Возбранной Воеводе и Матери Света, Госпоже Царице и Владычице, благодарственное пение умиленною душею приносим раби Твои, Богородице. Тя бо Всеблагую дарова нам Христос Бог, яко всемощную Заступницу града и страны нашея; Ты же, яко имущая милосердие неизреченное, предивно земли Полтавстей цельбоносную икону явила еси. Мы же, грешнии, толикия знамения чудес, от нея являемыя, зряще, молим Тя, Всепетая: не посрами любовию прибегающих ко всечестному покрову Твоему, да избавльшеся Тобою от всех зол и бед, со слезами и умилением зовем Ти: Радуйся, теплая к Богу Молитвеннице и Утешительнице, всеми оставленных Мати милосердная.
Архангели и Ангели, многоочитии Херувими и шестокрилатии Серафими и вси небеснии силы, зряще дивное знамение милости Божией, дарованное земли и граду нашему в новоявленней и цельбоносней иконе Твоей, Владычице, со страхом и трепетом воспевают Тя, благоуханный Храме Святаго Духа, одушевленный Кивоте Божий. Мы же, грешнии и недостойнии, вседрагую икону Твою, яко дар благодатный нам, земнородным, приемлюще, преклоняем колена пред величеством Твоим, Богородице, и со слезами и трепетом восхваляем Тя сице:
Радуйся, лучезарный Свете, благодатию Своею всех верных освещающий;
Радуйся, Покрове радости, всечестную икону Твою яко облак над нами распростершая.
Радуйся, тою знамение новое милости Божией в церкви Полтавстей явившая;
Радуйся, в видимом образе невидимую благодать излившая.
Радуйся, яко в пречудней иконе Твоей Тя, яко живу сущу с нами ублажаем;
Радуйся, яко пред иконою Первообразным умиленно покланяемся.
Радуйся, теплая к Богу Молитвеннице и Утешительнице, всеми оставленных Мати милосердная.
Видяще пречудную икону Твою, небесе и земли Царице, в травнем злаце долу лежащу, и пречистую ланиту Твою на ней косою прободену, и слезу из предивных очес Твоих истекшую, боголюбивый муж веси Горбаневския ужасом многим содрагашеся, и пад на землю, со страхом и верою припаде ко святому образу, хвалу Тебе принося, ибо милостивно восхотела еси в видимом образе Твоем невидимую силу благодати и Матернего попечения явити земли и граду нашему, и всем радующимся о Тебе и Богу воспевающим: Аллилуиа.
Разум богопросвещен имея муж оный, с молитвою и трепетом прият на руце дивную икону Твою, Богородице, и принесе ю в дом свой; верова бо, яко с образом сим благодать Твоя и сила и врачевство сему миру духовное. Сего ради проповеда окрест всем людем о новоявленнем сокровищи, да не сокрыт будет сей источник чудес и благодати исцелений. Мы же с верою и благоговением притекающе к нему и духовную жажду утоляюще, славословити Тя дерзаем:
Радуйся, Преблагословенная, в травнем злаце икону Твою святую мужу благоговейному явившая;
Радуйся, светоносная Палато, аки солнечными лучами благодати тую озарившая.
Радуйся, Красото пресветлая, язву на лице иконы Твоея приемшая;
Радуйся, Всемилостивая, слезу благодатную от нея дивно источившая.
Радуйся, вселенныя Похвало, во граде нашем обиталище Себе на земли устроившая;
Радуйся, благостыни Бездно, землю нашу чудесы великими прославившая.
Радуйся, теплая к Богу Молитвеннице и Утешительнице, всеми оставленных Мати милосердная.
Силу Божию познавше чрез явленную цельбоносную икону Твою, Пресвятая Дево, православнии людие восхотеша дарми послужити Тебе, Всепетая; сего ради вместо кущи малыя, в нейже первее всечестная икона Твоя водворена бысть, воздвигоша Тебе в веси Горбаневстей честный храм во славу всехвального Рождества Твоего. Зряще же, яко икона Твоя, Владычице, дивно прославляется в нем Господом, исповедаша Тя, яко в молитвах бодрую, и яко неисчерпаемое море милостей и щедрот, и скорое услышание в бедах всех, радостно воспевающих Богу: Аллилуиа.
Имуще благоутробное попечение о градех и весех Полтавских, осияла еси лучами благодати Твоея, Владычице, всех верных, со слезами и умилением к Тебе притекающих и исцеление недугов своих чрез дивную икону Твою приемлющих. Тии же благодарни суще, попечением иерея Божия Евтихия воздвигоша Тебе в веси Горбаневстей новый храм каменный, в немже Ты, Кивоте святыни небесныя, новое земное жилище восприяла еси. Вси же вернии, притекающии к сему дому молитвы, воспеша Тя, Чистая, сице глаголюще:
Радуйся, Богоневесто прекрасная, земли Полтавския Покрове и ограждение;
Радуйся, Таиннице Божественная, храмов наших благословение и утверждение.
Радуйся, Очистилище миру, образ Твой честный во освящение и утешение нам даровавшая;
Радуйся, небесный Престоле, боголепный храм аки жертву Ти угодну приимшая.
Радуйся, Ангелами на небесех присно славимая;
Радуйся, Предстательнице наша пред Богом, милосердия двери нам отверзающая.
Радуйся, теплая к Богу Молитвеннице и Утешительнице, всеми оставленных Мати милосердная.
