Том 3 (XI-XII века, священная история) полностью

И виде на друземъ месте тму велику, и рече Святая Богородица: «Что сии есть тма сии, и кто суть пребывающи въ ней?» И рече архистратигъ: «Многи душа пребываютъ въ месте семъ». И рече Святая Богородица: «Да отымется тма сии, да быхъ видела и ту муку». И отвещаша ангели, стрегущии муку: «Пореченно есть, да не видять света, дондеже явится Сынъ твои благыи, паче 7 солнцъ светлийши». — И прискорбна бысть Святая Богородица, и ко ангеломъ возведе очи свои, и возревъ на невидимыи престолъ Отца Своего, и рече: «Во имя Отца и Сына и Святаго Духа, да отимется тма сии, и да быхъ видела сию муку». И отъятся тма си и 7 небесъ явися, и ту пребываше множство народу, мужъ и женъ, вопль многии бысть и гласъ велик (...) исхожаше. И видевши я Пресвятая Богородица, и рече къ нимъ, плачющися со слезами: «Что сотворили есте, бедницы окаянии, недостойнии, како вы семо приидосте?» И не бысть гласа отъ нихъ, ни ответа, и рекоша ангели стрегуще: «Почто не глаголите?» Рекоша мучащиися: «О Благодатная, отъ века несмь света видели, да не можемъ зрети горе». И возревши на ня Святая Богородица, и восплакася велми. И видевши ю мучащиися, и рекоша къ ней: «Како ны еси присетила, Святая Богородица, но Сынъ твой благодатныи на землю приходитъ, и не воспроси насъ, то ни Авраамъ прадедъ, ни Моисеи пророкъ, ни Иоаннъ креститель, то ни апостолъ Павелъ, возлюбленникъ Божии, но ты, Пресвятая Богородице, заступнице, — ты еси роду христьянскому стена, ты молишь Бога, како еси насъ присетила бедныхъ?» Тогда рече Святая богородица ко архистратигу Михаилу: «Что есть согрешение техъ?» И рече Михаилъ: «Сии суть, иже не вероваша во Отца и Сына и Святаго Духа, то ни въ тя, Святая Богородица, не хотяща проповедати имени твоего, якоже родися отъ тебе нашъ Исус Христос, плоть приимъ, освяти землю крещениемъ, — да того деля въ томъ месте мучатся». И паки прослезися Святая Богородица и рече къ нимъ: «Почто ся соблазнисте, не весте ли вы, якожъ мое имя чте все создание?»

То рекше Святая Богородица, и паки тма нападе на нихъ. Рече къ ней архистратигъ: «Куды хощешь, Благодатная, да изидемъ на полудне, или на полунощь?» И рече Благодатная: «Изыдемъ на полудни». Тогда обратишася херувимы и серафимы и 400 ангелъ, изведоша Богородицу на полудьнь, идежь река огненая жжаше, и ту бяше множство мужъ и женъ, бяху погружении ту, овии до пояса, овии до пазуху, овии до шия, а друзии до верха.

И видевше Святая Богородица, возопи гласомъ великимъ, и воспроси архистратига: «Который суть си, иже до пояса во огни погружении?» И рече къ ней архитратигъ: «Се суть, иже отецъ и матерей своихъ клятву прияша, да за то зде мучатся, яко прокляти суть». И паки рече Богородица: «Иже суть подъ пазусе въ огни, котории суть?» И рече къ ней архистратигъ: «Сия суть присныя куми были, карящеся, и другия блудъ творяху, да за то ти зде мучатся». И рече Пресвятая Богородица: «А иже суть до шия во пламени огню, котории суть?» И рече къ ней архангелъ: «Сии суть, иже мяса ядшая человеча, да за то ти зде мучатся тако». Рече Святая Богородица: «А сии до верха суть ввержении во пламени огню, которыи суть сии?» И рече архистратигъ: «Си суть, Госпоже, иже крестъ честныи держаще, кленутся лжами, — таковыми силы честнаго креста, егоже ангели зряще трепещутъ и со страхомъ поклоняются ему. Того жъ человецы держаще, кленутся имъ, не ведуще, какова мука ожидаетъ ихъ: того ради тако мучатся».

И увиде Святая Богородица мужа, висяща за нози, и червии ядяху его, и воспроси ангела: «Кто сей есть? что ли грехъ сотворилъ есть?» И рече къ ней архитратигъ: «Сии есть, иже приклады имаше на злато свое и на сребро, да за то на веки мучится».

И виде жену, висящу за зубъ, и различныя змия исхожаху изо устъ ея и ядяху ея. И видевши Пресвятая, и воспроси ангела: «Что есть жена сии, что ли грехъ ея?» И отвеща архистратигъ и рече: «Та есть, Госпоже, еже хожаше по ближная своя и по суседомъ, послушающи, что глаголютъ, и слагающи словеса неприязнена, сважающии на сваре, да того ради сице мучится». И рече святая Богородица: «Добро было человеку тому, да ся бы не ражалъ». И рече къ ней Михаилъ: «И еще, Святая Богородица, несть видела великихъ мукъ». И рече Святая ко архистратигу: «Изыдемъ да походимъ, да видимъ вся муки». И рече Михаилъ: «Куды хощеши, Благодатная?» И рече Святая: «На полунощь». И обратишася херувими и серафими и 400 ангелъ, изведоша Благодатную на полунощъ. И бысть облакъ огненъ распростертъ, посреди его одрове, яко пламеныи огнь, и на нихъ лежаше множство мужъ и женъ. И видевши Святая, и воздохнувъ, и рече ко архистратигу: «Кто си суть, что суть согрешили?» И рече архистратигъ: «Сии суть, Госпоже, иже во Святую неделю на заутреню не воставають, но ленящеся лежатъ, яко мертви, да за то те мучатся». И рече Святая Богородица: «Да аще кто не можетъ стати, да что сотворили?» И рече Михаилъ: «Послушаи, Святая, аще кому загорится храмина на четверо, и обыдеть и огнь и згоритъ не мога востати, таковъ не имать греха».