Новому́ченицы Росси́йстии, / кро́вию свое́ю ве́ру запечатле́вшии, / Влады́ку всех моли́те / Це́рковь Ру́сскую в Правосла́вии утверди́ти, / зе́млю на́шу от скверн очи́стити, / лю́ди во благоче́стии сохрани́ти / во о́бщее всех спасе́ние.
Сла́ва, и ны́не,
И́же в земли́ Росси́йстей новому́ченик и испове́дник Твои́х, / я́ко багряни́цею и ви́ссом, / кровьми́ Це́рковь Ру́сская украси́вшися, Христе́ Бо́же, те́ми вопие́т Ти: / лю́дем щедро́ты Твоя́ низпосли́, / мир жи́тельству Твоему́ да́руй / и душа́м на́шим ве́лию ми́лость.
Сла́ва, и ны́не,
Велича́ем вас, / святи́и новому́ченицы и испове́дницы Росси́йстии, / и чтим честна́я страда́ния ва́ша, / я́же за Христа́ / претерпе́ли есте́.
1 Бог нам Прибе́жище и Си́ла.
2 Помо́щник в ско́рбех обре́тших ны зело́.
1 Сего́ ра́ди не убои́мся, внегда́ смуща́ется земля́.
2 Бо́же, кто уподо́бится Тебе́; да не премолчи́ши, ниже́ укроти́ши, Бо́же.
1 Я́ко се врази́ Твои́ возшуме́ша, и ненави́дящии Тя воздвиго́ша главу́.
2 На лю́ди Твоя́ лука́вноваша во́лею, и совеща́ша на святы́я Твоя́.
1 Положи́ша тру́пия рабо́в Твои́х, бра́шна пти́цам небе́сным.
2 Пло́ти преподо́бных Твои́х звере́м земны́м.
1 Пролия́ша кровь их я́ко во́ду.
2 Я́ко Тебе́ ра́ди умерщвля́еми есмы́ весь день.
1 Вмени́хомся я́ко о́вцы заколе́ния.
2 Положи́л еси́ нас в при́тчу во язы́цех.
1 И бых я́звен весь день.
2 Разже́гл еси́ ны, я́коже разжиза́ется сребро́.
1 Проидо́хом сквозе́ огнь и во́ду, и изве́л еси́ нас в поко́й.
2 Весели́теся о Го́споде, и ра́дуйтеся пра́веднии.
1 Я́ко Госпо́дь в ро́де пра́ведных.
2 И насле́дие их в век бу́дет.
1 Воззва́ша пра́веднии и Госпо́дь услы́ша их.
2 Свет возсия́ пра́веднику и пра́вым се́рдцем весе́лие.
1 В па́мять ве́чную бу́дет пра́ведник.
2 Святы́м, и́же суть на земли́ Его́, удиви́ Госпо́дь вся хоте́ния Своя́ в них.
1 Ди́вен Бог во святы́х Свои́х.
2 Пра́ведник я́ко фи́никс процвете́т, я́ко кедр, и́же в Лива́не, умно́жится.
1 Возвесели́тся пра́ведник о Го́споде и упова́ет на Него́.
2 И похва́лятся вси пра́вии се́рдцем.
Сла́ва, и ны́не: Аллилу́иа,
Мужа́йся, Христо́ва Це́рковь, / и держа́вствуй над всу́е борю́щими, / Христо́ви бо дру́зи о тебе́ пеку́тся, / и предстоя́ще, и обстоя́ще, / и́хже о́бщий пра́здник / ны́не соверша́еши све́тло.
Сла́ва, и ны́не,
От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.
Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.
Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.
