Немощь естества человеческого являющи, сестра умершаго, Марфа, глагола Иисусу: Господи, уже смердит: четверодневен бо есть. Мария же, зряще камень отвален от гроба, в молчании пребываше. Сему Мариину молчанию со умилением внимающе, с Марфою же маловерие свое Господу дерзновенно исповедующе, воззовем к ним таковая: Радуйся, Марие, яко ко гробу смердящаго в претрепетном молчании за Христом, пришедшая; Радуйся, яко сим всех нас в послушание веры разум покоряти научившая. Радуйся, Марфо, яко немощь веры нашей превозмогати научающая; Радуйся, яко всем нам: ей, Господи, верую, яко Ты Христос, Сын Божий, глаголати указавшая. Радуйтеся, блаженныя сестры, в немощех душ и телес ваших от Христа не отступившия и Ему любовию последовавшия; Радуйтеся, на высоту благодатнаго разумения Самим Всеведцем возведенныя. Радуйтеся, Марфо и Марие, образ веры и любви нам показующия.
Славу Свою, яко Единороднаго от Отца, всем верным являя, хвалу Отцу Своему воздав, Иисус гласом великим воззва: Лазаре, гряди вон. И бездыханный, Дающаго дыхание послушав, от смерти восста и от гроба изыде; да чудо сие зряще, купно и мы с ним Победителю смерти воспоим: Аллилуиа!
Чудо велие и страшное сотвори Христос Бог наш, Лазаря четверодневнаго от мертвых воздвигнув. Да и нас всех веру в Него, яко Сына Божия, утвердит, бессмертие души и общее всех воскресение уверяя. Мы же, божественное поклонение Сотворшему сие воздающе, ублажим сестры воскрешеннаго Им и воззовем к ним сицевая: Радуйтеся, праведнаго Лазаря сестры, Христа нелицемерно возлюбившия; Радуйтеся, Христом за верность вашу возлюбленныя. Радуйтеся, общее воскресение прежде страстей Христовых в вере узревшия; Радуйтеся, верою вашею и нашу веру укрепляющия. Радуйтеся, ученицы Христовы достославныя; Радуйтеся, лика апостольскаго истинныя причастницы. Радуйтеся, Марфо и Марие, образ веры и любви нам показующия.
Сыны тьмы, зря умершаго и гласом Божиим от тления восставшаго, в ожесточении сердец не вероваша Христу даже до сего дня, во ослеплении суще. Мы же, сих безумию не прилагающеся, но в общее Воскресение по гласу Сына Божия верующе, Ему, яко Жизнодавцу, велегласно и вседушно возопиим: Аллилуиа!
Преславная и страшная в Вифании сотворив, Иисус, прежде шести дней Пасхи, паки прииде в весь сию. И сотвори Ему вечерю, и был Лазарь един от возлежащих с Ним. Вы же, присноблаженныя сестры, Подателю всяческих благодарни суще, Марфа служаше Ему всеусердне, Мария же миро на нозе Его возлия. Сего ради, в радость вашу внити желающе, и мы со умилением зовем вам: Радуйтеся, богомудрыя жены, хвалы и благодарения благодеющему Господу преисполненныя; Радуйся, Марфо трудолюбная, се уже другой раз на вечери Господу послужившая. Радуйся, в благодарном служении сем Господом милостивно приятая; Радуйся, Марие, Сладчайшему Иисусу нозе миром многоценным помазавшая. Радуйся, во обличение Иудиных злохулений похваления Иисусова сподобилася; Радуйся, яко многоценнаго мира на нозе Христовы возлиянием и нас благолепие дому Божия любити и о том прилежати поучаеши. Радуйтеся, Марфо и Марие, образ веры и любви нам показующия.
Марфе и Марии вернии подражающе, кийждо во своем чину, ко Христу Спасу припадем и, просяще от Того исцеления немощей наших и от сна греховнаго воскрешения, благодарными усты воспоим Ему: Аллилуиа!
Верные до конца во служении вашем Христу во днех плоти Его пребывшия, и самовидцы страстей Его быти сподобившиеся, к погребению Воскресителя Лазарева, славныя Марфо и Марие, посреде мироносиц явилися. С ними предстояще ныне престолу славы Божия, молитвами вашими к песнопенному тех лику совокупите и нас, ваши подвиги прославляющих: Радуйся, Марфо, в твоем Христу многопопечительном служении, якоже и по исповедании, поревновавшая; Радуйся, странноприимницам и милосердия сестрам подвигоположница. Радуйся, Марие, возлюбленному ученику Христову Иоанну, в пламенней любви к Тому уподобившаяся; Радуйся, непорочных дев, Христу в житии своем уневестившихся, руководительница не ложная. Радуйтеся, боголюбивыя сестры, и деятельным житием, и вниманием сердечным исследования Христу ревнительницы изрядныя; Радуйтеся, на обоих сих путях угождения Господу жити братии вкупе мудре нас научающия. Радуйтеся, Марфо и Марие, образ веры и любви нам показующия.
Кий глагол довлеет по достоянию воспети Воскресения Христова радость всемирную, еяже вы, со прочими женами мироносицами, в сей велий и святый день причастилися; темже и мы, Воскресения Христова величие боголепное славяще, поем Христу: Аллилуиа!
