Во стра́ннем Твое́м Рождестве́ пе́рвее из Де́вы преесте́ственно удиви́л еси́, Сло́ве Бо́жий. / Ны́не же велича́ем, ве́лие та́инство соверша́я пресла́вно прича́стием честны́м, / купе́ль многоча́дну Боже́ственным Ду́хом.
Слава: Земля́ освяти́ся Рождество́м Твои́м святы́м, Сло́ве, / пове́дающим Небесе́м звездо́ю сла́ву Твою́. / Ны́не же водно́е естество́ благослови́ся, Тебе́ пло́тию кре́щшуся, / и род земноро́дных к пе́рвому взы́де па́ки благоро́дию.
И ныне: Да ра́дуется земля́ вся, Не́бо да весели́тся, / мiр да игра́ет, ре́ки да пле́щут руко́ю, / исто́чницы и езе́ра, бе́здны, моря́ да сра́дуются: / прихо́дит бо Христо́с Ада́ма очи́стити и спасти́ Боже́ственным Креще́нием.
Возвраща́шеся иногда́ Иорда́н река́ ми́лотию Елиссе́евою, / возне́сшуся Илии́, / и разделя́хуся во́ды сю́ду и сю́ду, / и бысть ему́ сух путь, и́же мо́крый, / во о́браз вои́стинну Креще́ния, / и́мже мы теку́щее жития́ прехо́дим ше́ствие: / Христо́с яви́ся во Иорда́не освяти́ти во́ды.
Весели́ся, реко́ Иорда́не, / в тебе́ бо всех Творе́ц прихо́дит во́лею / Креще́ние прия́ти от раба́, я́ко Благоутро́бен. / Красу́йся, лику́й, Ада́ме, и Е́во прама́ти: / прии́де избавле́ние всех, Бог Преблаги́й.
Слава, и ныне,
Пото́к сла́дости Влады́ка сый, предгряде́т во струя́х ре́чных крести́тися, / напои́ти мя хотя́ очище́ния вода́ми. / Его́же зря, Иоа́нн вопия́ше: / ка́ко ру́ку мою́ на верх Твой простру́, / Его́же трепе́щут вся́ческая?
Ада́мову наготу́ одева́я, Благоутро́бне, во оде́жду сла́вы, / хо́щеши обнажи́тися пло́тию во Иорда́не реце́. / О, чудесе́ пресла́внаго! / Ка́ко Тя поды́мет вода́, Влады́ко Го́споди, / вода́ми покрыва́ющаго превы́спренняя? – я́коже пи́шет. / Пое́м, Иису́се Благоде́телю, вси Твое́ явле́ние.
Слава, и ныне,
Ве́лие Со́лнце во Иорда́не просия́ти гряде́т, / е́же из Де́вы, из о́блака возсия́вшее, Христо́с Бог наш, / грехо́вный отгоня́ мрак и мíра просвеща́я концы́, / Его́же осия́ния получи́ти благоче́стно помо́лимся, / прося́ще прия́ти ве́лию ми́лость.
Христо́с гряде́т ко Креще́нию, / Христо́с ко Иорда́ну прихо́дит, / Христо́с на́ша в воде́ погреба́ет ны́не грехи́, я́ко Благ, / с весе́лием воспои́м Ему́, я́ко просла́вися.
Да кропя́т, веселя́щеся, о́блацы весе́лие ве́чное: / Христо́с Иису́с предгряде́т вода́ми Иорда́нскими пото́ки грехо́вныя потопи́ти, / просвеще́ние всем да́руя.
Се Свет явля́ется, / се Очище́ние показу́ется, / се Спас предстои́т просия́ти су́щим во тьме Боже́ственныя зари́. / Сего́ помышле́ньми чи́стыми ра́достно поды́мем.
Гряди́те, ве́рнии, согла́сно пра́зднуим препросла́вленную па́мять страда́льцев, / в пе́снех духо́вных славосло́вяще Христа́.
Страстоте́рпцы Христо́вы и ве́ры тве́рдии побо́рницы, / на нече́стие ополчи́вшеся кре́пко, враги́ победи́ша.
Нечести́вый гони́тель и ве́ры Христо́вы чуждь, / на страстоте́рпцы разгне́вався, злочести́вый ве́рою упражня́ется.
