Избранную угодницу Христову, в земли рязанстей просиявшую, и преизрядную молитвенницу о душах наших песньми восхвалим, блаженную Матрону: ты бо в терпении мнозе житие твое претекла еси, и страданием украсившися, угодна Богу явилася еси. Темже убо стяжавши дерзновение ко Господу, Того моли избавити ны от всякаго зла, с любовию чтущих память твою и поющих ти: Радуйся, Матроно, в скорбех и напастех нам помогающая.
Ангельски поживши, блаженная Матроно, телесе страданием душу твою убелила еси и небесныя радости причастница быти сподобилася еси. И ныне, пребывающи во Царствии Небеснем вкупе с лики ангел и всех святых, непрестанно молишися за ны, со умилением поющих ти таковая: Радуйся, земли рязанския похвало; Радуйся, страны российския молитвеннице новая. Радуйся, Богу житием твоим угодившая; Радуйся, терпением мнозем душу убелившая. Радуйся, страданием украшенная; Радуйся, венцем славы от Бога увенчанная. Радуйся, с дерзновением ко Господу молящаяся; Радуйся, на земли прославляемая. Радуйся, яко ныне пред Царем царей предстоиши; Радуйся, яко чтущих тя пред Богом поминаеши. Радуйся, со всеми святыми на Небеси пребывающая; Радуйся, о прославляющих тя Бога молящая. Радуйся, Матроно, в скорбех и напастех нам помогающая.
Видяще, яко болезнию издетска избра тя Господь, Того бо сила в немощи совершается, радуемся таковому о тебе Божию смотрению, вопиюще Ему: Аллилуиа.
Разумеющи Божие изволение, от юности Господу вручила еси себе, и вземши свой крест болезней телесных, яко от руку Самаго Христа, чрез все житие твое невозвратно Тому последовала еси. Мы же Господа, избравшаго тя, прославляюще, радостно вопием ти: Радуйся, Богом избранная; Радуйся, Христу уневещенная. Радуйся, сердце твое Господеви отдавшая; Радуйся, крест твой безропотно понесшая. Радуйся, издетска на Господа уповавшая; Радуйся, устнами чистыми Богови молившаяся. Радуйся, отроковице, от Бога услышанная; Радуйся, в терпении твоем свыше укрепленная. Радуйся, Духа Святаго сосуде очищенный; Радуйся, яко о тебе сила Божия является. Радуйся, в немощи лежащая немощным помощнице; Радуйся, Божия благодати цельбоносный источниче. Радуйся, Матроно, в скорбех и напастех нам помогающая.
Бурю укоризн и поруганий от родителю твоею непрестанно с младенчества претерпевающи, на Бога единаго уповала еси, веровавши словесем Его: яко аще же и мать забудет дитя свое, но Аз не забуду тебе, с надеждою вопияла еси Тому: Аллилуиа.
Имущи от седми лет очи слепе, слезы многи пролила еси, от матере биения терпящи, и се, явися ти Сама Пречистая, егда же матери сие рекла еси, та паки всуе зле бияше тя, обаче трищи Богородица являшеся, оставивши тебе рукописание утешительное. Тебе же оттоле в разслаблении лежащей и не озлобленней, со слезами приносим таковая: Радуйся, беды от сродник терпевшая; Радуйся, в молчании скорби понесшая. Радуйся, издетска возлюбившая Бога яко Отца; Радуйся, уповавшая в напастех на Того единаго. Радуйся, многослезныя молитвы к Богу пролиявшая; Радуйся, многи скорби от матере твоея претерпевшая. Радуйся, отроковице, от Матере Божия возлюбленная; Радуйся, под покровом милости Ея утешенная. Радуйся, показавшая образ кротости и незлобия; Радуйся, поревновавшая смирению Христову. Радуйся, яко в тебе вера и любы являются; Радуйся, яко житие твое по Бозе прославляется. Радуйся, Матроно, в скорбех и напастех нам помогающая.
Сила Божия укрепляше тя, егда в болезни страдальчествующи, яко злато в горниле огненнем, душу твою очистила еси, и в горний Иерусалим устремилася еси, ум и сердце отрешивши от всего земнаго и привременнаго, и на всяком месте, идеже превитала еси, пояше песнь Богу: Аллилуиа.
Видев некий человек тя к одру болезни пригвожденную и разумея в простоте сердца своего, яко Богу угодна еси, прииде к тебе в немощи своей, дабы от рук твоих получити исцеление. Мы же, видяще совершение просимаго, Бога прославляюще похвальная приносим ти: Радуйся, волю свою воли Божией покорившая; Радуйся, яко Иов вся от Бога благодарне приимшая. Радуйся, язвы и раны на теле твоем носившая; Радуйся, в жертву Богу всю себе принесшая. Радуйся, силою Божиею в болезни укрепленная; Радуйся, душею, яко в горниле очищенная. Радуйся, отрешившая ум и сердце от всего земнаго; Радуйся, помышлявшая токмо о небеснем. Радуйся, в горний Иерусалим устремившаяся; Радуйся, сподобльшаяся сладости райския. Радуйся, от Господа дар исцеления приимшая; Радуйся, прикосновением руку твоею исцелявшая. Радуйся, Матроно, в скорбех и напастех нам помогающая.
Звезда многосветлая явилася еси, предивная мати Матроно, яко светильник неугасаяй, путеводящи человеков по морю житейскому, людския страсти в дусе кротости обличала еси и подавала еси всем исцеления не токмо телесная, но и душевная, увещавающи церковь Божию посещати и за вся Бога славити, с любовию поюще Ему: Аллилуиа.
