Новаго видяще тя наставника иноком, от многих стран Российских притекаху к ти жаждущии пустыннаго жития и безмолвия. Кто доволен изрещи труды твоя и скорби, блаженне, егда вкупе со Антонием и Серафимом жизнь равноангельную на Горе утверждал еси, предстательством Николая угодника обитель святую созидая, с кротостию поучал еси братий своих, слезы, во еже исправитися им, проливая. Мы же, восхваляя усердие твое ко Господу, взываем ти сице:
Радуйся, дивный светильниче и ангелов собеседниче; радуйся, сожителю святым и присный Богу.
Радуйся, единение духа в союзе любве соблюдый; радуйся, во оправдании Божием безпорочно ходивый.
Радуйся, монахов множество во единое братство собравый; радуйся, не вотще течение подвига исполнивый.
Радуйся, Жениху Евангельскому, в сретение исшедый; радуйся, добродетелию смирения исполненный.
Радуйся, преподобномучениче Варлааме, вертограда Божия крине предивный.
Странным чудом явися в земли Пермстей скорое умножение и благоустроение обителей иноческих тщанием твоим, отче Варлааме, словно потоки вод едемских устремишася с Горы Божией словеса благодати, приобщишася же их, купно взываем Богу: Аллилуия.
Весь еси горение ко Господу, вдаде себе, досточудне, подвигом преизрядным. Восхваляюще велие служение твое Церкви Православней, возглашаем ти таковая:
Радуйся, обителей множества устроителю; радуйся, жатвы Божией делателю усердный.
Радуйся, столпе Церкви нашея Богом утвержденный; радуйся, созиданию Афона Уральскаго послуживый.
Радуйся, в делех добрых обогативыйся; радуйся, землю суровую сердец малодушных любовию оросивый.
Радуйся, сад плодоносный на Горе Белой, в разуме Божием насадивый; радуйся, авва всея Пермския страны.
Радуйся, преподобномучениче Варлааме, вертограда Божия крине предивный.
Вси людие вернии, приходяще к тебе на Гору, видеша тя, яко отца чадолюбива, питателя добра, духовника премудра, учителя покаяния пред Богом и отечеством, зовуща пети Господеви: Аллилуия.
Ветии доброглаголивии нарекоша тя истинным подражателем Христу, зря тебе, яко зерно пшеничное, падшее в землю и погибшее, но давшее плод многим. Мы же приносим ти песнь сию:
Радуйся, сонмы о Христе созидавый; радуйся, вся в соединение веры призвавый.
Радуйся, жертву хваления Господеви принесый; радуйся, с кротостию противныя наставивый.
Радуйся, неверных людей мнозех совершивый; радуйся, страннолюбия незабывавый.
Радуйся, объятия Отча заблуждшим отверзти у Христа просивый.
Радуйся, преподобномучениче Варлааме, вертограда Божия крине предивный.
Спасительным речам твоим, преподобномучениче, со умилением внимаша, множество людей, спасения ищущих, начало исправления пути своего ко Христу полагая, учителем покаяния тя именуя, Господеви же поя: Аллилуия.
Стену крепкую Православия обретоша тя Христоименитии российстии людие, проповедника Богоглаголиваго, путевождя духовнаго. Вещание словес твоих запечатлеша тии на скрижалех сердец своих, да обретутся чадами верными на Страшнем Судище Христовом. Мы же, благодарни суще за толикую любовь твою к народу Божиему, вопием ти сице:
Радуйся, слово свое во благодати растворивый; радуйся, благую весть в себе богато приявший.
Радуйся, за Семью Августейшую слезно моливыйся; радуйся, на верность Богу, Царю и Отечеству российский народ наставляяй.
Радуйся, Евангельским хлебом паству велию насытивый; радуйся, исповедание Самодержавия неуклонно совершивый.
Радуйся, клянущия ти благословивый; радуйся, жертву благоугодну Богу принесый.
Радуйся, преподобномучениче Варлааме, вертограда Божия крине предивный.
Пение неумолчное Вседержителю приносящем, защитником Церкви нашей и Отечества был еси, Варлааме святе, сего ради восхотеша врази погубити тя, к лести прибегши, призваша тя в место далече от обители твоея. Ты же в каждом человеце чадо Божие видяще, требующее окормления духовнаго, смело исшел к призвавшим тя, мыслию о Христе вооружившись, поя Ему со умилением: Аллилуия.
Светоподательных глаголов твоих не хотяще слышати, наложиша безбожныя на тя, блаженне, узы, да предадут мукам и истязаниям и послежде смертию люте умертвят. Ты же, увозимый во град страданий твоих, не преставал еси учити верных, да не боятся убивающих тело, душу же не могущих погубити. Кто от людей церковных уклонится от еже славити тя:
Радуйся, пастырство до конца пронесый; радуйся, в терпении велием душу свою стяжавый.
Радуйся, смирение чудное имевый; радуйся, пред Ангелы Божии прославленный.
Радуйся, скорбь на скорбь приемый; радуйся, еже по Христу страдати удостоенный.
Радуйся, во всяком терпении возмогший; радуйся, горняго мира пресветлый жителю.
Радуйся, преподобномучениче Варлааме, вертограда Божия крине предивный.
Благодать велия дадеся ти, преподобномучениче, в ризах белых, очищенных кровию неповинною, пред Престолом Вседержителя стояти сподобился еси, идеже свободь от печали и воздыхания, ныне радостно зовеши к Богу: Аллилуия.
