Минея праздничная полностью

Припев: Святи́и му́ченицы, моли́те Бо́га о на́с.

Неи́стовно страда́льцем поусти́в враг вся́ко зда́ние, все́ми постыде́ся, / четы́редесять бо непреста́нно пою́т Го́спода / и превозно́сят во вся ве́ки.

Неми́лостивно за Христа́ теле́с ва́ших у́ды сокру́шшеся, / всесожже́ние Боже́ственно принесо́стеся Бо́гу, / со А́нгелы при́сно ликуете, му́ченицы, пою́ще Христа́ во ве́ки вся.

Кре́постию смы́сла, его́же роди́, на ра́мена взе́мши, христолюби́вая ма́ти, / благоче́стия плод прино́сит, с му́ченики му́ченика, / священноде́йству Авраа́мову подо́бящися.

К непреста́нней жи́зни правоте́чно, о сы́не, твори́ ше́ствие, – / христолюби́вая ма́ти христолюби́вому де́тищу вопия́ше, – / не терплю́ тебе́ второ́е, Подвигополо́жнику Христу́ яви́тися.

Богородичен: И́же в не́дрех О́тчих / неразде́льно же Сы́на седя́щаго, в веще́ственнем чре́ве Твое́м все́льшася, Чи́стая, / пое́м, Де́во Богоневе́сто, и превозно́сим во вся ве́ки.

Ин. ирмос тойже.

Припев: Святи́и му́ченицы, моли́те Бо́га о на́с.

Претво́ршеся к жи́зни и́стинней, е́же о Христе́ ны́не сокрове́нней, / к зи́мней и боле́зненней кончи́не, до́блии, кре́пко вда́стеся, / спасе́ния и оставле́ния прося́ще нам.

От земли́ к Небе́сным преше́дше, страда́льцы венцено́сцы, / Це́ркви му́ченик победоно́сных ли́че, / бед, страсте́й, обстоя́ний избавле́ния проси́те нам и спасе́ния.

Расто́рг сме́рти у́зы Спас, страда́льцем побе́ды подаде́ на смерть, / четы́редесять бо, мра́зом согрева́еми, поя́ху / и спасе́ния всем ве́рным прося́ще.

Благослови́м Отца́ и Сы́на и Свята́го Ду́ха, Го́спода.

Напа́стей прило́ги, нападе́ние страсте́й, де́монов искуше́ния / Боже́ственный страстоно́сец лик моли́твою изыма́ет я́ве / от пою́щих Христа́ во ве́ки.

И ныне,Богородичен: Умерщвле́ныя и к пе́рсти сме́ртней и тле́нию сведе́ныя воскреси́ла еси́, / Еди́на, Нача́льника жи́зни ро́ждши, Христа́ Бо́га на́шего, / Влады́чице Де́во, Чи́стая Богороди́тельнице.

Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Песнь 9

Ирмос: От Бо́га Бо́га Сло́ва, / неизрече́нною му́дростию прише́дшаго обнови́ти Ада́ма, / я́дию в тле́ние па́дшаго лю́те, / от святы́я Де́вы неизрече́нно воплоти́вшагося нас ра́ди, / ве́рнии, единому́дренно пе́сньми велича́ем.

Припев: Святи́и му́ченицы, моли́те Бо́га о на́с.

За Христа́ обнажи́вшеся и ка́мением бие́ни бы́вше, / возду́шную претерпе́сте зи́мность, / водны́й лед и сокруше́ние уде́с и, огне́м опа́льшеся, / в ре́чней сия́ете быстрине́ издале́ча, / я́коже свети́ла, му́ченицы четы́редесяте.

Жезл си́лы Боже́ственныя, крест стяжа́вше, / вопия́ху Христу́ страда́льцы четы́редесяте: / Влады́ко Всеси́льный Победи́телю, руко́ю Тво́ею да венча́емся, / да вси Тя пе́сньми непреста́нно велича́ем.

Я́ко боле́знен у́бо лед, я́коже зело́ безме́рна лю́тость, / ю́же претерпе́сте, мра́за, но сла́док рай, / Авраа́мова бо не́дра патриа́рха гре́ют вас в се́лех ве́чных, му́ченицы четы́редесяте.

Победи́вше страда́ньми и венцы́ прии́мше от Боже́ственныя Влады́чни десни́цы, / ны́не дарова́ти моли́теся мир мíру и нам спасе́ние, му́ченицы четы́редесяте.

Богородичен: Неве́сто Ма́ти Де́во, / А́нгельская мно́жества Твоего́ мо́лят Сы́на, / приими́ моле́ние на́ше, еди́на наде́жде ве́рных, / и мир мíру и нам спасе́ние, Тебе́ лю́бящим, да́руй.

Ин. ирмос тойже.

Припев: Святи́и му́ченицы, моли́те Бо́га о на́с.

Преесте́ственныя зари́, и ра́дости несказа́нныя, и сла́вы сподо́бистеся улучи́ти, / ны́не же любо́вию чту́щия вас / напа́стей, и бед, и лука́вствия изба́вите вра́жия, / Христо́вы во́ини, му́ченицы четы́редесяте.

Си́лу, пребога́тии, Боже́ственную с Небесе́ прие́мше и кре́пость, соу́зницы Христо́вы, / льсти прогони́телие бы́сте, отгоня́ще вся́ку и́дольскую мглу непостоя́нную / и просвеща́юще мiр, му́ченицы четы́редесяте.

Укра́шшеся добро́тою честна́го муче́ния / и Боже́ственнаго прича́стницы бы́вше естества́, / вои́стинну ра́дуетеся, Све́ту сраствори́вшеся светле́йшему и чи́стому, / Христо́вы во́ини, му́ченицы четы́редесяте.

Слава: Ны́не Христу́ предстоя́ще благочести́вым дерзнове́нием / и отону́ду Божества́ све́том облиста́еми, сла́внии, / восхваля́ющия вы заре́ю освети́тися трисия́нною / приле́жно моли́те, му́ченицы четы́редесяте.

И ныне,Богородичен: Я́вльшийся, Де́во, души́ моея́ примра́к / све́та Твоего́ невеще́ственными блиста́ньми озари́, две́ре Боже́ственнаго Све́та, / и огня́ ве́чнаго изба́витися сподо́би, Чи́стая, / ве́рою и любо́вию пе́сньми Тя велича́ющаго.