Слышавше людие ближнии и дальнии о чудесех тобою творимых, притекаху к тебе, яко к купели силоамстей, в болезнех и скорбех, бедах и нуждах, и никтоже от тебе без утешения отиде. Ты же, мати Матроно, помогающи всем, назидала еси наипаче Бога благодарити. И мы, прославляюще твое смирение, поем ти таковая: Радуйся, Божественнаго Духа чистое селение; Радуйся, к Богу стяжавшая велие дерзновение. Радуйся, по морю житейскому путеводящая; Радуйся, болезни телесныя и душевныя исцеляющая. Радуйся, сущих во страстех с кротостию обличавшая; Радуйся, путь смирения во спасение нам указавшая. Радуйся, врачьми оставленных дивное исцеление; Радуйся, в пианстве гибнущих скорое исправление. Радуйся, яко обидимых от злых заступаеши; Радуйся, яко погибающих в бедствиих спасаеши. Радуйся, сродник враждующих благое примирение; Радуйся, с верою прибегающым к тебе присное утешение. Радуйся, Матроно, в скорбех и напастех нам помогающая.
Дивно и странно есть слышати, мати Матроно, како не имущи научения книжнаго, людем приходящым поучения от Священнаго Писания глаголала еси. Наставляющи пребывати их в заповедех Господних, жития святых во образ им полагала еси, подвизающи всех звати Богу: Аллилуиа.
Возлюбивши обитель Дивеевскую, зело почитала еси блаженную Марию, тамо пребывающую, и с нею сущи во общении духовнем, молитву вкупе творила еси. И тако многия недужныя и страждущыя от дух нечистых вашими молитвами исцеляюще, на путь покаяния наставляли есте. Мы же Бога, дивнаго во святых своих, восхваляюще, приносим ти таковая: Радуйся, измлада благодати Божия исполненная; Радуйся, дары Духа Святаго обогащенная. Радуйся, премудрость и разум от Бога приявшая; Радуйся, твоими ученьми во спасение назидавшая. Радуйся, от Бога свыше наученная; Радуйся, паче книжных просвещенная. Радуйся, подававшая совет благий во исправление; Радуйся, направлявшая от вечныя погибели ко спасению. Радуйся, пребывавшая с блаженною Мариею в духовнем общении: Радуйся, посылавшая бесных многих к ней за исцелением. Радуйся, на земли сподоблшаяся слышати пение небесное; Радуйся, яко ныне на небесех Господу воспеваеши со ангелы. Радуйся, Матроно, в скорбех и напастех нам помогающая.
Иноческий чин превыше всего земнаго поставлявшая, сердцем своим скорбела еси яко не возможно есть тебе во святей обители пребывати. Мы же Господу, давшему ти поприще иное прейти, сиречь в мирстем чине людем послужити, благодарственно воспоим: Аллилуиа.
Имущи огнь любве ко Господу в сердце своем, подвигу преподобных отцев поревновала еси блаженная, непрестанно умерщвляющи плоть свою хладом, бдением и пощением. Мы же, немощнии, ублажающе тя, зовем тебе сице: Радуйся, от юности возлюбившая нищету духовную; Радуйся, дух твой окрилившая тайною молитвою. Радуйся, благое иго Христово на ся вземшая; Радуйся, бремя Его с радостию понесшая. Радуйся, любовию Божиею возжженная свеще; Радуйся, преподобных отцев подражательнице. Радуйся, мраз со благодушием претерпевавшая; Радуйся, постом твоим дух немощных укреплявшая. Радуйся, лучами Святаго Духа озаренная; Радуйся, преисполненная милости к ближним и сострадания. Радуйся, бедствующым на помощь ускоряющая; Радуйся, в радость претворяющая печаль скорбящих. Радуйся, Матроно, в скорбех и напастех нам помогающая.
Новое и лютое гонение на Церковь Божию власть предержащии воздвигоша, дышаще прещением и убийством. Ты же, Матроно, в правой вере всех укрепляющи, увещавала еси вся претерпети и веру хранити, со упованием взывающе к Богу: Аллилуиа.
Хотяща списати житие твое, блаженная Матроно, приидоста к тебе два верных мужа, ты же ничесоже о себе глаголала еси, обаче узревши духовныма очима, яко от Господа мученический венец обема уготован есть, молилася еси, просящи има у Господа терпения и помощи, во еже крест понести. Сего ради, тайнозрению твоему дивящеся, приносим ти таковая: Радуйся, Бога паче всего земнаго возлюбившая; Радуйся, себе ни во чтоже вменившая. Радуйся, паче жизни возжелавшая Царствия Небеснаго; Радуйся, на мученичество укреплявшая верных. Радуйся, молитвеннице о сущих в гонениих; Радуйся, научающая за Христа терпети страдания. Радуйся, прозревшая уготованныя верным венцы; Радуйся, яко о святости твоей свидетельствоваша мученицы. Радуйся, наставлявшая благодарне крест Богом данный нести; Радуйся, увещававшая всегда ко Господу прибегати. Радуйся, како в страданиих веру хранити показавшая; Радуйся, яко немощныя в скорбех укрепляеши. Радуйся, Матроно, в скорбех и напастех нам помогающая.
Внегда соблазны мнози Церковь Русскую обуреваху, ты, Матроно, ревнительница сущи веры православныя, чада Божия в смятении пребывающая увещавала еси душепагубных расколов уклонятися, да чистым сердцем всегда взывают Богу победную песнь: Аллилуиа.
