Ответ 2, тогожде великаго старца к нему, предвозвещающ ему различныя последующия ему скорби, и телесную немощь, и еже от сих души преспеяние.
Рцы брату Иоанну: утверди сердце твое, аки тверд камень: камень же глаголю мысленный, ко еже мощи услышати, яже имам глаголати. Внемли убо себе, да не когда услышав сие, вознесешися в сердце твоем, и отпадеши духовнаго обетования. Многих бо погуби напыщение и от достигших в меру. Но уготови себе на благодарение о всех, послушав святаго апостола глаголюща: «о всем благодарите» (1 Сол. 5, 18): аще убо в скорбех, или в нуждах, или в теснотах, или в немощех, и трудех телесных: о всех находящих на тя, благодари Богови. Уповаю бо, яко и ты имаши приити в покой Его (Евр. 4, 3). Многими бо скорбми подобает нам внити в Царствие Божие. Да не усумнишися убо душею твоею, и да не разслабееши сердцем твоим в чем. Но поминай апостольское слово: «яко аще и внешний наш человек тлеет, обаче внутренний обновляется по вся дни» (2 Кор. 4, 16). Аще убо не претерпиши страсти, приити на крест не можеши. Егда же подымеши во первых страсти, внидеши в пристанище покоя его, и имаши прочее безмолвствовати со многим безпопечением: имый душу утверждену, и прилепившуся Господеви выну, верою стрегому, упованием радующуся, любовью веселящуся: святою и единосущною Троицею храниму: и тогда исполнится над тобою реченное: да возвеселятся небеса, и да радуется земля. Сия бо есть безпопечения жизнь человека Божия. Радуется бо Отец, и Сын, и Святый Дух о спасении души твоея, возлюбленный брате мой.
Ответ 3, инаго старца, к тому же, просящу беседовати с ним.
Рцы братови: прости мя Господа ради, яко желаю увидети тя, но за совесть иных не обретаю свободы: сорадуюся же любви твоей, о посылаемых тебе от святаго старца благословениих, и блажен еси сих сподоблься.
4. Искушению подвигшусь на монахов места онаго, идеже пребываше авва Иоанн, прежде неже приити во общежитие, и хотящу двигнутися тамо смущению, сущу ему ту, сие предвидев великий старец духом, пишет ему сия:
Напиши братови Иоанну: се посылаю ти три свидетельства от силы Божия, и от писаний Святаго Духа, имиже возбуждаю твой ум в бодрствование Божественное и в разумение Святаго Духа: во еже познати тебе яже о настоящем времени, что есть: Первое свидетельство сие есть: рече Бог чрез святаго пророка Исаию: «Идите, людие мои, внидите в храмину вашу, затворите двери своя, укрыйтеся мало, елико елико, дондеже мимо идет гнев Господень» (Ис. 26, 20). Второе же свидетельство сие есть: «Изыдите от среды их, и отлучитеся, и нечистоте не прикасайтеся, глаголет Господь; и Аз прииму вы, и буду вам во Отца, и вы будете ми в сыны и дщери, глаголет Господь Вседержитель» (2 Кор. 6, 17). Третие свидетельство: «Блюдите, како опасно ходите, не якоже не мудри, но якоже премудри, искупующе время, яко дние лукави суть» (Еф. 5, 15–16). Аз же глаголю ти: тецы на предлежащая ти, и соверши дело твое вскоре, поминая Господа твоего, глаголюща: «никтоже возложь руку свою на рало, и обращся вспять, управлен есть в Царствии Небеснем» (Лк. 9, 62). Аз бо вижду безмолвное твое житие, ожидающее тя о Христе Иисусе Господе нашем, Емуже слава вовеки. Аминь.
Ответ 5, тогожде великаго старца, ко авве опечалившуся, яко закосне приити авва Иоанн, и от сего вознепщевавшу, яко уже не приидет.
Да не скорбиши, чадо, ниже да возпечалуеши о брате нашем: ибо аще и отстоит телом, но предстоит духом, и с нами есть выну: единодушен бо нам есть, и никтоже его разлучит от любве нашея, от ныне и до века.
6. Послание тогожде великаго старца, написано к авве Иоанну, творящу во стране своей некия потребы общежитию, и стужаему от телесныя брани.
