Радуйся, ревнителю жития богоугоднаго.
Радуйся, истинный поклонниче Господень, вся ради Христа тщету вменивый.
Радуйся, верный служителю Господа всяческих, Ему Единому послуживый.
Радуйся, блаженнейший последователю Господа Иисуса, Его Единаго возлюбивый.
Радуйся, пустынных жителю, пустыню паче всего предъизбравый.
Радуйся, блаженство пустынножития уразумевый.
Радуйся, яко в пустыни весь разум твой к Единому Богу вперил еси.
Радуйся, яко навыкл еси богоприятной молитве, непрестанно в ней Богу собеседовав.
Радуйся, пустыни украшение доброе.
Радуйся, древних пустынников верный подражателю.
Радуйся, истиннаго духа пустынножительства наставниче всем.
Радуйся, Антоние, подвижниче Христов всечестне.
Боготечная звезда явился еси преподобне отче, протекши путь жития твоего, приведший тя к Богу, Егоже заповедем верно последовал еси, руководя купно с собою стадо твое к обителем небесным, идеже песнь воспеваеши Богу: Аллилуиа.
Видевше тя отходяща в путь дальний по послушанию старчу, собратия твои тебе дивляхуся; мы же воспоминающе твое послушание, благословением Божиим осененное, воспеваем ти:
Радуйся, истинный трудниче Божий, вся обеты твоя всецело совершивый.
Радуйся, совершенства подвижническаго достигнувый благодатию Божиею.
Радуйся, волю свою смиривый до конца.
Радуйся, в истинную свободу чад Божиих послушанием твоим предъуспевый.
Радуйся, совершенную власть над помыслы своими стяжавый.
Радуйся, всякое сомнение от души твоея отгнавый.
Радуйся, ради послушания Божия труда великаго не устрашивыйся.
Радуйся, в путь твой дальний потекий.
Радуйся, терпение твое до конца соблюдый.
Радуйся, вся скорби долгаго путьшествия благодушно подъявый.
Радуйся, послушниче истинный, волю настоятеля своего верно совершивый.
Радуйся, Антоние, подвижниче Христов всечестне.
Проповедник явился еси добродетелей жития христианскаго, благоподражательным примером твоим, во еже всем ведущым Бога и подвизающымся во всем житии, достойно возсылати Ему честь и хвалу: Аллилуиа.
Возсия в души твоей свет истиннаго боговедения, озаряя душы твоих, преподобне отче, почитателей и возбуждая пети тебе:
Радуйся, Единаго Истиннаго Бога верный поклонниче.
Радуйся, Отца нашего, иже на Небесех, в житии твоем прославивый.
Радуйся, Единароднаго Сына Божия, нас ради воплощеннаго, верно исповедавый.
Радуйся, Святому Духу верно покланявыйся.
Радуйся, к истинной лозе прилепивыйся верою.
Радуйся, божественнаго смирения и терпения подражателю.
Радуйся, язв и болезней искупительных причастниче.
Радуйся, крестнаго подвига Христова последователю.
Радуйся, обитель дарований благодати Духа Святаго явивыйся.
Радуйся, живый храм Духа Божия бывый.
Радуйся, Антоние, подвижниче Христов всечестне.
Хотя принести себе жертву живу, святу, благоугодну Господеви, всего себе закону Божию повинул еси и от всякия скверны плоти и духа постом и молитвою очистил еси, от чистых устен и сердца воспевая Богу: Аллилуиа.
Новаго, достойне древних подвизавшагося, подражателя видим тя преподобне отче, Пречистыя Девы: темже, чтя подвиг девства твоего, воспеваем ти:
Радуйся, Пренепорочныя Девы последователю.
Радуйся, подвижниче совершеннаго целомудрия.
Радуйся, друже Христов, Ему единому прилепивыйся.
Радуйся, подобниче Павлу, чистоту души и тела паче всего возлюбивый.
Радуйся, от юности победивый страсти.
Радуйся, неосквернены прочее соблюдый чувства душевная же и телесная.
Радуйся, во плоти яко безплотный поживый.
Радуйся, плоть твою смиривый.
Радуйся, трудом богомыслия непрестающаго уцеломудривый душу.
Радуйся, телесным изнурением обуздавый вожделения.
Радуйся, сотрудниче и сонаследниче возлюбленнаго ученика Христова.
Радуйся, Антоние, подвижниче Христов всечестне.
Странное неверующым трудническое житие твое, преподобне Антоние, чудно является во очию нашею: зрим бо в тебе истиннаго раба страдавшаго Владыки твари, Емуже с тобою вопием: Аллилуиа.
Всего себе предав Богу, всякое попечение житейское отложил еси в житии твоем, преподобне отче Антоние; темже Господь, на Негоже всю печаль свою возвергл еси, препита тя, мы же нищету твою чтуще, зовем ти:
Радуйся, нищеты спасительныя ревнителю.
Радуйся, нестяжания образе.
Радуйся, человече Божий, ради любве Божия всякое земное пристрастие отсекнувый.
Радуйся, обителе мудрости христианския, тщету благ мирских рано уразумевый.
Радуйся, подвижниче истинный, всякаго любовещнаго желания уклонивыйся.
Радуйся, от лести богатства ограждей себе нищетою вольною.
Радуйся, от благ мирских ни единым же наслаждейся в житии твоем.
Радуйся, вместо земных сокровищ нищетою собравый себе на небеси вечное сокровище.
Радуйся, и в богатстве добрых дел соблюдый себе нища духом.
Радуйся, нищеты Христовы подражателю.
Радуйся, нищеты Предтечевой и Павловой и Антониевой соучастниче.
Радуйся, Антоние, подвижниче Христов всечестне.
Всеми добродетельми иноческими украсился еси, преподобне отче Антоние, усердно послужив в житии Христу Богу, Емуже ныне с лики небесными радостно вопиеши: Аллилуиа.
