Ответ Иоанна. Брате, Господь нам заповеда — друг друга честию больша себе творити. Аще убо любве ради, юже к тебе имамы по Богу, речем тебе яко при нас вселися, то делом покажем, яко себе предпочитаем брату. Аще ли же паки речем тебе, яко при оном пребуди, негли помыслит любы твоя, яко отреваем тя от нас, аки не имуще любве к тебе. Но ты искуси соседство мест сих, и пользу души твоея из них, и употреби слова апостола, глаголюща: «вся искушающе, доброе держите» (1 Фес. 5, 21). Сия от яже по Богу, любве глаголах. Прости мя, брате мой, Господа ради.
Вопрос 483 к великому старцу. Инок некий, живя в чуждей келлии, созда себе близ келлию. И прииде к нему некий брат, требуяй келлии, и дозволи ему он вселитися в созданной им келлии: сей же взысковаше даровати ему сию с подписанием. И согласися даровати, аще дозволят сие старцы, с тем обаче, еже бы почерпати на всяку седмицу от воды, яже есть в той сосуда два. И вопросиша великаго старца о сем.
Ответ Варсануфия. Сие несть иноческо. Аще бо писания хощете от друг друга, то и на суд имате ходити. Дело сие не есть любве. Но паче безписменно да живет брат в келлии: и аще восхощет господин келлии на время извести его, то со смирением должен изыти, ничтоже отнюд противуглаголя. Аще ли же и сам господин келлии тоя отыдет, хотя наполнити два сосуда своя воды, и не подаст ему он, пребываяй в келлии, то ниже той должен смутитися, но сотворити со смирением метание, и прияти сосуд празден, и отыти глаголя тому: прости мя, Господа ради, брате, яко оскорбих тя, и помолися о мне. Должен же и внимати себе, да по сих невозмятется от гнева. И, смирения ради его, покрыет Бог и брата его от вражды диаволи, и умилится потещи в след его, и положити ему метание, якоже возвратитися и наполнити, или и подержати с ним сосуд. И тогда любы Божия покрыет обоих, и спасет их человеколюбец Бог.
Вопрос 484. Что убо, яко требует поправки келлия она? Еда должен есть иждивати пребываяй в ней? Понеже не его есть, и чает когда-нибудь изыти из нея.
Ответ. Аще кто имать в себе, яко вся, елика имать, Божия суть, и верных всех обща, и свое никтоже имать что, то не должен есть сего помышляти. Плотскаго бо разума суть сия. Ибо аще и предварит иждив, и не пребудет тамо; ин брат, обретая упокоение тое, присно имать благословляти иждившаго и потрудившагося на месте том. И аще быхом имели истинна Рекшаго: «еюже мерою мериши, возмерится тебе» (Мф. 7, 2); и яко, «воздаси комуждо по делом его» (Мф. 16, 27); и паки: «даст ти Господь по сердцу твоему» (Пс. 19, 5), то не оставили быхом того отгнана быти безвременно. Но присно вопияти имехом к нему: «не имам тебе оставити, ниже имам тебе отступити» (Евр. 13, 5).
Вопрос 485. Брат вопроси тогожде великаго старца: прости мя, господине отче, яко смею возглаголати. Понеже вижду господина авву, аки любяща никоего паче инех, — и стужает ми помысл, глаголя: яко человеко угождает: зане чесого-либо аще хотят нецыи, дает им, а ин не дает. Единощи бо воспросих, единаго окна, и не сотвори: и паки мало извести, и не дал есть; инем же дает. Убо како творит сия? И что отвещаю помыслу тому?
Ответ Варсануфия. Брате, терпения потреба есть. Ибо рече Господь: «в терпении вашем стяжите души ваша» (Лк. 21, 19). И апостол: «терпения бо имате потребу», и прочая (Евр. 10, 36). Аще восхотел есть Бог искусити тя, претерпиши ли нечто: то ты ли обрящешися, не имея терпенитя? Колико лет имате тако келлии оны, и ничтоже ресте? И внегда видети иныя, творящия нечто, тогда абие сгараете, аки от огня. Почто не рекл еси помыслу: все время препроводих, и в малех днех не претерплю ли? Аще ли речет ти помысл: и како инем сотворил есть? То рцы ему: яко тии святи суть, аз же недостоин, достоин же всякаго оскорбления. Аще имаши авву твоего человекоугодника, не суща тако, то ты погубляеши душу свою. Аще ли же воистинну и человекоугодник есть, то ты ответа не даси за него, но той за тебе. Должен же ищай вещи, испытати время, и удобства, и упразднение, и тогда уразумеет, чесого ради не бывает то, егоже хощет. Аще ли же не обрящет, не должен есть порицати кого, но себе глаголя: аз есмь недостоин, и обрящеши исход помыслу тому, брате: сей есть путь хотящих спастися и жити по Богу.
Вопрос 486. Некий иногда от отцев старец, живяше во общежитии, в нем бяху сии святии старцы. И вопрошаемь от служащаго ему, что хощеши, да сотворю ти ясти, глаголаше тому со гневом: что-либо хощеши, сотвори. И скорбяше брат, не ведый, что сотворит. И вопрошен бысть тойжде великий старец: добре ли убо творит, тако глаголя, или ни?
