Ответ. Еже стяжати совершенное смиренномудрие, брате, научи Господь, глаголя: «научитеся от Мене, яко кроток есмь, и смирен сердцем, и обрящете покой душам вашим» (Мф. 11, 29). Аще убо стяжати хощеши совершенный покой, уразумей, что Он претерпел есть, и претерпи, и отсецы во всех волю твою. Сам бо рече: «снидох с небесе, сотворити не волю Мою, но волю Отца Моего, Иже на небесех» (Ин. 6, 38). Сие же есть совершенное смиренномудрие, еже сносити укоризны и поношения, и елика пострада Учитель наш Иисус. Молитва же совершенна есть, еже глаголати Богови без парения, внегда собирати вся помыслы с чувствами. Наставляет же в сие человека, еже умрети от всякаго человека, и умрети мирови, и всем сущим в нем. И ничтоже вящше должен еси глаголати Богови в молитве, разве сие: избави мя от лукаваго, да будет воля Твоя во мне: имети же ум, яко Богови предстояй, и Тому глаголяй. Познавается же егда пременяется от парения, и видит, яко веселится ум, просвещся во Господе. Знамение же, яко коснуся тоя, яко не ктому смущается, аще и напаствует его весь мир. Совершенне же моляйся есть умерщвляяй себе мирови и покою его. Творяй же Бога ради прилежне дело свое, сие несть парение, но тщание по Богу. Полезно же есть чести жития отец. Тако бо просвещается ум во Господе.
80. Тогожде к томужде, прошение молитвы о себе, и иже с ним.
Чада возлюбленная, целую вы о Господе, моляся Ему сохранити вас от всякаго зла и дати вам терпение, якоже Иову; и благодать, якоже Иосифу; кротость, якоже Моисеови; и мужество во бранех, якоже Иисусу Навину; и владение помыслов, якоже судиям; и покорение врагов, якоже Давидови и Соломонови царем; и крепость земли, якоже израилтяном, в примирении Его к вам дати грехов ваших оставление, со здравием телесным, якоже разслабленному; и да спасет вас от волнения, якоже Петра; и да избавит вас от скорби, якоже Павла и прочих апостолов; и да покрыет вас от всякаго зла, яко чада Своя искренняя; и да даст вам прошения сердца вашего, к пользе душевней и телесней, о имени Его. Аминь.
Вопрос 81, тогожде ко иному старцу, якоже явленно сотворити ему о мере воздержания.
Ответ Иоанна. Отцы глаголют о мере воздержания, еже быти без мала, или в ястии, или в питии: то есть наполнено чрево не имети. И ставити должен есть всяк варение и вино. Во время же зимнее, не пиет кто много; и к сему должно быти без мала; и в ястии такожде. Не есть же в сих единых мера воздержания, но и во глаголании, и во сне, и во одеянии, и во всех чувствах. В сих обретается мера воздержания.
Вопрос 82, тогожде к томужде старцу:
Рцы ми, отче, оное «без мала» пищи, или пития, или овощия, колико есть?
Ответ. От всея меры, глаголю же хлеба и иных снедей, или овощия, до единой без мала унгии. О вине же и воде, от обою мнее половины чаши. И аще внимаеши себе, и не трудишися, еже единожды напитися, добро ти есть: аще же не возможно, то дважды, отнюд без мала. В смущениих же и бранех помыслов, от обычнаго подобает уймати без мала: то есть, едину унгию пищи, и половину чаши от всего пития, якоже купно быти мнее двух унгий пищи и мнее единыя чаши пития. Помолися о мне, брате.
Вопрос 83, тогожде к томужде, како кто познает, колико требует ясти и пити?
Ответ. От всея меры, глаголю же хлеба, и иных снедей и овощия, от искуса всех дней возможно есть познати, что приемлет тело пищи и пития: яко пиет кто три чаши в день и яст едину литру хлеба. Аще же увидит, яко требует болше триех тело, без вины, или без труда болшаго, или яко сланая яде, то се есть брань. От триех убо, аще возможет, удержит единыя чаши половину, кроме брани: и в пищи подобне, от литры едину унгию.
Вопрос 84, тогожде, к великому старцу:
Молимся, отче, яко да речеши нам, оно, по силе человеку, колико есть, еже истяжется от Бога: еда како примешает кто в тое от своея слабости, и непщует, яко еже по силе, все творит. Како убо уразумеем тое слово, «по силе», истинно?
Ответ. Дал есть Бог разум человеку разсуждати вещи: аще есть кто от труда путнаго, или от инех тяжчайших дел, таковый не может равность инех дней сохранити, но снисходит мало телеси. Яко яст на день поллитры хлеба: и аще труда ради снесть еще едину унгию, силу свою сотворил есть, еже не ясти вящше. Бдит ли же от полунощи на всяк день? Аще почиет другий един час труда ради, то еже по силе сотворил есть. Труда убо знамение есть, еже препокоити себе мало, якоже речеся: и паки бдети обычно бдение. Еже убо творити елико по силе есть, еже быти без мала, или в пищи, или в питии, или во сне. Аще ли же речеши: и колика есть мера сну? Уставиша отцы пол нощи. О пищи же, еже блюсти себе еще хотяща, и сице выну мало приимати.
Вопрос 85, тогожде к иному старцу:
