Напиши братови: яко еще еси вне, творя труд твой по силе твоей, Бога ради, и душ ради братних: паче же нашего ради и твоего покоя и безмолвия. Аще бо упокоятся братия, и покровени будут нами, то и мы чрез них обрящем совершенное безмолвие. И исполнится на нас слово писанное: «Брат от брата помогаем, яко град тверд и огражден» (Притч. 18, 19). Отсецы вся усвоения и извинения, яже имаши, яко еси вне: и да не оставиши вины, ниже усвоения с неким, влекущаго тя на задняя. Аще бо не тако, то не безмолвствуеши совершенным безмолвием. Тако бо и мы сотворихом. Аще убо сия имаши творити, совершенно надеюся, яко безмолвствовати будеши. Ибо с нами, Богу содействующу, будет жребий твой, и часть с нами во век. Никтоже да увесть ныне пишемая тебе.
Творя убо труд сей, аще убо благопоспешна будет вещь пред тобою, благодари Богови и молися Тому. Сие бо есть оно: «о всем благодарите» (1 Сол. 5, 18). И да не вознерадим воздавати благодарение Богови. Якоже он, о немже рекл еси некогда притчу: яко отхождаше помолитися в церковь о устроении пищи, и срете его некто единою, глаголя: яко обедуй днесь со мною, таже иди помолися. И рече: не иду; сего бо отхождах просити у Бога. Но мы, аще обрящем аще не обрящем, молитву и благодарение да воздаем Богови. И блюди еже носити мертвость Иисуса в теле своем выну.
Ответ 7, тогожде великаго старца к томужде, имущу отыти с братиею собрати рукоделие и убоявшуся пустыни мест оных: и напоминание еже трезвитися ему противу стужающия ему телесныя брани: и обещание содействия Божия, ко тщимому им к ним отшествию.
Рцы позванному свыше Божественным мановением к нам жити: не точию в нынешнем веце, но и в будущем, брату нашему искренню и единодушну Иоанну: рече Владыка наш Христос Своим учеником: «не две ли птицы ценятся единым ассарием? и ни едина от них падет на землю без Отца Моего, Иже на небесех. Вам же и власи главнии изочтени суть. Не убойтеся убо: мнозех птиц лучши есте вы. Всяк убо, иже исповесть мя пред человеки, исповем его и Аз пред Отцем Моим, Иже на небесех» (Мф. 10, 29–32). Внемли убо себе трезвенне, еже положити Бога пред тобою выну: да и на тебе исполнится пророческое слово: «Предзрех Господа предо мною выну, яко одесную мене есть, да не подвижуся» (Пс. 15, 8). Простри убо руце твои от всея души твоея на предлежащая тебе, и в сих поучайся выну: яко да услышиши глас Божий, к тебе глаголющ: «Се послю Ангела, Моего пред лицем твоим, иже уготовит путь твой пред тобою» (Мф. 11, 10).
8. Тойжде довольно потруждся, и не обрет рукоделия, печаловаше, и удивляшеся, како по глаголу старцеву не послан бысть Ангел пред лицем его. Не разумеваше бо, яко сие речеся ему ко удоборешению отшельствия. И сего ради пишет ему старец сия.
Напиши братови: елико есть корабль на мори, приемлет беды и приражение ветров. Егда же достигнет в пристанище безмолвное и мирное, не ктому имать страх бед и скорбей, и приражений ветров, но в тишине будет. Тако и любы твоя: елико еси с человеки, ожидай скорбей и бед, и приражения мысленных ветров. Егда же достигнеши во уготованная тебе, тогда без страха будеши. А о немже предрекох, яко рече Владыка наш: «яко се послю Ангела Моего пред лицем твоим», то послан бысть. А о том еже не обрести рукоделия, рече Бог в Моисейстей книзе: «Сего ради обыде тя, и наказа тя, и гладом замори тя, в пустыни оней страшней, да уразумеются яже в сердце твоем» (Втор. 8, 2). Разумей глаголемая ти от мене, и твердо труждайся и несумненно, возлюбленне брате.
9. Послание тогожде великаго старца к томужде, отшедшу на ответ общежития, и за еже многую обрести скорбь, пренемогшу.
