Пусты́нный жи́тель и в телеси́ а́нгел,/ и чудотво́рец яви́лся еси́, Богоно́се о́тче наш Авксе́нтие,/ посто́м, бде́нием, моли́твою Небе́сная дарова́ния прии́м,/ исцеля́вши неду́жныя, и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.
Наслади́вся, Богому́дре, воздержа́ния,/ и жела́ния пло́ти твоея́ обузда́в,/ яви́лся еси́ ве́рою сия́я,/ я́коже сад посреде́ рая́ процве́л еси́,/ Авксе́нтие о́тче свяще́нне.
Ублажа́ем тя,/ преподо́бне о́тче Авксе́нтие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
От пеле́н приле́жно Прему́дрость сестру́ себе́ сотвори́в, Богогла́се,/ пресве́тлую ви́дев, я́ко деви́цу чи́сту,/ ю́же прие́м, приведе́,/ я́ко мони́сты златы́ми, се́ю укра́сив свою́ ду́шу и ум,/ и обре́теся я́ко други́й Кири́лл, блаже́нне,/ ра́зумом и и́менем, му́дре.
Тве́рдым и Богодухнове́нным уче́нием/ просвеща́я мир пресве́тлыми заря́ми,/ обтече́, я́ко мо́лния вселе́нную, Кири́лле блаже́нне,/ разсева́я пресве́тлое Бо́жие сло́во,/ на за́паде, и на се́вере, и ю́зе, мир просвеща́я чудесы́.
Велича́ем тя,/ равноапо́стольне Кири́лле,/ и чтим боле́зни и труды́ твоя́,/ и́миже труди́лся е́си/ во благове́стии Христо́ве.
Фарисе́йскаго тщесла́вия удаля́лся,/ преподо́бие о́тче наш Ма́роне,/ на го́ру высо́кую возше́л еси́,/ и та́мо побе́ду показа́л еси́ на диа́вола,/ тре́бище бо бесо́вское обре́т и Бо́гу освяти́в,/ в нем пребы́л еси́,/ моли́твами твои́ми огневи́цу и тряса́вицу утоля́я,/ и бе́сы прогоня́я,/ и от разли́чных неду́г свобожда́я./ Того́ ра́ди, свя́те, моли́ся Христу́ Бо́гу,/ да спасе́т ду́ши на́ша.
Я́ко незаходи́мое со́лнце возсия́ нам днесь/ светоза́рными твои́ми моли́твами, преподо́бие о́тче наш Ма́роне,/ и́же не́кия горы́ дости́гл еси́,/ и та́мо на ней живу́щими нечести́выми чтом бысть,/ за превосходя́щую твою́ к Бо́гу доброде́тель,/ и та́мо обре́т тре́бище и́дольское, Бо́гу освяти́в, в нем пребыва́л еси́;/ и ви́дев Человеколю́бец Бог твой по́двиг и труды́,/ дарова́ тебе́ дар Свой,/ и́мже пронесе́ся и́мя твое́ в челове́цех,/ цели́ти ско́рби, огневи́цу и тряса́вицу прибега́ющим к тебе́ с ве́рою./ Те́мже и зове́м:/ ра́дуйся, цели́телю наш ско́рый;/ ра́дуйся, засту́пниче наш те́плый,/ предстои́ши бо у Пресвяты́я Тро́ицы,/ моли́ся Той о призыва́ющих и́мя твое́ свято́е,/ да изба́вимся от сих тя́жких скорбе́й и спасе́т ду́ши на́ша.
Пресве́тлое житие́ твое́, о́тче Ма́роне,/ а́нгелы удиви́ло есть/ и бесо́вская шата́ния я́ве устраши́./ Ве́рных же собра́ния све́тло украси́,/ к Небе́сному Христо́ву жили́щу повелева́я ше́ствовати всегда́./ Его́же моли́ от тли и бед изба́витися,/ ве́рою творя́щим всече́стную па́мять твою́.
Страсте́й пещь, преподо́бне, угаси́л еси́ воздержа́ния росо́ю,/ дарова́нием обогати́лся еси́ исцеле́ний от Бо́га, Ма́роне,/ прия́л еси́ цели́ти ве́рным боле́зни тя́жкия,/ и бесо́в отгони́ти полки́./ Сего́ ра́ди с весе́лием почита́ем тя.
Ублажа́ем тя,/ преподо́бне о́тче Ма́роне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Све́тлости святы́х наслади́тися вожделе́в,/ в те́мную всели́лся еси́ пеще́ру, прехва́льне,/ и до́бре подвиза́лся еси́, Исаа́кие,/ прельще́н же быв от врага́,/ па́ки кре́пко попра́л еси́ того́ вся кова́рства./ И ны́не, я́ко победи́тель,/ в весе́лии предстоя́ Христу́ Бо́гу,/ проси́ нам ми́ра и ве́лия ми́лости.
Вра́жию пре́лесть низложи́вша и в по́стничестве све́тло просия́вша,/ прииди́те, ве́рнии, восхва́лим Исаа́кия победоно́снаго,/ и́же, я́ко зла́то, во искуше́ниих просия́/ и просвеща́ет сердца́ ве́рно к нему́ притека́ющих,/ моля́ся Го́сподеви непреста́нно о душа́х на́ших.
Ублажа́ем тя,/ преподо́бие о́тче Исаа́кие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
