Хотящи чадом моим вечнаго спасения, со слезами предстою пред честною Твоею иконою, Владычице, да не презриши моления моего и мене, к Сыну Твоему взывающия: Аллилуиа.
Дивными и неизследимыми судьбами Сына Твоего привлецы чада моя милостивною рукою под Свой благодатный покров, да со усердием зову Ти:
Воспитай чада моя ищуща прежде Царствия Божия и правды Его; воспитай чада моя, да обрящут безценную жемчужину и оставят прочая.
Воспитай чада моя, да в мори житейстем не останутся кроме окормления; воспитай чада моя, во еже быти им в малем числе избранных Твоих.
Воспитай чада моя на всяком месте творяща волю Отца Небеснаго; воспитай чада моя, да последуют стопам Сына Божия.
Воспитай чада моя не глаголюща, ниже помышляюща хулы на Духа Святаго; воспитай чада моя, во еже чтити им Тя, рождшую Спаса душ наших.
Воспитай, Владычице, чада моя достойна Небеснаго Царствия и наследники вечных благ сотвори я.
Странствующа в юдоли сей земней и многомятежней, чада моя где обретут отраду и утешение, аще не в Тебе, Пречистая? Спутешествуй же им и настави их на путь истинный, да зовут Богу: Аллилуиа.
Всем еси Мати милующая Ты, Владычице, и хощу, да пребудеши Таковая и чадом моим. Се, вручаю их Тебе и, воспомянувши милости Твоя пребогатыя, во смирении молю Тя:
Воспитай чада моя во умилении младенчестем, яко таковых есть Царствие Божие; воспитай чада моя, да будут меньша всех, обаче велика пред Богом.
Воспитай чада моя милосердна, якоже милосерд Отец наш Небесный; воспитай чада моя, да памятуют, яко Той и грешныя милует.
Воспитай чада моя любяща и молящася о вразех своих; воспитай чада моя гнушающася врагов Божиих.
Воспитай чада моя верны сыны Отечества земнаго; воспитай чада моя благонадежны гражданы Царства Небеснаго.
Воспитай, Владычице, чада моя достойна Небеснаго Царствия и наследники вечных благ сотвори я.
Всякаго добра души и сердца их исполняющи, отжени от них духа злосмраднаго безбожия, подающи от щедрот Твоих всем и коемуждо по потребе, да зовут Богу: Аллилуиа.
Витий суемудренных общения, глаголющих лжу на Твое всемощное заступление, избави их и призри на мя, верно вопиющую:
Воспитай чада моя зело противящася безбожником; воспитай чада моя крепко стояща противу богоненавистных учений.
Воспитай чада моя не приемлюща духа сынов противления; воспитай чада моя бодрствующа и молящася, да не впадут во искушение.
Воспитай чада моя бегающа утех мирских и прелести мира сего; воспитай чада моя уклоняющася от зла и творяща благо.
Воспитай чада моя имеюща уши отверста, во еже слышати глас Божий; воспитай чада моя соблюдающа Слово Божие, причастники блаженства райскаго их содевающи.
Воспитай, Владычице, чада моя достойна Небеснаго Царствия и наследники вечных благ сотвори я.
Спасти хотя мир, Сын Твой сниде с Небесе призвати не праведныя, но грешныя на покаяние. Сего ради моли Сына Твоего о чадех моих, да спасенная Тобою, воззовут Богу: Аллилуиа.
Стена несокрушимая буди, Царице Небесная, чадом моим, да под Твоим благодатным покровом возмогут содеяти множество благих дел, сего ради зову Ти сице:
Воспитай чада моя в чистоте непорочней; воспитай чада моя ведуща творити волю Сына Твоего.
Воспитай чада моя ненавидяща грех и всякое беззаконие; воспитай чада моя любяща добро и всяческую добродетель.
Воспитай чада моя служаща Богу нашему в послушании и целомудрии; воспитай чада моя обращающа в бедах очеса своя к Твоему милосердию.
Воспитай чада моя, яко скорая Помощница еси всем с верою к Тебе притекающим; воспитай чада моя, яко не имам иныя помощи, ни иныя надежды.
Воспитай, Владычице, чада моя достойна Небеснаго Царствия и наследники вечных благ сотвори я.
Пети Твое необоримое заступление выну сподоби чада моя, Владычице, и Твоею благодатию отверзи уста их вопияти Богу: Аллилуиа.
Светоприемную свещу свыше, истаявающую день и нощь от любве к Тебе и Сыну Твоему и ближнему, живот их сотвори и не презри мене, зовущую Ти:
Воспитай чада моя выну взирающа на Крест и страдания Спасителя нашего; воспитай чада моя имеюща очи видети страждущих окрест себе.
Воспитай чада моя, да памятуют слова апостола: Друг друга тяготы носите; воспитай чада моя, да будут якоже милосердный самарянин.
Воспитай чада моя труждающася в винограднице, яко добрии раби; воспитай чада моя в чаянии пришествия Сына Твоего.
Воспитай чада моя в непрестанней молитве и трезвении; воспитай чада моя выну предстояща Тебе в благоговении.
Воспитай, Владычице, чада моя достойна Небеснаго Царствия и наследники вечных благ сотвори я.
Благодатию неизреченною Духа Святаго напитай сердца чад моих, во еже возлюбити им Сына Твоего и Бога нашего и Тебе, Преблагая, да зовут Царю всяческих: Аллилуиа.
Воспевающи милосердие Твое, имже милуеши и питаеши чада моя, вопию Ти, да не престанеши молити о них Сына Твоего, верую бо: вся Ты можеши, и да исполниши моления моя таковая:
Воспитай чада моя исполнена Духа Святаго; воспитай чада моя Того благодатию твердо на вернем пути пребывающа.
