Венча́ти твою́ пе́сньми па́мять прихожду́, / тебе́ наде́явся, несмы́сленный и весь нечи́стый, / но даждь ми сло́во му́дрости и ра́зума твои́ми мольба́ми.
Весь ум к Боже́ственней высоте́ взе́мши / и благи́х бе́здну и наслажде́ний позна́вши бла́гость, / вся претерпе́ла еси́, приклю́чшаяся тебе́.
Слава: Ум к Бо́гу впери́вши Вы́шнему, / те́ло твое́, влеку́щее к до́льним, воздержа́нием и боле́зньми облегчи́ла еси́, / жела́ющи вели́кия сла́вы.
И ныне,
Пре́жде веко́в седя́й со Отце́м и Ду́хом, / ны́не в после́дняя из Де́вы вопло́щся, я́коже весть, / Христо́с гряде́т ко Креще́нию, / безсме́ртие Боже́ственною ба́нею всем подая́.
Водо́ю погребсти́ на́ша грехи́ хотя́ во Иорда́нских струя́х / за милосе́рдие ми́лости, Христо́с Бог предгряде́т / и назида́ет истле́вшия ны Креще́нием.
Обнаже́ние сту́дное покрыва́я Ада́ма пра́отца, / обнажа́ешися во́льно и струя́ми Иорда́нскими Тебе́ Сама́го покрыва́еши, / вода́ми превы́спренняя покрыва́я, Христе́, Еди́не Многоми́лостиве.
Благоче́стия и ве́ры предста́тели, Боже́ственныя страда́льцы восхва́лим, / Феопе́мпта и Фео́ну пресла́внаго.
Пра́вило, и о́браз, и начерта́ние я́вльшеся, Христо́вы великому́ченицы, / святы́х бы́ша путевожди́ ко страда́нию.
Ревну́юще сих доброде́тельному жи́тельству, му́ченицы, / ку́пно на суди́щи предстоя́ще, взыва́ху: / христиа́не есмы́ вси.
Не пощаде́ла еси́ пло́ти мно́гими я́звами, / ниже́ весьма́ неоде́ржно друча́емыя, к боле́знем воздержа́ния, / искуси́тель в ни́хже отрева́шеся.
Ше́ствие те́сное жи́зни хода́тайственно нетле́нныя и Боже́ственныя ты изво́лила еси́, / широ́кое оплева́вши, / его́же ничто́же го́рше вои́стинну ум иму́щему.
Слава: Горя́щу ю́ностному цве́ту отбеже́ тесното́ю и боле́зньми воздержа́ния / и пале́ние оче́с твои́х сле́зными тече́нии угаси́л еси́.
И ныне,
Всех, Христе́, Благоутро́бне, оте́мляй прегреше́ний мно́жество / ми́лости ра́ди безме́рныя, / Иорда́нскими вода́ми крести́тися гряде́ши, я́ко Челове́к, / оде́ждею мя одева́я, / сла́вы дре́вния обнаже́нна лю́те.
Феопе́мпт, яви́вся святи́тель су́щих до́ле, / с Фео́ною ку́пно тве́рдым и сострада́льцем, / мучи́телем противле́ния не терпя́щим, ураня́ется: / Тя, – ра́дуяся, вопия́, – чту Еди́наго, / погре́бшаго во Иорда́нских струя́х земны́х прегреше́ния.
По́стных превзошла́ еси́ ты терпе́ния боле́знь, / на Небесе́х наслажда́ешися бо́льшия оби́тели / и лу́чшия зари́ испо́лнилася еси́, / зане́ му́жески жесто́кий ше́ствовала еси́ путь, победи́вши настоя́щая, / и А́нгелом уподо́билася еси́, / и ны́не сла́вы причаща́ешися тех.
Слава, и ныне,
Вели́кий Дождь к ре́чным струя́м предгряде́т, / пло́тию крести́тися восхоте́в. / К Нему́же Боже́ственный Предте́ча, ужаса́яся, глаго́лаше: / ка́ко крещу́ Тя, скве́рны не иму́ща весьма́? / Ка́ко простру́ мою́ десни́цу на главу́, ея́же трепе́щут вся́ческая?
Во́ду почерпи́те Жи́зни, / се ны́не прии́де ми́ра Река́ и́стинно / изсуши́ти му́тныя неве́рия во́ды и просвеще́ние источи́ти пою́щим Ему́: / сла́ва си́ле Твое́й, Го́споди.
