Никакоже тебе послушаю, к пагубе привлачаща, огнеслужителю Иоанн вещаше, умру же паче усердно за Умершаго мене ради, да с мученики светло вопию: слава силе Твоей, Господи.
Изнемогоша биюще слуги страстотерпческия плоти, утрудися и мучитель, томления изыскуя, но он доблественне терпяше, красуяся ранами, яже за любовь подъят Господа своего.
Коль страшно же и славно о Христе сопротивление твое, емуже убо почудишася племена, обретшаяся на подвизе, и похвалиша терпение, персы же посрамишася со иудеи, студом оболкшеся.
Окрест стояху множества, зряще бываемое, славне, и мучитель председяше, тебе приобрести наделся, но погреши безумный тщания, всуе претя непристрашному и вотще бия адаманта.
Епарха злочестиваго безумному велению ругаяся, Божественный Иоанн прелесть обличаще персския гордыни: солнцу, глаголя, не поклонюся, твари сущей, человеком работающей, большему рук Божиих созданию.
Никакоже поколебаша столпа благочестия свирепство повелевающаго, ниже палицами биения, но ни раны, ни смерть нужднейшая.
Оку херувимску ума твоего чистота уподобися: доле бо мужески терпел еси мучения и горе предстоял еси Владыце, иже посла тебе венец победительный.
Взыграшася светло мученичестии тогда ликове, видевше твое дерзновение, и, приникше купно со Ангелы, невидимо укрепляху тя в подвизе.
Ужа железная Иоанн, страдалец изящный, злата огорлия вменяше я и яже от иудей каменей метания - степени к Небесному шествию.
Морскую плавая пучину куплею, от востока тщался еси к северу, но Богу призвавшу тя, якоже Матфей мытницу, ты же куплю оставль и Тому последовал еси кровию мучения, временными искупив непроходимая, и венец приял еси непобедимый.
Премудрый Зиждитель и Владыка и Господин винограда мысленнаго якоже пресвятыми Своими усты во притчи винограда глаголет: яко во единыйнадесять час делавшим подобную даде цену, якоже и от перваго делавшим. Ныне делы извести в притчи крыемое, Иоанна показав светла мученика, на самый уже последок летным тысящам, подобно первым страдальцем прослави нетлением и исцеления даром: временными бо искупив непроходимая, и венец носит непобедимый.
Приносимая ти страдания, Иоанне досточудне, младенец стреляния мужески вменял еси, радостно поя: препетый отцев Господь и Бог, благословен еси.
Руку часто простирая к мучителю, Иоанн глаголаше: что всуе трудишися, безстудне, муки бо творя мне пестра одеяния, и смерть - венец безсмертия?
Истинен аз мученик истиннаго Христа Бога нашего, страдалец взываше, влачения бо цветы благовонны вменяю и кровныя струи баню Крещения.
Нощь от мене судится житие еже во плоти, Иоанн любомудрствоваше, скоро убо прочее плоти разреши мя соуза, да яже со Христом жизнь наследую.
Ублажиша тя цари, благословиша тя святители, слышаще твое мужественное терпение и ко Христу ходатая стяжавше тя, и, ныне приходяще, честным твоем мощем покланяются.
