О преславная и достоблаженная мати Матроно, житие твое скорби исполнено бе, но взирающе на смирение твое молим тя, угоднице Божия, умоли всещедраго Бога, да низпослет нам, недостойным, милость Свою, паче же утвердит и укрепит ны в несении креста нашего, да отвержемся себе и пойдем по пути спасения за Христом, смиривше выя своя под крепкую руку Божию, принимающе вся, яже от руки Его: вемы, яко Господь един может и падших возставити, и заблуждших возвратити, и соблазнившихся исправити, и грешников праведники соделати. Огради нас, мати Матроно, молитвами твоими от сети лукаваго, да не прельщеннии им возвратимся вспять. Еще молим тя, яко имущую велие дерзновение ко Господу, пролей теплую молитву за ны, недужныя и унылыя, и испроси у Господа коемуждо благопотребная, да подаст Господь и нам, якоже тебе, терпение и благодушие в бедах и скорбных обстояниих, да поживем по воли Его во вся дни живота нашего, зане воистинну вемы, яко весть Отец наш Небесный, ихже требуем, прежде прошения нашего. О, блаженная мати Матроно, многоименитому сонму новомучеников российских причтенная, с ними моли Господа нашего и Спаса Иисуса Христа, да сохранит Церковь Православную от соблазнов, ересей и расколов, да оградит Господь страну нашу от всех наветов видимых и невидимых враг и изимет ю из пучины безбожия: вемы, яко живем ныне токмо ради крове мучеников излиянныя, дарует же и нам Господь ничесоже боятися, верным же быти Ему даже до смерти, и яко мучениколюбцем со мученики возрадоватися во Царствии Небеснем. Ей, мати Матроно, испроси нам у Человеколюбца Господа время покаяния, да не исторгнет ны аки плевелы прежде жатвы, да не во зле погибнем, но да очистит ны от всякия скверны плоти и духа, во еже явитися нам в день судный нескверным и непорочным пред лицем Его, да чистым сердцем, яко истинная чада Божия, радостне воззовем к Нему: не отрини ны Господи, и приими во Царствие Твое, идеже Ты царствуеши со Отцем и Святым Духом во веки веков. Аминь.
О блаженная мати Матроно, к твоему предстательству прибегаем и тебе слезно молим, яко имущую велие дерзновение ко Господу, пролей теплую молитву о рабех твоих, в скорби душевней пребывающих и помощи от тебе просящих. Истинно бо слово Господне: просите и дастся вам, и паки: яко аще два от вас совещаета на земли о всякой вещи, еяже аще просита, будет има от Отца Моего, иже на Небесех. Услыши убо воздыхания наша и донеси я ко Престолу Владычню, идеже ты предстоиши, вемы, яко много может пред Богом молитва праведника. Да не до конца забудет нас Господь, но призрит с высоты Небесныя на скорбь рабов Своих и плод чрева на полезное дарует. Воистинну, Бог идеже хощет побеждается естества чин, творит бо елика хощет: яко сотвори Господь Аврааму и Сарре, Захарии и Елисавете, Иоакиму и Анне, с нимиже моли, тако да сотворит Господь Бог и нам по милости Своей и неизреченному человеколюбию. Буди Имя Господне благословенно от ныне и до века. Аминь.
Избра́нная Ду́хом Бо́жиим от пеле́н младе́нческих, блаже́нная ста́рице Матро́но, слепоту́ и не́мощь теле́сную ко очище́нию духо́вному от Бо́га прия́вшая, да́ром прозре́ния и чуде́с обогати́лася еси́ и венце́м нетле́нным от Го́спода украси́лася еси́. Сего́ ра́ди и мы благода́рне вене́ц похва́льный прино́сим ти, вопию́ще:
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
А́нгел во пло́ти яви́лася еси́ на земли́, Матро́но блаже́нная, исполня́ющи во́лю Бо́жию. А́ще рождество́ твое́ в слепоте́ теле́сней бысть, но Госпо́дь, умудря́яй слепцы́ и любя́й пра́ведныя, просвети́ духо́внии о́чи твои́, да послужи́ши лю́дем и дела́ Бо́жии явя́тся чрез тебе́. Мы же с любо́вию вопие́м ти такова́я:
Ра́дуйся, от младе́нчества Бо́гом избра́нная; ра́дуйся, благода́тию Ду́ха Свята́го от пеле́н осене́нная.
Ра́дуйся, да́ром чуде́с измла́да обогаще́нная; ра́дуйся, прему́дростию от Бо́га свы́ше испо́лненная.
Ра́дуйся, мы́сленныма очи́ма во́лю Бо́жию прозира́ющая; ра́дуйся слепо́тствующих умо́м мудрецо́в ве́ка сего́ посрамля́ющая.
Ра́дуйся, ду́ши заблу́ждшия к Бо́гу приводя́щая; ра́дуйся, ско́рби и печа́ли утоля́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Ви́дяще лю́дие и иере́й, егда́ креща́ше тя, блаже́нная, чу́дный столп о́блачный над главо́ю твое́ю и обоня́вше благоуха́ние ве́лие, дивля́хуся, что у́бо сия́ отрокови́ца бу́дет, пою́ще Бо́гу: Аллилу́иа.
Ра́зум име́я просвеще́нный, иере́й Бо́жий Васи́лий позна́, я́ко креща́емая от него́ сосу́д благода́ти Бо́жия есть, и тя, пра́ведная Матро́но, отрокови́цу свя́ту нарече́. От на́шего же усе́рдия прино́сим ти похвалы́ сия́:
Ра́дуйся, во святе́й купе́ли благода́тию Свята́го Ду́ха облагоуха́нная; ра́дуйся, на пе́рсех твои́х крест запечатле́нный име́вшая.
Ра́дуйся, моли́твеннице, от Бо́га лю́дем дарова́нная; ра́дуйся, свеще́ неугаси́мая, пред Го́сподем сия́ющая.
