Любви́ несть, пра́вда исчезе́, ложь и вражда́, гнев и не́нависть посе́яны в се́рдце людско́е. Брат возстае́т на бра́та, ча́да на роди́телей и роди́тели на ча́да. О, Милосе́рдый Бо́же! Кто оскверни́ ди́вную жа́тву Твою́, кто все́я среди́ пшени́цы пле́велы и волчцы́? Гнев Твой пра́веден, уже́ и секи́ра при ко́рне, но се к Тебе́ припа́дает Ма́терь Твоя́, усе́рдная Засту́пница ми́ра. О, велича́йшая Любве́ и благоуха́ннейшее се́рдце! Отврати́ от нас гнев Бо́жий, за грехи́ на́ша пра́ведно на нас дви́жимый; укрепи́ лю́бящия нас, да не поколе́блет их ни гоне́ние, ни вре́мя лю́тое; вразуми́ ненави́дящих нас и творя́щих нам напа́сть; прости́ враго́в на́ших, не ве́дущих что творя́т, смягчи́ гне́вное се́рдце их и озари́ их мрак све́том любви́ Христо́вой, а зло́бу и не́нависть их претвори́ в стыд и раска́яние. О, Цве́те благоуха́нный! Сосу́ды на́ши пу́сты, еле́я до́брых дел несть у нас и свети́льники ве́ры на́шея от бу́ри жите́йской угаса́ют. Умилосе́рдися же над на́ми, напо́лни сердца́ на́ша весе́лием чи́стых ра́достей, духо́вно обнови́ нас, да благода́рными уста́ми непреста́нно с умиле́нием пое́м Бо́гу: Аллилу́иа.
Весь быв в ни́жних и Вы́шних ника́коже не отступа́ешии, Боже́ственный Учи́телю: боля́щия исцеля́ешии, ме́ртвыя воскреша́ешии, прокаже́нныя очища́ешии, весь мир наполня́ющи любо́вию, кро́ткий Страда́льче! Се ви́сиши, пригвожде́нный ко Кресту́ среди́ злоде́ев, и вси лю́дие, стоя́ще, руга́хуся над Тобо́ю и с ни́ми кня́зи и во́ины. А Ты, о ско́рбная Ма́ти, пони́кла главо́ю у Креста́ Сы́на Твоего́, и ору́жие про́йде Твое́ Ма́тернее се́рдце. Мы же, почита́я ско́рби Матери́нскаго сердца́ Твоего́, из глубины́ ду́ши вопие́м Ти си́це:
Ра́дуйся, сладча́йшая Де́во Мари́е, я́ко печа́ль Твоя́ в ра́дость бу́дет и ра́дости сия́ никто́же во́змет от Тебе́; ра́дуйся, велича́йшия му́ки позна́вшая, зря Сы́на Твоего́ кро́вию истека́юща на Кресте́, уничиже́на, распя́та, оплева́на.
Ра́дуйся, я́ко Цари́цей ми́ра нарече́шися и возся́деши одесну́ю престо́ла Сы́на Твоего́ и Бо́га, Го́спода на́шего Иису́са Христа́; ра́дуйся, я́ко в ско́рби сердца́ Твоего́ Ты скорбь всего́ ми́ра и грехи́ всех челове́ков омы́ла еси́ слеза́ми.
Ра́дуйся, Кро́ткая, Сын Твой воскре́снет, попра́в жа́ло сме́рти, и Свет воскресе́ния Его́ возсия́ет во ве́ки; ра́дуйся, Богоро́дице, небе́сный о́бразе чистоты́ и бла́гости.
Ра́дуйся, Ма́ти Бо́жия, Цве́те Неувядаемый.
Та́ко возлюби́ Бог мир, что Сы́на Своего́ Единоро́днаго дал, да всяк ве́рующий в Него́ не поги́бнет, то и́мать жизнь ве́чную. И се неблагода́рные и злонра́вные лю́ди я́ко злоде́я пригвозди́ша Его́ ко Кресту́. Мы же зря́ще такова́я, у́жасом объя́ти бы́вше вопие́м: Бо́же, ми́лостив бу́ди нам гре́шным! За на́ши бо прегреше́ния те́рпиши стра́шныя му́ки. О, Ско́рбная Ма́ти, не отврати́ лица́ Твоего́ от нас, разорви́ у́зы на́ша грехо́вныя, очи́сти на́ша сердца́ от страсте́й и по́хотей лука́вых, да в горе́нии духо́внем, я́ко свеща́ покая́ния, возжже́мся пред Кресто́м Боже́ственнаго Твоего́ Сы́на, непреста́нно моля́ с благоразу́мным разбо́йником: Помяни́ нас, Го́споди, во Ца́рствии Твое́м! Моли́твами Твои́ми, Богоро́дице, испра́ви стопы́ на́ша к де́ланию за́поведей Госпо́дних, омы́й нас от греха́, соде́лай лу́чшими, подыми́ к лучеза́рному Незаходи́мому Све́ту, да зове́м Бо́гу: Аллилу́иа.
Соверши́шася! О́тче, в ру́це Твои́ предаю́ Дух Мой. О, Пречи́стая Ма́ти! Слы́шиши ли, я́ко земля́ от печа́ли содрога́ется, грудь ея́ распада́ется, гро́бы отверза́ются, ме́ртвыя возстаю́т и церко́вная заве́са раздира́ется? Ви́диши ли, я́ко вели́кая тьма объя́ла зе́млю и лю́дие в стра́се и тре́пете пе́рси своя́ бию́ще, глаго́лют: Вои́стину Бо́жий Сын бе Сей! Мы же таково́му чудеси́ удивля́яся и вои́стину Сы́на Твоего́ Сы́на Бо́жия испове́дающе, ве́рно вопие́м Ти:
Ра́дуйся, Ма́ти Бо́жия, се бо вси глаго́лы, я́же слага́ла еси́ в се́рдце Твое́м, соверши́шася; ра́дуйся, Благода́тная Де́во, заре́ неме́ркнущая, дне незаходи́мый, све́те златоза́рный.
Ра́дуйся, заре́ немерца́ющаго Све́та невече́рняго; ра́дуйся, святи́лище вели́кия та́йны.
Ра́дуйся, исто́чниче на́шего безсме́ртия; ра́дуйся, пода́тельнице Боже́ственныя бла́гости.
Ра́дуйся, Ма́ти Бо́жия, Цве́те Неувядаемый.
