494. Прошение тогожде. Понеже грешен есмь, и несмь доволен, яко немощен телом, что-либо сотворит благо и угодно Богу: молю тя, Владыко, ты помолися о мне прогневавшем Его, и ничтоже якоже рех, могущем сотворити, немощи мне возбраняющей.
Ответ Варсануфия. Блажен еси, брате, аще отнюд ощущаеши, яко имаши грехи. Ощущаяй бо, всяко гнушается их и удаляется от них. И часть есть покаяния, еже ощущати я, и просити помощи от отцев молитвами ко Богу избавитися от них и от ожидающих его мук. Мы убо молимся, а ты сотвори силу твою стяжати смирение и покорение. И да не удержиши себе волю в чесом-либо: от того бо гнев раждается. И да не судиши, ниже да уничижиши кого: от сего бо изнемогает сердце и ослепевает ум: а оттуду приходит нерадение и рождается жестосердие. Но трезвися выну в поучении Божественнаго закона, от негоже согревается сердце небесным огнем. Глаголет бо: «и в поучении моем разгорится огнь» (Пс. 38, 4). И да не возпечалуеши: от Бога бо есть звание твое, брате: и да не уныеши, ниже да разслабеешии: не бо истязует тя Бог паче силы твоея, но по возможности. Сохрани уста твоя от праздна словесе, и суесловия, и еже не поучатися в сердце твоем в злых словесех. И повержи силу свою с молитвою святых пред Богом, глаголя: «Милостив буди мне грешному» (Лк. 18, 13). И помилует тя, и сохранит тя, и покрыет тя от всякаго зла, еже приити от тмы во истинный свет, от прелести во истину, от смерти в живот, о Христе Иисусе Господе нашем, Емуже слава вовеки, аминь.
495. Прошение тогожде к иному старцу. Авво, Господа ради прости безстудству моему и безумию и помози ми множества ради грехов моих. Аще бо един грех содеваяй пред Богом требует многаго покаяния, что сотворю аз совоспитан со грехом, иже прогневляти Бога не престах по силе моей, и требую ваших молитв, да отступит от мене грех? И понеже требую часто учитися пути сему, человек от сретаний, и многих злых семо пришедый по многому благоутробию Божию: молю тя, отче преподобне, сотвори милость со мною и, якоже веси, настави мя. И помолися о мне, во еже хранити святыя твоя заповеди, яже мне повелеваеши творити.
Ответ. Брате, понеже к Распеншемуся нас ради приступил еси, то и ты возми крест свой и последуй Тому, возвергая на Него свое попечение творящаго по преизбыточествию, ихже просим или разумеем. Той бо печется о нас. Да не ужаснешися убо и поможет ти Христос. Точию же, чадо, имей во уме своем слово Божественнаго Писания и приуготовление, еже глаголет: «Сыне, аще приступаеши работати Господеви, уготови душу твою во искушение» (Сир. 2, 1). И: «яко муж без искушений непотребен». И паки: «блажен человек иже претерпит искушение: зане искусен быв» (Иак. 1, 12) и прочая. Не устрашая тя, брате, сия глаголю тебе, но утверждая сердце твое во страсе Божии на пути Божии. Тако бо преуспеша вси святии, искушении и скорбми многими, и благоугодиша спомогающей им благодати Божией. Да не убоишися, ниже да ослабееши. Веруем бо, яко Бог есть насаждаяй тя, и напояяй, и возращаяй, молитвами святых. Аминь.
Вопрос 497. Что сотворю, отче, яко стражду от блуда?
Ответ. Елико можеши, озлобляй себе, сие же есть по силе твоей. И не буди надеяся на сие, но на любовь и покров Божий. И да не уныеши, уныние бо во всякое начало зло влагает себе.
Вопрос 498. Понеже, аще глаголю братови моему, множицею со гневом глаголю слово: аще ли же аки с любовию восхощу, то абие со сладостию скверною и движением тела зле колеблюся, ниже на лице братнее воззрети без сих могий: что сотворю, отче?
Ответ. Еже возглаголати со гневом братови, или движущуся телу с любовию, сия оба смерть суть. Оставив убо обоя, по обычаю глаголи братови твоему: и поможет тебе Бог. И со всеми сими сохрани очи свои, и помолися о мне.
Вопрос 499. Что сотворю стужаем от брани чревобесия, и инех страстей, и сребролюбия?
Ответ. Егда брань творит с тобою страсть чревобесия, подвизайся, елико имаши силы, Бога ради, не дати телу, елико требует. И в сребролюбии подобне. Дондеже брань стужает тебе, то да не стяжеши излишно что-либо: до ризы, и чрепия, и в самой тонкой вещи подвизайся. А по еже победити со Богом брань ону, стяжи потребу свою по Богу. И во инех страстех тожде твори.
Вопрос 500. Брат вкупе живый с некиим старцем, вопроси тогожде старца Иоанна о мере пищи и сне, и о случающемся ему смятении, егда мнится ему что не право от старца бывати.
