Минея праздничная полностью

Слава: Совокупля́ю, и разделя́ю, я́же совокупле́нне разделя́емая, Еди́но Неразде́льно помышля́ю и Три́ мню́: учи́тели прие́млю три́ богоно́сныя, та́ко увещава́ющия мя́ ве́ровати.

И ныне,Богоро́дичен: Безма́терний пре́жде пло́ти, безо́тчий же по воплоще́нии, Сы́н Отчий и Ма́терний, и́же сия́ нарица́яй па́че ума́ обоя́: Бо́гу бо подоба́ют чуде́с пресла́вная.

Катава́сия: Возопи́ к Тебе́, ви́дев ста́рец очи́ма спасе́ние, е́же лю́дем прии́де от Бо́га: Христе́, Ты́ Бо́г мо́й.

Конда́к, гла́с 2. Подо́бен: Тве́рдыя:

Свяще́нныя и боговеща́нныя пропове́дники, ве́рх учи́телей, Го́споди, прия́л еси́ в наслажде́ние благи́х Твои́х и упокое́ние: труды́ бо о́нех и сме́рть прия́л еси́ па́че вся́каго всепло́дия, Еди́не, прославля́яй святы́я Твоя́.

Икос: Кто́ дово́лен своя́ устне́ разве́рзти и подви́гнути язы́к к ды́шущим огне́м си́лою Сло́ва и Ду́ха? Оба́че толи́ко реши́ дерзну́: я́ко все́ преидо́ша челове́ческое естество́ си́и трие́ мно́гими и вели́кими дарова́ньми, дея́нием же и виде́нием, по обоему́ све́тлы превозше́дше. Те́мже зело́ вели́ких даро́в ты́я сподо́бил еси́, я́ко ве́рныя Твоя́ служи́тели, Еди́не, прославля́яй святы́я Твоя́.

Пе́снь 7

Ирмо́с: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Пресвята́я Богоро́дице, спаси́ нас.

На Кресте́ пригво́ждся, Иже из Тебе́ Воплоти́выйся, Богороди́тельнице, Ада́мово раздра́ рукописа́ние. Его́же ны́не моли́, Всенепоро́чная, все́х бе́д изба́витися ве́рою зову́щим: благослове́н еси́, Бо́же оте́ц на́ших.

Наде́жда блага́я, Засту́пница же ве́рных еси́, Влады́чице, и ны́не мо́лимся Тебе́, дарова́ти сострада́тельства пучи́ну все́м, на Тя́ упова́ющим и Сы́ну Твоему́ зову́щим: благослове́н еси́, Бо́же оте́ц на́ших.

Кра́сною оде́ждею спаси́тельных за́поведей, креще́нием оде́явся, оскверни́х ле́ностию, окая́нный, ны́не же Ти́ притека́ю, Де́во, оде́ждею прося́ весе́лия Тобо́ю па́ки облещи́ся.

Ин. Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Святи́телие Васи́лие Вели́кий, Григóрие Богослóве, Иоáнне Златоýсте, моли́те Бо́га о на́с.

Побежда́ется, блаже́ннии, и отбега́ет я́же пре́жде непостоя́нная де́рзость ересе́й: во́ск же, растаява́емый от лица́ огня́, любоде́ичное же вся́кое уче́ние показу́ется, ва́шим приража́ющееся огнедохнове́нным веща́нием.

Лжи́вых у́бо уклони́шася е́ллинских буесло́вий, увеще́ние же томи́тельство, е́же в челове́цех, еди́но избра́ша, под ни́мже и́стину си́и трие́ утверди́вше, си́це ве́сь со́нм ве́рных побежда́ют словесы́ и увещева́ют.

Богоро́дичен: В Тебе́ вся́ко прорече́ние воспочи́ и коне́ц прия́ше удивляю́щее глаго́лющия: из Тебе́ же светле́е и прорече́ний чудеса́ то́чат, Чи́стая, му́дрыя явля́юща сказа́тели.

Ин. Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святи́телие Васи́лие Вели́кий, Григóрие Богослóве, Иоáнне Златоýсте, моли́те Бо́га о на́с.

Молча́щии и зову́щии, ви́димии же и слы́шимии, доброде́тели и му́дрости, богоглаго́ливии, столпы́ бы́ша, де́лом и сло́вом вопи́ти повелева́юще: благослове́н Бо́г оте́ц на́ших.

Бо́жия гла́сы, свы́ше возгреме́вшия на́м пречу́дно, мо́лнии же лучи́, и́же ва́ша веща́ния прие́млюще, всему́дрии, ку́пно у́бо пое́м с ва́ми: благослове́н Бо́г оте́ц на́ших.

Слава: Испуще́ни бу́дут гра́ди от каменопра́щных язы́ков, сокруша́ющии гнила́я уче́ний, а́ще кто́ посреде́ де́рзнет суесло́вников, пра́вая не веща́я: благослове́н Бо́г оте́ц на́ших.

И ныне,Богоро́дичен: В Тя́, Де́во, всели́ся и по рождестве́ Де́ву оста́ви Иже устроя́яй стихи́и и претворя́яй естества́, я́коже хо́щет, Богороди́тельннце Мари́е. К Нему́же вопие́м с Тобо́ю, Всенепоро́чная: благослове́н Бо́г оте́ц на́ших.

Катава́сия: Тебе́ во огни́ ороси́вшаго о́троки богосло́вившия, и в Де́ву нетле́нну все́льшагося Бо́га Сло́ва пои́м, благоче́стно пою́ще: благослове́н Бо́г оте́ц на́ших.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Пресвята́я Богоро́дице, спаси́ нас.

Сто́лп кре́пости тве́рд, и степе́нь, и храни́тельницу, и предста́тельницу стяжа́вше Тя́ ве́рою, спаса́емся ны́не. Пое́м Рождество́ Твое́, Пречи́стая, и превозно́сим во вся́ ве́ки.

Безсме́ртия проза́рный ве́мы Тя́ исто́чник, Богоро́дице, я́ко ро́ждшую Сло́во безсме́ртнаго Отца́, Еже вся́ от сме́рти избавля́ющее, превознося́щия Его́ во ве́ки.