Преподобному же спешащу в монастырь на Болдино, не скончав дела своего. Ученицы же его дивляшеся о сем, воспросити же не смеяху. Святый же глагола им: «Ныне убо подобает нам поспешити посетити приведенаго к нам». Они же почюдишася, что скоро спешит святый в Болдин монастырь, они же глаголам преподобного не разумеша. Идущу же ему и близ монастыря бывшу преподобному, и се видяше от монастыря зле бесящаго. Святый же стретив человека того и ем его за руку, он же умолча. И возврати его преподобный паки в монастырь и введе его в церковь, и помолися Богу о нем со слезами. Он же в той час смысленно глаголати начат и припадая к ногам преподобного, моля его, дабы о нем помолил Бога. И бысть здрав, яко николиже болевъ, и поживе время доволно в разуме истинне. И отпустив его, преподобный глагола ему: «Не повеж, чадо, сего никомуже и живи по заповедех Господних, якоже подабает крестияном жити». Он же оттоиде в дом свой, радуяся и славя Бога, и угодника его, преподобного Герасима, блажаше вкратце.
Бысть убо вмале монастыря езеро, Обрамовское словуще, пространством невелико бе, только глубоко добре; и сквозь его речка мала течаше, зовома Озеречка, бе же в ней множество рыб. От селян же ту живущии много ходяще рыб ловити во езеро то. И кто убо приидет на ловитву или кто, мимо ходя, на помощь Бога призовет, и тому быша на езере том многия мечты вражия и страхования велия, и пакости, — овех утопающе самех, овех суденцы разбивающе и у овех же мрежи в воде погибающе, а иным болезни приходяще на озере том. И отнюдь никтоже не обреташе рыб во езере том з Божиею помощию. А котории убо невегласи ходяще на езеро то без Божия помощи с волшеством, и те убо здрави бывающе и много рыб имаше доволно.
Преподобный же Герасим сия слышав и оскорбися зело. И много своих ловцов посылаше з Божиею помощию, такоже им мечты бываше — ничтоже и николиже имаше рыб, но токмо пакости приемлюще многи. Преподобный же на долго время о сем моля Бога со многими слезами, дабы победил мечты вражия, и восхоте преподобный сам итти на езеро то с ловцы монастырскими. И повеле в церкви пети молебен, сам же преподобный много моляся со многими слезами, и в нощи той моляся Богу, а наутрие итти ко езеру.
Бе же близ езера того монастырская весь, Абрамово зовомо. И абие в нощи той слышаху жители веси тоя во озере шум велик зело и вопль, и стонание необычно и ужасошася велми, яко преже того не слышавше нигдеже такова шума и кричания. Наутрия же бысть день той тих и красен зело от утра и до вечера. Преподобный же Герасим приде с ловцы своими и виде в той час во езере том волнение зелное, а ветру не бывшу в том часе. Святый же, став у езера того, нача молитву творити на долгъ час со многими слезами. По совершении молитвы преподобного бысть звук во езере том, и аки гром страшен возгреме на многъ час, яко всемъ ту сущим устрашитися от зелнаго гремения. И абие пойде гром той изо озера вниз по речке той, яже течет сквозь езеро то Абрамовское. Преподобный же паки начат молитися со слезами. И потом бысть тишина велия во езере том. Преподобный же возрадовася велми, благодаряше Бога, прогнавшаго мечты вражия, и призывая Бога на помощь, и повеле ловцем своим во езере неводы метати. И бысть ловитва стройна, и уловиша рыб множество безчисленно. И оттуды преста конечно волнение, мечтание вражие во езере том — молитвами преподобного Герасима и з Божиею помощию ловяхуть рыбу на монастырь доволно, и никакоже пакости и до сего дня не бысть запрещением святого.
Обычай убо имея преподобный Герасим по пустыням ходити, занеже безмолвию ревнитель. Ходяй же по пустыням, обрете не в проходимом лесу место на реке на Днепре при болшей дороге, зовомыи Сверковы Луки, ростояние имея от Болдина монастыря сорок верстъ, а от Дорогобужа сухим путем трицать верстъ вниз по реке Днепру. Место невелико, окатно; преже бо того бысть в литовщину[958] ту монастырекъ особной,[959] толко две келии, и выше того на другой стороне реки Днепра — другой монастырек, особной же. И как государю Богъ поручил грады Дорогобуж и великий град Смоленескъ, и темъ местом почал владети государевъ боярин и воевода Яков Ондреевич Салтыков. Преподобный же Герасим обрете и возлюби место то, занеже потребно есть монастырь устроити. И поведаша преподобному, како тот государевъ боярин, Яков Андреевичь Салтыков, ездит тешитися на звериную ловлю по обычаю своему, как у них обычай имат, бе бо лесъ пустыня непроходимая, угодно добре к ловитве звериной. И егда лучашеся ему на пустыни той ловитвы ради обночитися, он же заехав во особнячок тот, в трапезу монастырка того, начевати, и с собаками, занеже место пусто, добре стати негде. Преподобный же услыша такое дело и оскорбися велми, яко таковый великий боярин в православной вере нечестивых дело творяше — с собаками в трапезе начевати.
