Ответ. Брате, о всех возницающих помыслех не должно вопрошати: мимоходяще бо суть; но о пребывающих и борющих человека. Якоже бо человек от многих досаждаемь, небрежет тех досаждений, и бывает без попечения от всех их: аще ли же кто востанет нань, или ратует его, тогда доносит ко князю: тако и вещь сия. О молитве же и псалмопении: не точию умом, но и устнами потребно есть пети. Зане пророк Давид глаголет: «Господи, устне мои отверзеши, и уста моя возвестят хвалу твою» (Пс. 50, 17). И апостол такожде, показуя, яко ищутся устне, рече: «сердце и плод устен» (Евр. 13, 15) и прочая. И о нихже видел еси, или слышал, или содеял, и помышляеши та: ничтоже отсецает сия, разве молитва со смирением и со труды и слезами бываемая, не имущая воли отнюд. Исправлшии бо сие отцы без трудов и слез и отсечения воли, не исправиша. А еже обучатися, вменяемость есть и равность: вопрошати же и веровати ответом, смирение есть, и успеяние о Господе. Помолися о мне, брате.
91. Ин некий старец вопроси тогожде старца:
Како кто блюдет сердце свое? и киим образом бывает брань вражия? и должен ли кто вопреки глаголати к борющему? и о помысле блуднем, подобает ли заградити вход его? аще ли же внидет, то что подобает творити? и о пище, унгиями ли должен кто употребляти ю или разумом и хранением?
Ответ. Блюсти сердце есть, еже имети трезвен ум, и чист от помысла наводящаго брань. Первее же бывает в презрении помысл его, и егда видит враг презоривость, тщится ввести брань. И аще разумети хощеши, враг ли есть или друг, сотвори молитву и вопроси и: наш ли еси или от супостатов? И отвещает ти истину. Предателство убо бывает от нерадения. Не пререкуй же, сего бо хотят, и не престанут: но приступи ко Господу на них, повергая пред Ним немощь свою: и Той может неточию отгнати, но и упразднити их. О бесе же блуднем: добро убо есть весьма, еже заградити вход его: аще ли же восхищаешися, и внидет, то подвизайся противу ему, повергая немощь твою пред Богом и моляся Ему, и ижденет и. А о снеди, о ней же рекл еси: от разума и хранения устави житие свое и помолися о мне, любве ради.
92. Тогожде к томужде старцу. Откуду отягчается сердце мое, и есть во мне сон безмерный, и ни едино есть ми умиление?
Ответ. Сия приходят безмолвствующему всячески да уныв бегает подвига и отчает себе. Мы же повержем неможение наше пред Могущим вся сотворити по преизбыточествию, ихже просим или разумеем: дондеже сокрушит сонмища аммореов пред нами, и не оставит Мадиама, и Амалика, и сынов восточных, потребити плоды наши, но потерпим помощию Владыки нашего Бога, силнейш бо есть тех: и спасемся.
Вопрос 93, тогожде к томужде: Откуду нощию во инех лицах мечтания бывают ми, днию же во инех брань приемлю? Случается же, яко и кроме лица: и паки случается, яко со сластию, и кроме сласти мечтанию бывати.
Ответ. Ратующии днию, тии ратуют и нощию: являюще, яко еще имут тя в руках своих: и тиижде преобразуются во ина и ина. А еже овогда убо со сластию бывати, овогда же без сласти, от преобразования тех есть, якоже уже рех: да приидет человек той в недоумение и смятение. Сугуба же есть нощная брань: есть от сластей пострадати сие, и есть от искушения диаволя, во еже привести кого во отчаяние, яко мнети ему не ктому имети спасение. Егда убо случится тебе искушение брани сея, твори седмижды по седми коленопреклонений, сиречь 49 коленопреклонений, глаголя на коемждо: «Господи, прости мя за имя Твое святое». Аще же належит немощь, или неделя, егда не достоит творити коленопреклонения, глаголи слово сие седмьдесят крат, вместо 49-ти коленопреклонений. Различие же искушений сие есть: еже искуситися от диавола, от возношения бывает, а еже от сластей, от чревообъядения.
Вопрос 94, тогожде к томужде: Аще бывшу нощному мечтанию, будет за утра святое причащение, что подобает сотворити?
Ответ. Приступим, яко уязвленнии, и не яко преобидяще, но яко требующе врача: и исцелит нас Исцеливый кровоточивую. И возлюбим много, да и нам вставится много. И егда хощеши причаститися, глаголи сие: да не будут ми Святая сия, Владыко, в суд или во осуждение: но во освящение души и тела. И тогда приступи со страхом: и человеколюбив есть Владыка наш Бог, еже сотворити с нами милость Свою. Аминь.
Вопрос 95, тогожде к томужде: Понеже рекл ми еси, отче, во ответе, яко в нощи случающаяся человеку, ова убо суть от возношения, по искушению диаволю; ова же от сластей чревообъядения: убо возможно ли есть диаволу воздвигнути сие в человеце от зависти точию, ниже возношающуся тому, ниже сластолюбствующу? И како должен есть кто познати, естественне ли бывает в нем движение в нощи? И естественное движение страждут ли совершении? И должно ли преклоняти колене в Пятидесятнице или ни?
