Агапии же убудивъ ся от съна и не виде корабля, ни малаго детища. И въставъ, оттуде приде въ места некая неведома. И обрете ту древа различьна, и цветы цвьтуща различьны, и овоща различьны, ихъже не виде никътоже николиже. Седяху же пътице на древехъ техъ, различьны имуща одежда. Овемъ бяше яко злато перие, а другыимъ багъряно, инемъ чьрьвлено, а другыимъ сине и зелено и различьныими красотами и пьстротами украшены. Другыя же белы яко и снегь. Вьсехъ бо гласи бяху различьни и щьбьтаху седяще друга къ друзе и пояху песни различьны — ова великъмь гласомъ, а другыя льгъкъмь гласомь, а другыя тънъкъмь гласомь и пениемь, ины же дивьнъмь гласомь яко бо каяжьдо по ряду ихъ и по подобию, песни же ихъ и слава велика, ако яже никъто же слышалъ на семь свете ни видети имать. Агапии же напослушавъ ся и напитавъ ся отъ овоща и испочивъ от труда. Глагола въ себе: «Сего ради Господь Богъ мои привелъ мя есть семо и не имамъ отити отсюду нъ обрящю си место подобьно, идеже вьртоградъ сътворивъ, и сьде животъ свои съконьчаю». И тако похажая къде сътворить вьртоградъ свои и обрете путь подъ овощьмь, и седе при пути глаголя: «Подобаеть человеку приити по пути сему, иже ми съкажеть места си кая суть». И поседевъ мало и узьре идуща 12 мужа въ белахъ ризах, идуща къ себе путьмь. Въздрадова ся радостию великою. И егда приближи ся къ нему, узъре Исуса въ славе велице. Въставъ же Агапии прииде къ нимъ. И егда хоте поклонити ся рещи: «Добре вы буди путь», тъгда великыи мужь рече: «Съдравъ ли еси, Агапие, и чьто есть путь твои?» И рече Агапии: «Господь Богъ мои путь есть». И постоявъ мало Агапии виде окрьстъ его лиця человечьска многа и пътиця перьнаты, и песни и славу велику. И падъ поклонихъ ся предъ нимь глаголя: «Господи, къто ты еси и сия 12 мужа? И яко вижю окрьст тебе лиця человечьска мънога и пътице перьнаты и славу велику, и сия места кая суть, въ нихъже се азъ есмь?» Рече же великыи мужь: «О Агапие, почьто тако дьрьзаеши и почьто мене въпрошаеши, нъ обаче съкажю ти вься да ся не блазниши: азъ есмь глас, глаголавый тебе въ манастыри: “Изиди въ путь мои”, азъ есмь орьлъ, иже стеньмь путь тебе казахъ. Азъ есмь детищь малыи, иже тя чресъ море превезохъ. Азъ есмь Господь Богъ Творьць небу и земли и вьсея видимыя и невидимыя. Си же 12 мужа апостоли суть. Си же лица, яже видиши херовими и серафими суть. Слава же си юже видиши, въсылаема есть седящуму на семемь небеси. Места же си раиская суть. Овоща же си пища апостольская и правьдьныихъ душь есть. Пътиця же, яже слышиши, небесьныя суть. Слава же ихъ и пения на небеса въсылаеть ся седящуму на престоле херовимьсте». Рече же Агапии: «Господи, помилуй мя и дажь ми да не излезу из древъ сихъ, нъ да сьде съконьчаю животъ свои». Господь же рече къ нему: «Несмь тебе сего ради привелъ семо, нъ оже рече: се, оставихомъ вься и въ следъ тебе идохомъ и чьто ны будеть, — то се, иди и узьриши Славу Божьства сего». И рече Агапии: «Господи, камо ми велиши ити?» И рече Господь: «Идеши по пути сему, по немуже мы приидохомъ к тебе, и шьдъ приидеши къ стенамъ, яже суть от земле до небесе и обрящеши стьжицю малу и по стьжици тои идеши. И обрящеши окъньце мало въ стене. И тълъкнеши въ не, и изидеть къ тобе человекъ старъ и поимъ тя въведеть въ стену, ижи ти съкажеть тамо вься. И егда изидеши и идеши пакы по стьжьце и доидеши лукы морьскыя и узьриши кораблиць малъ въ мори и 12 мужа въ немь и вълезеши къ нимъ, и доидете въ градъ въ ньже хотять ити. И егда изидуть гражане противу вамъ, изидеть и жена съ ними въ сквьрньнахъ ризахъ простовласа, и оже ти начьнеть велети, сътвори еи». Агапии же поклонивъ ся поиде по пути, по немуже настави и Господь. И шьдъ много обрете стену, яже стоить до небесе. И пришьдъ обрете стьжицю малу и по стьжици шьдъ обрете окъньце мало въ стенахъ и тълъкнувъ възьва. И изиде къ нему человек и рече ему: «Чьто есть путь твои?» Агапии же рече: «Богъ тъ мои путь есть». И рече ему: «Человек сьде не приходилъ въ плъти сы ни преже тебе, ни по тебе имать прити». Агапии же съказа ему вься, елико съказа ему Господь. И како изведенъ бысть изъ манастыря, и како орьлъ казаше ему путь стеньмь, и како преведенъ бысть море, и како явися ему Господь 12-те апостолома въ славе велице. «Отнюду бо посъла мя семо, рекъ: “Иди путьмь симь и обрящеши стены высокы и глядаи стьжице мали, по неи шьдъ обрящеши окъньце мало въ стене. И тълъкнувъ възовеши, и изидеть къ тобе человекъ старъ, иже въведеть тя тамо и съкажеть ти вься”». Рече же старыи человек: «Буди воля Господня» и имъ за руку Агапия проведе и стены. И егда въниде Агапии вънутрь, узьре светъ седмерицею светлеи сего света, очи же его не можаста зьрети на светъ. И паде ниць на земли.
