Отче наш Иоанне богомудре, страхом утвердився Божиим, начало премудрости разумел еси, паки же страх любовию изгнал еси, яко страх муку имать, якоже Апостол любве научил есть нас, любовию же Христу сраспявся, свойственнейший Ему быв; темже, отче наш, верных украшал еси разумы и Бога любити стадо твое научил еси. Христа Бога моли даровати и нам благодать сию и велию милость.
Господь сила сердца моего, Господь мой свет ума моего, Господь покой мой и радость моя, моя вера, надежда и любовь, сей есть пища моя и питие мое, одежда моя и покров. Вразуми убо и нас, отче святый, сия словеса твоя разумети и во Господе полагати спасение наше, подаждь и нам духа твоего, якоже Илия Елисею, да будет во Господе надежда наша, все упование наше.
Жива будет душа моя, Господи, и восхвалит Тя, сице глагола Давид пророк. Такожде и ты, святе, от стражи утренния до нощи пел еси. Научи убо и нас, заблудшее твое стадо, познати тя, пастыря добраго, и вслед гласа твоего ходити и непрестанно купно с тобою взывати: пою Богу моему, дондеже есмь.
Молящеся Духом Святым молимся, сего ради вся молитвы церковныя дыхание Духа Святаго суть и вси христиане рождение Его есмы. Прииди убо и вселися в ны, Душе Святый, помилуй и созижди вся ны, да будем вси едино Тело Христово. Такова бысть непрестанная молитва твоя, предивный Иоанне, отче наш, и послуша тя Бог и помаза тя елеем радости вечныя.
От пелен Господу присвоился еси, издетска смысл мужа совершенна стяжав и премудросте Божией возжелев, весь Божия обитель был еси, отче наш Иоанне благодатне.
Умом благодатию освященным Святей Троице предстоя, блаженне Иоанне, отче наш, небесными зарями сущия во тьме греховней просвещал еси, освети и нас светом твоего Боговедения.
Непостижимый свет почи в тебе, преподобие отче, и свещу пресветлу постави тя Господь среди тьмы греховныя. Темже и мы тобою научени благодатную память твою поем, Иоанне.
Союзом любве апостолы Твоя связавый, Господи, и отца нашего Иоанна, яко новаго благовестника любве Твоея поставивый, утверди и ныне, Спасителю наш, союз любве церковныя, да совокуплени поем Тя и неизреченную Твою благость.
Любовию Христовою уязвися, преподобие Иоанне, многи чада церковныя, яко отец ко Христу привел еси, сего ради память твою совершающе, Спасово утешение приемлем и благодать Его исповедуем.
Не презрел еси, отче Иоанне, ни странна, ни пришельца, но всем был еси благ и милости глубина, сирот отец и вдовам защита, нагих одеяние и алчущих пища. Помяни и нас, убогих чад твоих, и не отрини от благодатныя любве твоея.
Божественною силою укрепляем, победил еси невидимых врагов искушения и к свету невечернему приближился еси. Уврачуй и душ наших страсти и светом твоим облистай ны, яко врач и утешитель всем от Бога дан еси, Иоанне отче наш.
Слова Божия пламенный служителю, Иоанне Богодухновенне, ты вместилище веры Христовой был еси, сего ради Господь, якоже новаго Авраама, отца многих постави тя. Моли убо, отче святый, всем нам чадом Божиим быти и душам нашим спастися.
Преподобие отче Иоанне, во всю землю изыде вещание исправлений твоих: тем на Небесех обрел еси мзду трудов твоих, демонские погубил еси полки и ангельския достигл еси чины, ихже житию без порока и поревновал еси, дерзновение имея ко Христу Богу, мир испроси душам нашим.
КАНОН Святаго — по Уставу, его же краестрочие:
МОЯ ЖИЗНЬ ВО ХРИСТЕ, ЕМУ ЖЕ ПОЮ ВО ВСЯ ВЕКИ
