Си́лою свы́ше укрепля́ема была́ еси́, Ма́ти Бо́жия, егда́ услы́шала еси́ словеса́ праведнаго ста́рца Симео́на: «Се, лежи́т Сей на паде́ние и на воста́ние мно́гим во Изра́или и в зна́мение пререка́емо, и Тебе́ же Само́й ду́шу про́йдет ору́жие, я́ко да откры́ются от мно́гих серде́ц помышле́ния». Оба́че скорбь ве́лия пронзе́ се́рдце Богоро́дицы, и возопи́ Сия́ Бо́гу: Аллилу́иа.
Име́я тща́ние погуби́ти Отроча́, посла́ И́род изби́ти вся де́ти, су́щия в Вифлее́ме и преде́лех его́, от двою́ ле́ту и нижа́йше, по вре́мени, е́же испыта́ от волхво́в. И се, повеле́нием Бо́жиим, да́нным чрез а́нгела во сне ста́рцу Ио́сифу, бежа́ все Свято́е Семе́йство во Еги́пет и пребы́сть та́мо седмь лет до сме́рти И́рода. Те́мже со умиле́нием воспое́м Ти, Богоро́дице:
Ра́дуйся, всю тесноту́ стра́нствия поне́сшая; ра́дуйся, я́ко вси и́доли падо́ша в стране́ Еги́петстей, не возмо́гше терпе́ти кре́пости Сы́на Твоего́.
Ра́дуйся, с нечести́выми язы́чники пребыва́вшая; ра́дуйся, из Еги́пта с Пе́рвенцем О́троком и Свои́м обру́чником в Назаре́т прише́дшая.
Ра́дуйся, со ста́рцем Ио́сифом древоде́лом в нищете́ жи́вшая; ра́дуйся, все вре́мя Свое́ в труде́х провожда́вшая.
Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая и сердца́ злых челове́к умягча́ющая.
Бу́ря ско́рби обдержа́ Пречи́стую Ма́терь, егда́ возвраща́ющимася и́ма из Иерусали́ма не обрето́ша в пути́ О́трока Иису́са. Сего́ ра́ди возврати́стася во Иерусали́м, взыска́юще Его́. И бысть по трие́х днех, обрето́ста Его́ в це́ркви, седя́щаго посреде́ учи́телей, и послу́шающаго их, и вопроша́ющаго их. И рече́ к Нему́ Ма́ти Его́: «Ча́до, что сотвори́ на́ма та́ко? Се оте́ц Твой и Аз, боля́ще, иска́хом Тебе́.» И рече́ к ни́ма Иису́с: «Что я́ко иска́сте Мене́? Не ве́сте ли, я́ко в тех, я́же Отца́ Моего́, досто́ит быти Ми?» Ты же, Пречи́стая, соблюда́ла еси́ глаго́лы сия́ в се́рдце Свое́м, вопию́щи Бо́гу: Аллилу́иа.
Услы́шала еси́, Ма́ти Бо́жия, я́ко Иису́с прохожда́ше всю Галиле́ю, уча́ на со́нмищих, пропове́дуя Ева́нгелие Ца́рствия и исцеля́я всяк неду́г и вся́кую я́зю в лю́дех. И изы́де слух о Нем по всей стране́, и приведо́ша к Нему́ вся боля́щия разли́чными неду́ги и страстьми́, одержи́мыя бе́сы и разсла́бленныя, и исцели́ их. Ты же, Ма́ти Бо́жия, ве́дущи проро́чество, скорбя́щи се́рдцем, познава́ла еси́, я́ко вско́ре прии́дет час, егда́ Сын Твой принесе́т Себе́ в же́ртву за грехи́ ми́ра. Те́мже ублажа́ем Тя, многоско́рбная Ма́ти Бо́жия, вопию́ще:
Ра́дуйся, Сы́на Своего́ на служе́ние наро́ду иуде́йскому отда́вшая; ра́дуйся, ско́рбная се́рдцем, но поко́рная во́ли Божией.
Ра́дуйся, мир от пото́па грехо́внаго спа́сшая; ра́дуйся, главу́ дре́вняго зми́я сте́ршая.
Ра́дуйся, Себе́ в же́ртву Бо́гу прине́сшая; ра́дуйся, Госпо́дь с Тобо́ю, Благослове́нная.
Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая и сердца́ злых челове́к умягча́ющая.
Ца́рствие Бо́жие на земли́ пропове́дуя, облича́ше Иису́с го́рдость фарисе́ев, мне́вших себе́ пра́ведники быти. Те́мже слы́шаще при́тчи Его́, разуме́ша, я́ко о них глаго́лет, и иска́ша взя́ти Его́, но убоя́шася наро́да, поне́же я́ко проро́ка Его́ име́яху; сия́ вся ве́дающи, скорбя́щи Богоро́дица о Сы́не Свое́м возлю́бленнем, страда́ше, да не убию́т Его́, оба́че вопию́ще Бо́гу: Аллилу́иа.
Ви́девше не́ции от иуде́й воскреше́ние Ла́заря, идо́ша к фарисе́ем и реко́ша им, я́же сотвори́ Иису́с; и рече́ им Каиа́фа, архиере́й сый ле́ту тому́: «У́не есть нам, да еди́н челове́к у́мрет за лю́ди, а не весь наро́д поги́бнет». И от сего́ дне совеща́ша, да убию́т Его́. Мы же вопие́м Ти, Пречи́стая:
Ра́дуйся, Спаси́теля ми́ра ро́ждшая; ра́дуйся, спасе́ния на́шего глави́зно.
Ра́дуйся, от рожде́ния в Ма́терь Спа́су на́шему предызбра́нная; ра́дуйся, Ма́ти Бо́жия, обрече́нная на страда́ние.
Ра́дуйся, Благослове́нная, Цари́ца Небе́сная соде́лавшаяся; ра́дуйся, вы́ну за ны моля́щаяся.
Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая и сердца́ злых челове́к умягча́ющая.
Пре́жде пропове́дник сло́ва Бо́жия, последи́ же преда́тель, Иу́да Искарио́тский, еди́н от обоюна́десяте апо́столов, и́де ко архиере́ом, преда́ти хотя́ Учи́теля своего́; они́ же, слы́шавше, обра́довашася и обеща́ша ему́ сре́бренники да́ти. Ты же, Богома́ти, скорбя́щи о Сы́не Свое́м возлю́бленнем, вопия́ла еси́ го́рце Бо́гу: Аллилу́иа.
Возсия́ла есть после́дняя ве́черя ученико́м Христо́вым, на нейже Учи́тель умы́ но́зе им, о́браз смире́ния показу́я, и рече́ им: «Еди́н от вас преда́ст Мя, яды́й со Мно́ю». Мы же, го́рю Матери Божией сострада́юще, воспева́ем Ей:
Ра́дуйся, Ма́ти Бо́жия, му́кою серде́чною истомле́нная; ра́дуйся, вся претерпе́вшая в юдо́ли сей многоско́рбней.
Ра́дуйся, в моли́тве успокое́ние находи́вшая; ра́дуйся, всех скорбя́щих Ра́досте.
Ра́дуйся, утоле́ние на́ших печа́лей; ра́дуйся, из ти́ны грехо́вныя нас спаса́ющая.
Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая и сердца́ злых челове́к умягча́ющая.
