путь нам во тьме указующая.
Радуйся, земли Российския Заступнице, вразумляющая нас и на путь спасения наставляющая.
Бурю внутрь имея помышлений сумнительных, Тимофей Дульский смятеся, зря родом его святочтимую икону Богоматере, источившую слезы в день брани свейския, страхом бысть одержим и с молитвою слезоточаще обеща отдати икону Твою, Владычице, в новозданный храм; исполнь же волю Пречистыя, с радостию возопи: Аллилуиа.
Слыша Елисавет целование Твое, пришедшей убо Тебе во град Иудов, и исполнися Духа Святаго и возопи гласом велиим и рече: "Откуду мне сие, да прииде Мати Господа моего ко мне?" О, Пречистая Дево, посети и нас, немощных и убогих, и вознеси воздыхания наша, яко дым кадильный, ко Престолу Всевышняго, да от полноты благодарнаго сердца поем Тебе сице:
Радуйся, одушевленный Престоле Вседержителя.
Радуйся, чертоже безсеменнаго уневещения.
Радуйся, праведным душам утверждение.
Радуйся, Ангельским чином славо и поклонение.
Радуйся, источниче жизни и безсмертия.
Радуйся, заре таинственнаго дне.
Радуйся, яко Тобою душам нашим утешение получаем.
Радуйся, яко во успении Твоем залог безсмертия обретаем.
Радуйся, земли Российския Заступнице, вразумляющая нас и на путь спасения наставляющая.
Боготечная звезда явися икона Твоя, Богомати, всю страну нашу озаряющи и сущих во тьме невежествия светом боговедения просвещающи, скорбящих радостию осиявающи, заблуждших же на путь делания заповедей Сына Твоего и Бога наставляющи. Ему же благодарственне вопием: Аллилуиа.
Видяще, яко возсияла еси в пречестней иконе Твоей, Дево Богородице, свет спасения всем, блуждающим во тьме грехов и страстей, и сию цельбоносную икону даровала еси храму сему и веси сей, молимся пред нею с верою: скорую помощь Твою подаждь вопиющим Ти таковая:
Радуйся, Мати Божия, прошения болящих приемлющая.
Радуйся, Целительнице, недуги благодатию исцеляющая.
Радуйся, Всемилостивая, спасение от Бога являющая.
Радуйся, Всещедрая, Своими щедротами нас одаряющая.
Радуйся, младенцев охранение.
Радуйся, юных наставление.
Радуйся, в разуме нас просвещающая.
Радуйся, гордыню и самомнение от нас отгоняющая.
Радуйся, земли Российския Заступнице, вразумляющая нас и на путь спасения наставляющая.
Проповедь любве, кротости и всепрощения мирови возвещающая, со Христом Сыном Твоим вся горести земныя претерпевшая, апостола Иоанна и с ним весь род христианский Своему материнскому сердцу усыновившая, Приснодево Пренепорочная, не отвержи и нас, во тьме грехов сущих и утешения материнскаго требующих, да с благодарением Господу зовем: Аллилуиа.
Возсиявшу свету богопознания явлением иконы Твоея Балыкинския, свет веры возжещи благоволила еси, Богомати, в земли Северстей во дни нашествия свейскаго, да вси людие. избавленнии Тобою от скорби, пленения и смерти, непрестанно вопиют Ти:
Радуйся, радосте наша безконечная.
Радуйся, светлая отрадо сердечная.
Радуйся, странным прибежище.
Радуйся, сирым приятелище.
Радуйся, печалей наших утоление.
Радуйся, в скорбех наше утешение.
Радуйся, обидимым Покровительнице.
Радуйся, от пленения и смерти избавительнице.
Радуйся, земли Российския Заступнице, вразумляющая нас и на путь спасения наставляющая.
Хотя отъити от града Чернигова в пределы Сибирстии святитель чудный Иоанн Тобольский дарова пречестную икону Твою, именуемую Балыкинская, сестрам новосозданныя обители Орловския, да почиет на ней благословение Царицы Небесныя, Ей же и обитель та посвящена бысть. Они же приимше чудоточный дар дивнаго святителя, образу Твоему с любовию поклонишася, Богу же воспеша: Аллилуиа.
