Взбранной Воеводе Владычице нашей Богородице, милостиво икону Свою пречудную нам даровавшей и вся верныя чада Церкве просветившей, благодарственное приносим пение. Ты же, о Царице небесе и земли, Сына Твоего о нас умоли и от всяких бед избави, да с радостию зовем Ти: Радуйся, Мати Молебнице, Милостивая о нас пред Богом Предстательнице.
Ангел множество и вся Силы Небесныя Тебе, честнейшую Херувим и славнейшую без сравнения Серафим, небесными гласы непрестанно величают. Мы же, грешнии, ангельстей песни подражати дерзающе, со умилением поем Ти:
Радуйся, Еюже радость возсияет.
Радуйся, Еюже клятва изчезнет.
Радуйся, падшаго Адама воззвание.
Радуйся, слез Евиных избавление.
Радуйся, высото неудобовосходимая человеческими помыслы.
Радуйся, глубино неудобозримая и ангельскима очима.
Радуйся, яко еси Царево седалище.
Радуйся, яко носиши Носящаго вся.
Радуйся, Звездо, являющая Солнце.
Радуйся, утробо Божественнаго воплощения.
Радуйся, Еюже обновляется тварь.
Радуйся, Еюже покланяемся Творцу.
Радуйся, Мати Молебнице, Милостивая о нас пред Богом Предстательнице.
Видяще Твое милосердие неизреченное, Всемилостивая Владычице, всем верно молящимся Тебе преизобильно являемое, и многая и дивная чудеса Тобою чрез святыя иконы Твоя творимая, величаем Тя, возвеличившую род наш Твоим благоволением, и с любовию покланяемся пречистаго лика Твоего изображению, зовуще Сыну Твоему и Богу нашему: Аллилуиа.
Разумом от Бога свыше просвещеннии, на чудотворный лик Твой взирающе, Царице Небесная, разумеем, яко дарова Тя Господь всем страждущим во избавление от бед: Ты бо с верою и упованием к Тебе прибегающим простираеши руку помощи, Владычице. Сего ради дивное заступление Твое о роде человечестем восхваляюще, радостно вопием Ти:
Радуйся, совета неизреченнаго Таиннице.
Радуйся, молчания просящих веро.
Радуйся, чудес Христовых начало.
Радуйся, велений Его главизно.
Радуйся, лествице небесная, Еюже сниде Бог.
Радуйся, мосте, преводяй сущих от земли на небо.
Радуйся, Ангелов многословущее чудо.
Радуйся, бесов многоплачевное поражение.
Радуйся, Свет неизреченно родившая.
Радуйся, еже како, ни единаго же научившая.
Радуйся, премудрых превосходящая разум.
Радуйся, верных озаряющая смыслы.
Радуйся, Мати Молебнице, Милостивая о нас пред Богом Предстательнице.
Сила Вышняго осени Тя, Пречистая, егда Архангелу Гавриилу, безсеменное зачатие Ти благовествующу, со смирением «Се, Раба Господня», - рекла еси, Богу же из глубины сердечныя вопия: Аллилуиа.
Имущи Тя, Мати Божия, Премилосердную Ходатаицу за нас, пред возлюбленным Сыном Твоим и Богом нашим непрестанно молитвы Своя возносящую, с благодарением ко образу Твоему прибегаем и Тебе, яко источнику радости приснотекущия, вопием:
Радуйся, отрасли неувядаемыя розго.
Радуйся, Плода безсмертнаго стяжание.
Радуйся, Делателя делающая Человеколюбца.
Радуйся, Садителя жизни нашея рождшая.
Радуйся, ниво, растящая гобзование щедрот.
Радуйся, трапезо, носящая обилие очищения.
Радуйся, яко рай пищный процветаеши.
Радуйся, яко пристанище душам готовиши.
Радуйся, приятное молитвы кадило.
Радуйся, всего мира очищение.
Радуйся, Божие к смертным благоволение.
Радуйся, смертных к Богу дерзновение.
Радуйся, Мати Молебнице, Милостивая о нас пред Богом Предстательнице.
Бури житейския избегающи, под осенение иконы Твоея, Преблагая Владычице, вернии притекают и мольбы своя пред тою возносят, получивше же благодатное утешение от Тебе, восхваляют матерния щедроты Твоя, поя о Тебе Богу: Аллилуиа.
Слышавше о чудесех Твоих, Преблагословенная, от икон Твоих бываемая, просим Тя, Дево Богородице: умоли Сына Твоего и Бога нашего, да укрепит нас творити волю Его, да поможет нам во всех трудех наших, да исцелит нас от страстей и уврачует греховныя язвы душ и телес наших, да благодаряще Господа, воспеваем Ти сице:
Радуйся, Агнца и Пастыря Мати.
Радуйся, дворе словесных овец.
Радуйся, невидимых врагов мучение.
Радуйся, райских дверей отверзение.
Радуйся, яко небесная срадуются земным.
Радуйся, яко земная сликовствуют небесным.
Радуйся, апостолов немолчная уста.
Радуйся, страстотерпцев непобедимая дерзосте.
Радуйся, твердое веры утверждение.
Радуйся, светлое благодати познание.
Радуйся, Еюже обнажися ад.
Радуйся, Еюже облекохомся славою.
Радуйся, Мати Молебнице, Милостивая о нас пред Богом Предстательнице.
Боготечная звезда явися икона Твоя «Мати Молебница», путь спасения верным указующая и сущих в болезнех и печалех радостию осиявающая; на нюже взирающе, Тебе, истинней Матери Божией, с любовию покланяемся и за вся милости и щедроты Твоя благодарение возносим, Богу вопия: Аллилуиа.
Видевше богатыя и неисчетныя милости Твоя, Пресвятая Дево, вси вернии Тебе Материю своею величают: Ты бо еси воистину любвеобильная и сердобольная о всех нас Предстательница пред Престолом Живоначальныя Троицы. Сего ради приими от нас похвалы сия:
Радуйся, Звезды незаходимыя Мати.
Радуйся, заре таинственнаго дне.
Радуйся, прелести пещь угасившая.
Радуйся, Троицы таинники просвещающая.
Радуйся, мучителя безчеловечнаго изметающая от начальства.
