Сборник канонов полностью

Слава: Ангельская воинства сущему во плоти житию твоему удивишася, отче Варлааме, бури бо страстей отбегл и совершеннаго ради жития, ветрилом воздержания достигл еси в благоутишное пристанище Христово.

И ныне: Обетшавшия ны горьким древле древа вкушением и падшия поползновением, Пречистая, обновила еси, Зиждителя рождши, Слово Ипостасное, Девомати Владычице.

Господи, помилуй (трижды). Слава, и ныне:

Якоже другий Илия, отче, дождь с небесе свел еси, он убо огнь сведе и царя удиви, ты же люди твоя возвеселил еси и торжествовати устроил еси. Великий бо Новград вельми тобою хвалится, имея мощи твоя в себе, егоже сохраняй от враг непоколебима, да зовем ти: радуйся, преподобне Варлааме, отче наш.

Аще и человек естеством был еси, преподобне отче, но вышняго Иерусалима явился еси согражданин и, человек убо естеством, Безплотных чести сподобился еси. Темже и самая, зряще, чудеса похвальная удивляют нас и научают звати тебе таковая: радуйся, благочестива отца отрасле; радуйся, матере благоговейныя ветве; радуйся, смирения высото; радуйся, яко к познанию Бога вся приводя; радуйся, яко многа чудеса о Христе сотворил еси; радуйся, целомудрия столпе, имже демонская свирепства искоренишася; радуйся, светильниче многосветлый; радуйся, яко увядил еси плотская мудрования; радуйся, яко дождь молитвою свел еси и, паки наводнению бывшу, молитвою водоточныя облаки востягл еси; радуйся, Великаго Новаграда похвала и утверждение, егоже и сохрани от враг непоколебима до конца, да зовем ти: радуйся, преподобне Варлааме, отче наш.

Ирмос: Образу златому, на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.

Преподобне отче наш Варлааме, моли Бога о нас.

Зельным пощением, яко благовонною пищею, питая душу твою, преподобне Варлааме, темже и Трисолнечному Божеству предстоя, со Ангелы поеши: благословен Бог отец наших.

Преподобне отче наш Варлааме, моли Бога о нас.

Облистал еси якоже невечернее солнце, отечество твое просвещая, преподобне Варлааме, тьмы избавляя страстей, и на нас наветующих советы разори, от враг непреткновенным быти нам, поющим: благословен Бог отец наших.

Преподобне отче наш Варлааме, моли Бога о нас.

Яко на Божественную добродетелей лествицу воздержанием, отче, возшед, умными очесы Христа Царя видел еси, обильною десницею по числу добродетелей, Варлааме, дарования дающа от души вопиющим: благословен Бог отец наших.

Слава: Дремания отнюд и сна твоим очесем не дал еси, дондеже возмездие от Христа трудов обрел еси, наслаждение Небеснаго Царствия, еже уготова от веры поющим: благословен Бог отец наших.

И ныне: Обновляются в Тебе естества закони: паче естества бо естеством Непостижимаго, Дево, Бога Еммануила преславно, Чистая, родила еси в наше верных обновление.

Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа, и превозносите во вся веки.

Преподобне отче наш Варлааме, моли Бога о нас.

Слезами твоими, отче Варлааме, умываяся, житие прошел еси, и теми множества демонов потопил еси, верных же мысли возвеселил еси, поющих: вся дела Господа пойте, и превозносите Его во веки.

Преподобне отче наш Варлааме, моли Бога о нас.

Уязвился еси Божественным желанием, всеблаженне, темже и непорочное и праведное житие проходя, дондеже достигл еси царскаго престола, отонудными светлостьми осияя поющия: вся дела Господа пойте, и превозносите Его во веки.

Слава: К Свету Незаходимому, славне, взялся еси, наслаждение же земных вещей оплевав вышняго ради наслаждения, паче воздержанию поревновал еси и страстей пламень потщался еси угасити слезами твоих источник, Варлааме, вопия: вся дела Господа пойте, и превозносите Его во веки.

И ныне: Распятие и погребение, Иже от Тебе небрачно, Дево, произыде, претерпев нас ради мучение, Егоже страстем ревнуя, преподобный Варлаам крестовидно мучения пощением Тому, Чистая, последова.

Ирмос: Яже прежде солнца светильника Бога возсиявшаго, плотски к нам пришедшаго из боку Девичу, неизреченно воплотившая, Благословенная Всечистая, Тя, Богородице, величаем.

Преподобне отче наш Варлааме, моли Бога о нас.

Пожив на земли равноангельно, равноангельну обрел еси светлость, моли непрестанно Избавителя, Варлааме, о творящих благочестно память твою, о преблаженне! монашествующих похвало.

Преподобне отче наш Варлааме, моли Бога о нас.

Узкий и прискорбный шествовав путь, отче Варлааме, и телесне убо преставился еси, духом же жив, предстоиши Богу. Но яко имея дерзновение, Емуже в житии работал еси, моли спасти души наша.

Слава: Исцелений явился еси струя обильная, многомятежнаго пламене углие страстей угасил еси. Ум бо твой неокраден, преподобне отче, соблюл еси и, яко крепок, Варлааме, побеждаеши искусителя.