Минея праздничная полностью

Рече́ Госпо́дь ко прише́дшим к Нему́ иуде́ем: ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник. А входя́й две́рьми па́стырь есть овца́м. Сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их. И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́. По чужде́м же не и́дут, но бежа́т от него́, я́ко не зна́ют чужда́го гла́са. Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им. Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м. Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы. Аз есмь дверь: Мно́ю а́ще кто вни́дет, спасе́тся, и вни́дет, и изы́дет, и па́жить обря́щет.

По 50-м псалме́.

Сла́ва: Моли́твами святи́теля Игна́тия, / Ми́лостиве, очи́сти / мно́жества согреше́ний на́ших.

И ны́не: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Та́же, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихи́ра, глас 6: Позна́л еси́ та́йну святы́я трапе́зы Госпо́дни / в сия́нии свети́ла вели́каго: / я́коже со́лнце, учи́л еси́, во вся́цей ка́пли росы́ отображе́но есть, / та́кожде и в трапе́зе Госпо́дни / ки́йждо приобще́н есть Христу́ всеце́ло по Божеству́ и челове́честву. / К сему́ же та́инству со стра́хом Бо́жиим и неосужде́нно приступа́ти / твои́ми моли́твами, свя́те Игна́тие, нас сподо́би.

Кано́н пра́здника на 6 и свята́го на 8.

Кано́н свята́го, глас 8.

Песнь 1

Ирмо́с: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре, / Изра́иля же беглеца́, пешехо́дца, спасе́, / песнь Бого́ви воспева́юща.

Припев: Святи́телю, о́тче Игна́тие, моли́ Бо́га о на́с.

Путь ду́ховный, к Бо́гу Жи́ву веду́щий, преше́л еси́, святи́телю Игна́тие, / я́сно указу́я нам, ка́ко подоба́ет стезю́ жития́ земна́го преходи́ти, / уче́нию Христо́ву вне́млюще.

Пе́рвую степе́нь в ле́ствице доброде́телей Ева́нгельских, нищету́ духо́вную, узре́л еси́, о́тче, / и той после́довати, ту́ю возлюби́ти, / то́ю пути́ духо́внаго нача́ло полага́ти заве́т твой дал еси́.

Слава: Нищета́ ду́ха, рекл еси́, соль есть всех жертв духо́вных, / нищета́ бо ду́ха блаже́нство пе́рвое нарече́ся во Святе́м Ева́нгелии Христо́ве, / е́йже вси про́чии блаже́нства, кро́тость, милосе́рдие, се́рдца чистота́, после́дуют и е́ю соверша́ются.

И ныне,Богоро́дичен: Ма́ти Све́та, Пречи́стая Богороди́тельнице, / житие́ спаси́тельно на земли́ с Сы́ном и Бо́гом Твои́м соверши́вшая, / нас, недосто́йных, укрепи́, от грехо́в изба́ви и к пра́вде ве́чней ше́ствовати утверди́.

Катава́сия пра́здника.

Песнь 3

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Припев: Святи́телю, о́тче Игна́тие, моли́ Бо́га о на́с.

Пра́вду Христо́ву в житии́ свое́м воспису́я, святи́телю Христо́в Игна́тие, / обре́л еси́ на пути́ сем, е́же пла́кати и рыда́ти о соде́янных злых / и к Спаси́телю мíра притека́ти.

В ю́ности пла́чем и́ноческим го́рце воспла́кал еси́ в ке́ллии свое́й / о разруше́нии хра́ма се́рдца челове́ческаго, / Бо́гом созда́ннаго Богослуже́ния возвы́шеннаго ра́ди, о плене́нии души́ и ума́, / от сих же всех то́кмо еди́нем Богочелове́ком Спаси́телем изба́вимся.

Слава: И па́ки плач стяжа́л еси́, о́тче, в и́ночестем житии́ твое́м, / егда́ вся прегра́ды, от Бо́га удаля́ющия тя, препобеди́л еси́. / Сего́ пла́ча ра́ди помяни́ нас, чту́щих святу́ю па́мять твою́.

И ныне,Богоро́дичен: Де́во Пречи́стая, печа́ли на́ша и ско́рби утоля́ющая, / плач спаси́тельный подава́й нам, / да о бе́здне зол на́ших и непра́вд воспла́чем пред Тобо́ю.

Катава́сия пра́здника.

Конда́к и и́кос пра́здника.

Седа́лен, глас 3: Поуча́л еси́, о́тче достохва́льне, / я́ко моли́тву чи́сту стяжа́ти, та́же чу́вство покая́ния и пла́ча возлюби́ти / дово́льно есть, во е́же спасе́ние ве́чное улучи́ти, / его́же и нас, гре́шных, сподо́би моли́твами твои́ми, свя́те.

Сла́ва, и ны́не,пра́здника.

Песнь 4

Ирмо́с: Ты моя́ кре́пость, Го́споди, / Ты моя́ и си́ла, / Ты мой Бог, Ты мое ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти / си́ле Твое́й сла́ва, Человеколю́бче.

Припев: Святи́телю, о́тче Игна́тие, моли́ Бо́га о на́с.

Та́йны жития́ и́ноческаго взыску́я, блаже́нне Игна́тие, / позна́л еси́, я́ко ка́ятися подоба́ет и труд и́ноческий ничто́же и́но есть, / е́же де́лание непреста́ннаго покая́ния.