И поживе убо преподобный Герасим лета довольна по пустыням. По сем разуме отхожение свое к Богу, и созывает братию изо всех монастырей своих в болшей монастырь Болдин, идеже лежит честное его тело. И егда снидошася братия из монастырей, и начат святый глаголати к братии: «Се уже, братия, конец жития моего приближается, и аз убо отхожу от вас, а духом с вами неотступен буду. О сем да будет вам разумно, аще обретохом благодать пред Богом, то монастырь сей по моем преставлении ничимже не оскудеет, но паче разпространится; и прочих монастырей, ихже з Божиею помощию создах, — аще и скорбная восприимут, но скорбь в радость претворится, и ти не оскудеют ничимже, аще любовь будет между вами».
И паки глаголаше игумену Иосифу[965] и всей братии: «Братие и чада, молю убо вас, якоже при мне не бысть хмелнаго пития во обители сей, тако и по моем преставлении никакоже да не будет; и миряном бы со братиею во единых келияхъ не жити никогдаже; и имения по келиям не держати, кроме одежда и обуища, и то бы было все общее; а пищи по келиям не держати, питатися трапезною пищею, чем Богъ пошлет, а пища бы была равна всей братии. А приходящих братий из монастыря не изжденути, а ропотником и расколником не попущати, смиряти их монастырским смирением и наказывати их в кротости, а непослушающих наказания от обители отгнати, да и прочии страх имут таковая не творити. А спутников и нищих не оскорбляйте, накормите их и на путь подайте, чем Богъ пошлет. И игуменов ваших почитайте и повинуйтеся о Бозе во всем, якоже пишет: „Иже аще повинуется старейшине, рекше, игумену, сей ангелы подражает, а противляяся дьявола веселят в себе”. А учнет игумен жити не по месту и не по чину монастырскому, и вы бы его, игумена, не обещестили, послали в келию незлобиво в кротости. А игумен бы без соборных старцов,[966] опричь духовного дела, совета ничего не делати, а соборных бы старцов было у вас дванадесят непременно, кроме игумена. А старцом такоже без игумена ни о какове о монастырском деле не соборовати, но всем вместе, опричь того, которой будет во отъезде на монастырской службе. А игуменов бы своих пострижеников держали, занеже закон ведают в пустыни. А хто Живоначалныя Троица в пустыни сей закон поруших, игумен или соборныя старцы которой ни буде, то судятся со мною пред Богом. Аще ли, господине, поживете по сему нашему закону, ино, господине, васъ Богъ направит на путь ко спасению».
И паки рече: «Братие и чада, якоже преже глаголах вам, и паки глаголю. Се убо отхожу от жития сего, а вас оставляю в руце Божии и Пречистыя Богородица, и преподобного Сергия чюдотворца, и в руце государя царя и великого князя Ивана Васильевича, всеа Руси самодержца, и преосвященного Макария,[967] митрополита Киевского и Московскаго и всеа Руси, занеже, господине, бил есми челом царю государю и великому князю Ивану Васильевичю всеа Руси и преосвященному митрополиту Макарию о брежении монастырском от находящих скорбей по преставлении моем. И царь государь и митрополит пожаловали, изустную памятцу взяли у меня о брежении монастырском. И будет, господине, которыя скорби постигнут вас, — и вы бы есте о всем уповали на Бога и на Пречистую Богородицу, и на помощь бы естя призывали Сергия чюдотворца, и били бы есте челом царю государю и великому князю, имярекъ, и преосвященному митрополиту о всяком брежении монастырском».
И тако наказав их преподобный и от Божественнаго Писания немало и дав братии последнее целование о Христе, и одарив их молитвами своими, и воздвиже на небо руце, и молитву сотворивъ, конечное слово изрекъ: «Господи, в руце твои предаю духъ мой».[968] Бе же в то время пояху заутренню[969] и праздноваху преподобному Пафнотию Боровскому чюдотворцу. И егда начаша чести Святое Евангилие, и чтуще: «Придете ко мне, вси труждающеся и обременении, и аз покою вы»,[970] — и тако предасть честную свою душю в руце Божии в лето 7062 году месяца маия въ 1 день в седмый час нощи.[971] И абие храмина исполнися благоухания велия, и бысть лице его светлее живаго. И тако погребоша его честно, с кандилы и со свещами, в созданнем от него монастыре у Живоначалныя Троицы, зовомо Болдино, у предела Сергия чюдотворца от полуденныя страны. И тако братия разыдошася с миром по своим монастырем, где кои живяше.
Поживе же преподобный Герасим в различных пустынях двадесят шесть летъ, а пострижеся трехнадесяти лет, а у старца в келие поживе двадесят лет, а в келие шесть летъ; убо преставися преподобный Герасим, а братии было тогда во Болдине монастыре живущих сто двадесят седмь братов, живяста же по заповедех Господних и по обещанию преподобного отца нашего Герасима, славяще Бога и в молитвах призывающе преподобного Герасима чюдотворца; поживе лет всех 65.
