У Креста предстояла еси, зрящи неправедное, славная, заколение Себе излиявшаго за неизреченную милость, и, стенании и слезами обливаема, что странное,— вопияла еси, Марие,— чудо? Како умерщвляется и умирает смерть умертвивый, Живот сый естеством?
К Божественней преложилася еси ныне радости, к райстей широте пространней, к мысленным и премирным обителем, идеже преподобных чинове, идеже есть глас чист светло празднующих, Марие Богоносная. Темже тя вси ублажаем.
Ничтоже предпочла еси сущих на земли паче любве Христа Бога, но Того единаго снедаема добротами и непосредственно, всечестная, посылаемыми лучами, стопам Сего, вопияла еси, последующи: Тя величаю, Многомилостиве.
Обожение получивши боготворное, и потока напившися благодати, и мзды болезней приемши богоначально, и апостольским чином счетаема, Магдалино, ученица Слова, любовию чтущия тя твоими молитвами сохрани.
Солнце незаходимое, отроковице, еже от Отца прежде век возсиявшее, во гробе еврейский сонм запечата, но воскресшаго видела еси первее, Марие, и учеником возвестила еси.
глас 4
Скверну прегрешений очисти смиренныя моея души, Твоею милостию, Христе, мглу и омрачение страстей отжени молитвами преподобныя Твоея.
Страстьми плотскими осквернивши душевное благородие, воздержанием паки, о, честная, твой ум просветила еси, тучами слез твоих душу уяснивши.
Египта страстей избегла еси, яко от греховна источника, и, фараона избавльшися лютаго осквернения, безстрастия ныне землю наследовала еси, и со Ангелы ликуеши присно.
Возсмердешася душевныя и согнишася твоя раны, но источником слез твоих сия омыла еси тепле.
Побеждени быша тобою демонстии полцы, и страстная взыграния слезами уранила еси.
Яко утренний облак и якоже капля, каплющи, была еси всем, проливающи воды покаяния спасительнаго.
Блудами первее преисполнена всяческими, Христова невеста днесь покаянием явися, ангельское жительство подражающи, демона креста оружием погубляет. Сего ради Царствия невеста явилася еси, Марие преславная.
Взыграния вся плотская обуздавши болезньми постническими, мужественное показала еси души твоея мудрование, Креста бо возжелевши образ видети, себе, приснопамятная, миру распяла еси, отонудуже и к ревности жития непорочнаго усердно воздвигла еси себе, всеблаженная, Марие преславная. Моли Христа Бога грехов оставление подати чествующим любовию святую память твою.
Удалилася еси, бежавши, сущих в мире и сладких всех, едина же Единому чисто приобщилася еси крайним воздержанием и терпением дел твоих.
Телесная движения и разжжения воздержанием поистинне изсушила еси, отонудуже душу украсила еси, Марие всеславная, Божественными видении и детельми.
Добродетельною твоею силою, слезами и постом крайним, молитвою же и варом, зимою и наготою приятелище была еси Святаго Духа честно.
