Ору́жие непобеди́мое на разли́чная искуше́ния вра́жия иму́ще, вся́каго вражде́бных озлобле́ния избавля́емся при́сно, и́же Тя́, Богоро́дицу Чи́стую, ве́дущии.
Зако́на исполне́ние, Яже вы́шшая херуви́мов, родила́ еси́ Бо́жия из Тебе́ воплоще́нна Сы́на Единоро́дна, Его́же о рабе́х Твои́х умоли́.
Вся́ческих Творца́ на руку́ Твое́ю поне́сши, Сего́ на́м Твои́ми моли́твами благопреме́нна дава́й, ны́не от се́рдца к Тебе́ прибега́ющим.
Ты́ исто́чник Твои́х дарова́ний испи́ти весьма́, Человеколю́бче, да́л еси́ святы́м, ума́лен ника́коже истоще́нием, мiр же ве́сь упои́в и́же от чре́ва и́х боже́ственными пото́ки.
Что́ ми зла́то? Что́ ми бога́тство, и сла́ва, и могу́тство? Ды́мове, расходя́щиися по возду́ху: вся́ да изче́знут, вся́ да прено́сит ве́тр. Мне́ бога́тство еди́но многорачи́тельно – учи́телей тро́ица вити́йствующая.
То́чит река́ нетле́нную пи́щу и Боже́ственное питие́, то́чит а́лчущим безсме́ртное бра́шно и жа́ждущим нетле́нное питие́, вода́ жива́ во ве́ки и содержа́щая жи́вы пию́щия: вси́ многотеку́щия жи́зни насы́титеся.
Иже Боже́ственных веще́й и челове́ческих му́дрыя хитрецы́, и́же су́щих естества́ любои́стинне я́ве на́м извести́вшия и Зижди́теля те́х все́м сказа́вшия я́ко ле́по, благода́рными гла́сы восхва́лим.
Го́рькое и те́рпкое я́же ко спасе́нию лече́б услади́ша му́дрыми слове́с уче́ньми же, и хитростьми́, и благода́тьми, ду́ш боже́ственнии лечи́телие: наслажда́йтеся, вси́ благочести́вии, и, красу́еми, спаса́йтеся.
Слава: Молчи́т вся́ко сло́во, богопропове́дником глаго́лющим Боже́ственная, и удержава́ет над Ве́тхим заве́том Но́вый, предлага́ющий честны́я скрижа́ли, и́же в не́м законополага́ющих, к ни́мже причита́ется все́ ве́рных сосло́вие.
И ныне,
Спасе́ния приста́нище ве́дый тя́, пла́вая многопеча́льнаго жития́ пучи́ну, призыва́ю Тя́, Влады́чице, Ко́рмчая души́ моея́ бу́ди.
Чи́стаго жития́ отпадо́х ле́ностьми, ока́янный, но возведи́, Благослове́нная Всечи́стая, повеле́нием Сы́на Твоего́ сочета́вши.
Ми́лости Твоея́, Богоро́дице, сподо́би мя́, преми́лостиваго Сло́ва поро́ждшая, Иже Свое́ю кро́вию от тли́ челове́ки изба́вльшаго.
Сво́йства в Тро́ице три́ сбогосло́вите: нерожде́ние Отца́, Сло́ва же рожде́ние и Ду́ха исхожде́ние Сама́го.
Дне́сь до́му сему́ светоявле́нное спасе́ние: два́ бо и три́ со́бранныя Христо́с, во и́мя Свое́ почеству́яй, посреде́ прису́тствует си́х.
Неиспы́танна земна́я глубина́ к небе́сной высоте́, но от земли́ святы́я вознесе́ вы́шше небе́с небе́сное жела́ние.
Тро́ицу еди́нственную богосло́вити научи́хомся, Еди́ницу Тро́ичную пе́ти прия́хом, покланя́тися навыко́хом от отце́в Еди́ному Естеству́ Триѵпоста́сному.
Сло́во бе́ в нача́ле, ко Отцу́ Собезнача́льное, и Ду́х Бо́жий Бо́г бе́ Пребезнача́льный, про́сто, единосу́щно, соесте́ственно Божество́, я́ко боже́ственнии глаго́лют пропове́дницы.
