Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, я́ко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́м с не́ю я́ко три ме́сяцы, и возврати́ся в дом Свой.
Сла́ва: Моли́твами Богоро́дицы, / Ми́лостиве, очи́сти / мно́жества согреше́ний на́ших.
И ны́не,
Ра́достно, Чи́стая, ны́не наста́вшее хвале́ние приноша́ю, ра́дуяся, / и ти́хим гла́сом, Одиги́трие, вопию́ Ти: / ра́дуйся, и испо́лни мя ра́зума, пе́ти начина́юща.
Христа́ роди́вшая, ра́дость нам ве́чную, о, ра́дуйся, Всепе́тая, / правосла́вных наде́жда, Одиги́трие, Всепе́тая Деви́це, / ра́дости испо́лни мя, мíрови жела́нныя.
Лику́ют вси челове́цы и А́нгели, / всегда́ согла́сно вопию́ще, на Небеси́ и на земли́, Одиги́трие: / ра́дуйся, Деви́це, ра́дости бо рождество́м Твои́м вся́ческая испо́лнила еси́.
Ра́дость, Одиги́трие, со стра́хом Ти вопию́щих ра́дости сподо́би, Ма́ти су́щая ра́дости, / избавля́ющи скорбе́й вся́ческих, / и всех поми́луй, к Тебе́ прибега́ющих.
Благогове́ют Ти, Богоро́дице, А́нгелов нача́льницы, и святы́х чи́ни че́стно слу́жат, / пра́веднии красу́ются, Небе́сных Хода́таицу блажа́т Тя, / ку́пно же и земля́ и Не́бо в весе́лии све́тло восхваля́ют Тя, / и мы, гре́шнии, ми́лости про́сим: / озари́ на́ша сердца́, Влады́чице, / воспе́ти песнь святы́я Твоея́ ико́ны явле́нию.
Прииди́те, собери́теся, христоимени́тии лю́дие, умы́ та́йно очи́стившеся, / во святу́ю це́рковь Ма́тере Христа́ Бо́га на́шего, / источа́ет бо нам неоску́дно от святы́я ико́ны исто́чник духо́вен, / целе́бен душа́м и те́лом, песнь вопию́щим: / благослове́н из Тебе́ рожде́йся Бог наш.
Слава: Диви́т, Пренепоро́чная, и ужаса́ет всяк слух / стра́нно чу́до Боже́ственнаго Твоего́ рождества́: / Херуви́мскаго Творца́ зачала́ еси́! / Ка́ко Огнь нестерпи́мый во утро́бе носи́ла еси́! / Ка́ко су́щую Жизнь пло́тию облекла́ еси́ / и Живо́т всему́ мíру родила́ еси́, Бо́га ку́пно и Челове́ка!
И ныне: Под кров Твой, Де́во Госпоже́, прибега́ем, вси ро́ди челове́честии, / просвети́ нас све́том Рождества́ Твоего́, / гре́шныя рабы́ Твоя́, моля́щияся приле́жно и кла́няющияся пречи́стей Твое́й ико́не, / прося́ще от Тебе́ прия́ти вели́кия ми́лости.
Христа́, Вы́шняго Царя́, о, ра́дуйся, непоколеби́мая, чи́стая и одушевле́нная пала́то! / Ра́дуйся, Одиги́трие, ра́дуйся: / Тобо́ю бо неруши́м наш град сохраня́ется.
