Спасти хотяй некоего крестьянина недугом пьянства одержимаго, трикратно явися ему преподобный Варлаам в видении соннем и повеле молебен послужити пред иконою Богоматере во обители Владычней. Той же, повеление исполнив, исцелися от недуга своего, из глубины сердца взывая благодарственне Богу: Аллилуиа.
Стена еси и заступление всем страждущим людем обитель твоя, преподобне, идеже чудная икона Богоматере, Неупиваемою Чашею именуемая, исцеление дарует отчаявшимся и погибающим, наипаче же болезнующим пиянством. Темже и нам с верою ко святым мощам твоим приходящим, буди предстатель, умоли Пречистую Владычицу исцелити нас от страстей греховных, да вопием тебе с любовию таковая: Радуйся, Заступницы Усердныя благоговейный почитателю; радуйся, к Богородице молитвенниче наш неусыпный. Радуйся, яко тобою дивная икона Богоматере прославися; радуйся, яко от нея мнози исцеление от пиянства приимаху. Радуйся, яко от всех градов и весей народи во обитель твою притекают; радуйся, яко того ради по всей Велицей России возвещают имя твое. Радуйся, от недуга пианства страждущих избавляяй; радуйся, одержимых страстями от рова погибели спасаяй. Радуйся, к подвигу воздержания нас призываяй; радуйся, отчаянным надежду и помощь подаваяй. Радуйся, спасению многих душ человеческих послуживый; радуйся, трезвеннаго жития наставниче. Радуйся, преподобне Варлааме, земли Серпуховския преславный чудотворче.
Пение молебное от лет древних даже и до ныне совершается у гроба твоего, преподобне, чудеса же многая от него источаются обильно. Темже славим тя, чудотворца милостиваго и с любовию покланяемся мощем твоим, просяще предстательства твоего пред Господем, Емуже благодарственно взываем: Аллилуиа.
Свет благодати Божия от цельбоносных мощей твоих явися не точию во граде Серпухове, но всю богоспасаемую Россию освети многими чудесы. Обаче во дни гонений на веру Христову обитель твоя опусте, сестры же ея терпением посрамиша враги Церкве Христовы и венцы мученическими украсишася. Егда же безбожнии восхотеша мощи твоя осквернити пламень из земли попали я. Сего ради с верою к заступлению твоему прибегаем и тепле вопием ти: Радуйся, светильниче Света небеснаго; радуйся, пламене, пожигаяй злочестие. Радуйся, света Христова носителю; радуйся, яко и нас благодатным светом просвещаеши. Радуйся, града Серпухова верный защитниче; радуйся, обители Владычния освящение. Радуйся, сестер обители в стоянии за веру православную укрепивый; радуйся, мужеству в испытаниях и всех нас научаяй. Радуйся, безбожных силою Божиею посрамивый; радуйся, гордыню их в студ и безчестие обративый.
Радуйся, звездо пресветлая, над землею Серпуховскою возсиявшая; радуйся, пред Престолом Божиим лампадо неугасимая. Радуйся, преподобне Варлааме, земли Серпуховския преславный чудотворче.
Благодать неистощимую яви нам Господь на гробе твоем, угодниче Божий Варлааме: недужных болезни врачевати, демоны прогоняти и страсти исцеляти. Темже молим тя с любовию, подаждь благодатную тишину отчизне нашей, умоли Господа даровати нам грехов оставление и помогай всем любящим тя, а наипаче зде подвизающимся, до конца жизни воспевати Богу песнь: Аллилуиа.
Поюще многая и славная чудеса твоя, прославляем возвеличившаго тя Господа и благодарение приносим ти, отче Варлааме, обитель бо Владычняя, во времена лихолетия разоренная, паки возставися, силою же лучшею обновися, в нюже инокини и паломники благочестивии текуще, яко отца и первоначальника обители восхваляют тя сице: Радуйся, яко обитель твоя, от безбожных разоренная, возставися; радуйся, яко паки тем светильник благочестия Церкви Русской даровася. Радуйся, яко храмы и здания ея молитвами твоими благолепно обновляются;
радуйся, яко тобою благочестие в ней укрепляется. Радуйся, о обители твоей и сестрах ея неусыпный попечителю; радуйся, приходящих в ню благий предстателю. Радуйся, подвизающимся в ней инокиням спасения вечный ходатаю; радуйся, почитающих святую память твою небесный покровителю. Радуйся, от всея земли Российския во обитель людей православных призываяй;
радуйся, благословение Божие на зде труждающихся низводяй. Радуйся, Богом дарованный нам заступниче; радуйся, молитвенниче крепкий за Русь Православную. Радуйся, преподобне Варлааме, земли Серпуховския преславный чудотворче.
О, великий угодниче Божий преподобне отче Варлааме, приими сие малое моление наше, в похвалу тебе приносимое, и со Пресвятою Владычицею Богородицею и всеми святыми земли нашея умоли Господа даровати мир и благоустроение Церкви Православней и стране Российстей, да сподобимся с тобою в Царствии Небеснем воспевати Спасителю нашему благодарную песнь: Аллилуиа. (Трижды).
