Любляше Иисус Марфу и сестру ея и Лазаря и, веру их в грядущее Царствие жизни вечныя испытуя и утверждая, рече: сия болезнь несть к смерти, но к славе Божией, да прославится Сын Божий ея ради. Вы же, о, боголюбивыя сестры, и пред лицем смерти брата вашего верою и любовию ко Христу духом горяще, в Божественней силе Его не усомнилися. Сего ради приимите от нас похваления таковая: Радуйтеся, во уныние безнадежное обстоянии и скорби не впадшия; Радуйтеся, обремененных скорбями житейскими тем ободряющия. Радуйтеся, в печали вашей ко Врачу душ и телес, Господу Иисусу, со смиренным упованием помыслы своя обратившия; Радуйтеся, лица Его не видяще, во благой покорности Ему пребывшия. Радуйтеся, во испытании сем веру крепку яко Авраамову явившия; Радуйтеся, в злостраданиях терпение твердое, яко Иов, показавшия. Радуйтеся, Марфо и Марие, образ веры и любви нам показующия.
Ведая, яже хощет сотворити Всемогущий Господь и Спас наш, рече учеником Своим: Лазарь, друг наш успе. Но иду, да возбужу его; научая всех во свете лица Божия ходити и Подателю жизни воспевати: Аллилуиа!
Многии от иудей приидоша к Марфе и Марии, да утешат их о Лазаре, брате их. Сестры же, отбегли их, яко не имущих о Христе Иисусе упования. Марфа к Единому Утешителю стопы своя с радостию направи, егда Той Вифании достиже. Таковую крепкую любовь сестер Лазаревых ко Христу и веру их зряще, радостными гласы воспоем им таковая: Радуйтеся, добротою душ ваших неверных иудеев окамененныя сердца покорити возмогшия; Радуйтеся, не суетному унынию, но Божию благоволению себя предавшия. Радуйтеся, на единую благость Христову в печали вашей надежду возложившия; Радуйтеся, в сретение Его со тщанием стопы ваша направившия. Радуйтеся, во уповании вашем от Могущаго спасти оправданныя; Радуйтеся, утешения в скорбех не от людей, но от Бога искати нас научающия. Радуйтеся, Марфо и Марие, образ веры и любви нам показующия.
Марфа блаженная, егда срете Господа, утешения от Него ищущи, рече: Господи, аще бы Ты зде был, не умер бы брат мой. Но и ныне вем, яко елика аще просиши от Бога, даст Тебе Бог. Емуже от всея души нашея и мы вопием: Аллилуиа!
Божественное Свое смотрение о нашем спасении показуя, Господь Иисус, яко жизни и смерти Владыка, благоволи рещи тебе, блаженная Марфо: воскреснет брат твой. И паки: веруяй в Мя, аще и умрет, оживет. Вериши ли сему? — вопроси тя. Ты же отвеща Ему: ей, Господи, верую, яко Ты Христос Сын Божий, грядущий в мир. Сего ради, вере во Христа Сына Божия тобою научаемии, восхваляем тя сице: Радуйся, блаженная Марфо, обетование о воскресении брата твоего от Самаго Жизнодавца услышавшая; Радуйся, яко вопрошенная от Него о вере твоей, не плоти и крови, но гласа Отца Небеснаго послушавшая. Радуйся, яко от Него наученная, Христа Сына Божия твердо исповедала; Радуйся, яко тем камень веры, на немже созда Господь Церковь Свою, явившая. Радуйся, во исповедании твоем Петру Первоверховному апостолу уподобившаяся; Радуйся, равноапостольнаго ублажения воистину достойная. Радуйтеся, Марфо и Марие, образ веры и любви нам показующия.
Трости надломленныя не преломляяй, Человеколюбец Господь, егда виде Марию и пришедшия с ней иудеи плачущия, якоже любляше Лазаря, прослезися Сам. Да и мы немощнии, в скорбех суще, бестрепетно к Нему со слезами притекаем, вопиюще Ему: Аллилуиа!
Воистину благословен о брате твоем плач твой, Марие, егоже видя прослезися Иисус. Сего ради со умилением ублажаем тя сице: Радуйся, боголюбивая Марие, в серафимстей любви твоей ко Господу, и к сродникам любви своей не угасившая; Радуйся, плачем твоим о Лазаре нас, во окаменении сердечнем пребывающих, обличившая. Радуйся, Христа Бога слезы о падшем создании Своем источити подвигшая; Радуйся, в слезах Господа Иисуса, немощем нашим состраждуща, елей утешения всем плачущим и болезнующим показавшая. Радуйся, и сама в скорбех наших сострадати нам могущая; Радуйся, с сестрою твоею Марфою милосердия сестрам первоначальница богоугодная. Радуйтеся, Марфо и Марие, образ веры и любви нам показующия.
Всеведый по Божеству Своему, человеческое естество показующе, о Лазаре вопрошал, Господи Иисусе: где положили его. И камень от гроба взяти повелел, да возсмердением смерти заградятся неверных уста. Мы же, вернии, со дерзновением Тебе, победити смерть пришедшему, вопием: Аллилуиа!
