Сборник канонов полностью

Гавриилу вещавшу Тебе, Дево, радуйся, со гласом воплощашеся всех Владыка в Тебе, святем кивоте, якоже рече праведный Давид, явилася еси, ширшая Небес, поносивши Зиждителя Твоего. Слава Всельшемуся в Тя, слава Прошедшему из Тебе, слава Свободившему нас рождеством Твоим.

Ирмос: Из горы приосененныя, Слове, пророк, единыя Богородицы, хотяща воплотитися боговидно усмотри и со страхом славословяше силу Твою.

Теплый предстателю бедствующих и молящихся скорый услышателю, отче наш, святителю Алексие, избави от всяких напастей вся, призывающия тя.

Светильниче всесветлый, просиявый добродетельми твоими, озари сердца наша, омраченная прилоги льстиваго, и разжени тьму страстей присно борющих ны.

Празднующим светло память твою, отечеству нашему и людем мир у Христа испроси и избави от междоусобныя брани и нашествий противных.

Богородичен: Палата прекрасная и престол Всецаря Христа показалася еси: честнейшая бо еси воистину всех тварей, Богомати, Предстательница и покров душ наших.

Ирмос: От нощи неведения Боговедением просветивый концы, просвети мя утром человеколюбия Твоего, Господи.

Блистаньми чудес твоих, Богомудре, церковь твою озари и люди возвесели, Христа моля дати всем нам грехов прощение.

Моли о нас Всесвятую Троицу, святителю Алексие, яко да низпослет нам благодать Свою, хвалящим тя любовию.

Всечестная рака твоя, святителю Алексие, чудеса точит приходящим верно и просящим подает цельбу обильно.

Богородичен: Единаго от Троицы воплощеннаго Бога истинно родила еси, Егоже моли от бед избавитися рабом Твоим.

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Преосвященне Алексие, красото церковная, архиереев благолепие, равностоятелю же святых Ангел, моли о хвалящих тя и испроси получити всем грехов оставление.

Преблаженне святителю Алексие, молися прилежно за град и люди твоя, и обдержащия скорби премени, и грехов прощение и горняго веселия наследие испроси.

Подвиг твоих трудами приял еси Божественная дарования: честныя бо твоя мощи в шестьдесятное лето обретошася нетленны, исцеления различная подающия.

Богородичен: Припадающе, молим Тя прилежно, всемилостивая Владычице: моли из Тебе рождшагося избавити ны лютыя скорби, и варварскаго прещения, и всякаго навета вражия.

Яко солнце незаходимое, от гроба возсия нам от мног лет сокровены честныя твоя мощи нетленны, святителю Алексие, тобою благодать приемлем: всю бо страну сию и вся ны чудесы и добротою обогащаеши, действом благодати, да поем ти: радуйся, отче, светило России.

Похвалим ныне святителя песньми, Российскаго пастыря и учителя, и благочестно притецем к раце мощей его, и почерпем дарования, яко от источника исцелений. Юже обстояще ныне, радостно веселимся и, усердно обшедше, светоносными песньми прославим, глаголюще: чудотворче святителю Алексие, чудесы обогащай всех нас содеянием благодати, да поем ти: радуйся, отче, светило России.

Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.

Орган духовный был еси, отче святителю Алексие, умно движим благодатию, присно бряцал еси, поя: отец наших Боже, благословен еси.

На земли, яко солнце, сияеши чудесы, отче блаженне, на Небесех же венценосец, радуяся, поеши: отец наших Боже, благословен еси.

Благодатию Духа честныя мощи святителя Алексия различныя цельбы подают верою поющим: отец наших Боже, благословен еси.

Богородичен: Телесныя слабости и душевныя недуги, Богородительнице, любовию приходящих к крову Твоему исцели, врача Христа нам рождшая.

Ирмос: На горе святей прославльшася и в купине огнем Приснодевы Моисеови тайну явльшаго, Господа пойте и превозносите во вся веки.

Потщися, святе, избавити ны от напастей и скорбей многих, обдержащих ны, плотских и душевных, да, радующеся, поем Христа во вся веки.

Призывающия тя, отче, избави всякаго зла и лютых нахождений и от напрасныя смерти исхити поющия Христа во вся веки.

Манием Божественным различныя цельбы подают честныя твоя мощи, святителю, просящим тя усердно и Христа поющим во вся веки.

Богородичен: Рождшая Единаго от Троицы, молити не престай, Богородице, избавитися нам от бед, поющим и превозносящим Его во веки.