Незаходи́мое Со́лнце / из Де́вственных ложе́сн возсия́ти и́дет, / просвети́ти всю подсо́лнечную, / чи́стыми очесы́ и чи́стыми дея́ньми / сре́сти Сего́ потщи́мся / и подъя́ти ны́не угото́вимся ду́хом / гряду́щаго во Своя́ стра́нным рождество́м, я́коже благоволи́, / я́ко да устра́ншияся ны еде́мскаго жития́ / возведе́т, я́ко Благоутро́бен, / в Вифлее́ме ражда́ется.
На плеща́х носи́мый Херуви́мских, / Бог Сло́во, пло́ти по Ипоста́си соедини́вся, / во всенепоро́чное чре́во всели́ся, и бысть Челове́к, / и на зе́млю гряде́т от Иу́дова пле́мене роди́тися, / верте́п свят Всецарю́ благоукраси́ся, / я́ко велича́йшая пала́та, / я́сли же, я́ко престо́л огнезра́чен, / в ни́хже я́ко Младе́нца Де́ва Мари́я полага́ет, / во обновле́ние созда́ния неопределе́ннаго.
В безслове́сных я́слех Тя полага́ет Де́ва, / Бо́жие Сло́во Безнача́льное, / нача́ло прие́мшее па́че ума́, / мое́ бо разреши́ти безслове́сие гряде́ши, / е́же подъя́х за́вистию змии́ною, / пелена́ми же пови́тися, / я́ко да расто́ргнеши ру́бы и плени́цы прегреше́ний мои́х, / Еди́не Бла́же и Человеколю́бче. / Те́мже Тя сла́влю, / пою́ и покланя́юся прера́достно во пло́ти прише́ствию Твоему́, / и́мже свободи́хся.
Яви́ся мíра конце́м пра́отцев па́мять, / све́та и́стинно испо́лнена и заря́ми благода́ти сия́ющи: / Христо́с бо, со́лнце све́тлое, / свы́ше просия́в издале́ча, / звезд собо́р веде́т, с Ним возсия́вший, / и Рождество́ Богочелове́чное / явля́ется внутрь Вифлее́ма бы́ти. / Вси, у́бо ве́рою Сего́ Рождество́ / благоче́стно пле́щуще, лику́им / хвалу́ предпра́зднственную.
Сла́вою украша́ется / Боже́ственнаго прича́стия / Ада́м, ра́дуяся днесь, / я́ко основа́ние и утвержде́ние пра́отцев му́дрых, / совзыгра́ет же А́вель, и Ено́х весели́тся, / и лику́ет Сиф и Но́е ку́пно; / с патриа́рхи же пое́т Авраа́м всехва́льный, / и рожде́ние без отца́ ны́не Мелхиседе́к ви́дит свы́ше. / Те́мже Боже́ственную па́мять Христо́вых пра́отцев / и мы соверша́юще, мо́лим / спасти́ся душа́м на́шим.
Облиста́ ве́село / и́же в пещи́ дете́й Богому́дрых собо́р / и Христо́во Рождество́ пропове́дует на земли́; / я́ко бо честна́я роса́ низше́д, Госпо́дь / Ро́ждшую спаса́ет неопа́льну, / соблюда́ет непоро́чну / и обогаща́ет Боже́ственными дарова́нии. / Те́мже и Богоприя́тный / ра́дуется Дании́л, веселя́ся, / Ка́мень бо из Горы́ несе́чен прови́дя я́ве, / со дерзнове́нием мо́лится / ны́не о душа́х на́ших.
Слава,
И ныне,
Верте́пе, благоукраси́ся, / А́гница бо гряде́т, чревонося́щи Христа́, / я́сли же, подыми́те / сло́вом разреши́вшаго от безслове́снаго дея́ния нас, земноро́дных. / Па́стырие, свиря́юще, свиде́тельствуйте чудеси́ стра́шному, / и волсви́ от Перси́ды, зла́то, и лива́н, и сми́рну Царю́ принеси́те, / я́ко яви́ся Госпо́дь из Де́вы Ма́тере. / Ему́же и, прини́кше, ра́бски Ма́ти поклони́ся / и привеща́ше к держи́мому на объя́тиих Ея́: / ка́ко все́ялся еси́ Мне? / Или́ ка́ко прозя́бл еси́ во Мне, / Изба́вителю мой и Бо́же?
Слы́шав Авра́м, я́ко плене́н бысть Лот, брата́нич его́, сочте́ свои́х си домоча́дец три́ста и осмна́десять и погна́ во след их да́же до Да́на. И нападе́ на ня но́щию сам и о́троцы его́ с ним; и порази́ их, и гони́ их до Хова́ла, е́же есть ошу́юю Дама́ска. И возврати́ вся́каго коня́ Содо́мскаго, и Ло́та, брата́нича своего́, возврати́, и вся име́ния его́, и жены́, и лю́ди. Изы́де же царь Содо́мский в сре́тение ему́, повнегда́ возврати́тися ему́ от се́ча ходоллогомо́рскаго и с царьми́, и́же с ним, во удо́ль Сави́ну, сие́ же бя́ше по́ле царе́во. И Мелхиседе́к, царь Сали́мский, изнесе́ хле́бы и вино́, бя́ше же свяще́нник Бо́га Вы́шняго. И благослови́ Авра́ма, и рече́: благослове́н Авра́м Бо́гу Вы́шнему, И́же созда́ Не́бо и зе́млю, и благослове́н Бог Вы́шний, И́же предаде́ враги́ твоя́ под ру́ки тебе́.
